ئامیره و پێدڤیێن نۆشداری بۆ ساخله‌میا زاخۆ دهێنه دابینكرن
دهۆك، له‌زگین جوقی
رێڤه‌به‌ری ساخله‌میا زاخۆ دیار كر حوكمه‌تا هه‌رێما كوردستانێ گرنگیه‌كا زۆر دده‌ته ساخله‌میا زاخۆ و دێ چه‌ندین ئامیره و پێدڤیێن نۆشداری بۆ دابین كه‌ت و دبێژیت: ساخله‌میا زاخۆ ژ شه‌ش رێڤه‌به‌ریان پێك دهێت.
د. شاكر عه‌بدولره‌حمان، رێڤه‌به‌ری ساخله‌میا زاخۆ بۆ رۆژناما ئه‌ڤرۆ راگه‌هاند: “ل دووڤ پلانا وه‌زاره‌تا ساخله‌میا حكومه‌تا هه‌رێما كوردستانێ دێ شه‌ش رێڤه‌به‌ریێن ساخله‌میێ ل زاخۆ هێنه دامه‌زراندن، ژ وانا ژی: رێڤه‌به‌ریا گشتی یا ساخله‌میێ ل زاخۆ دێ هێته دامه‌زراندن و رێڤه‌به‌ریا ساخله‌میا قه‌زا زاخۆ ژی دێ هه‌بیت، هه‌روه‌سا رێڤه‌به‌ریا كاروبارێن خوه‌پاراستنا ساخله‌میێ دێ هێته دامه‌زراندن، دیسا رێڤه‌به‌ریا ساخله‌میا قه‌زا باتیفا ژی دێ هێته دامه‌زراندن و رێڤه‌به‌ریا به‌نكا خوینێ و رێڤه‌به‌ریا نۆشداریا داد ژی دێ هێنه دامه‌زراندن”.
ئاشكرا ژی كر كو پلان هاتیه دانان بۆ دابینكرنا كه‌لوپه‌ل و پێدڤین نۆشداری بۆ ساخله‌میا زاخۆ ب تایبه‌تی ژی بۆ نه‌خۆشخانه‌یێن گشتی ل زاخۆ و كارمه‌ند دێ بۆ هێنه دابینكرن و دێ سه‌نته‌رێ 122 یێ هه‌وارهاتنا بله‌ز ل زاخۆ هێته ڤه‌كرن كو حكومه‌تا هه‌رێما كوردستانێ گرنگیه‌كا زۆر دده‌ته زاخۆ دێ سه‌نته‌رێ نه‌خۆشیا ته‌لاسیمیایێ ژی ڤه‌كه‌ت ئه‌ڤه هه‌موو بۆ خزمه‌تكرنا وه‌لاتیێن زاخۆ دێ هێته كرن، دیسا بودجه‌كا تایبه‌ت بۆ ساخله‌میا زاخۆ دێ هێته دابینكرن.
د. شاكر زێده‌تر گۆت: “حكومه‌تا هه‌رێما كوردستانێ گه‌له‌ك گرنگیێ ب ساخله‌میا زاخۆ دده‌ت، پشكا هه‌وارهاتنێ ل زاخۆ هاتیه به‌رفره‌هكرن دگه‌ل چه‌ندین خزمه‌تێن دی یێن ساخله‌میێ بۆ زاخۆ هاتینه دابینكرن و پشكا تیشك و سونه‌رێ ژی هاتیه به‌رفره‌هكرن، داكو باشتر خزمه‌تا خه‌لكێ زاخۆ بهێته كرن”.
ناڤهاتی گۆتژی: “نوكه پێدڤیێن نۆشداری بۆ پشكا ته‌نگاڤیان ل زاخۆ یێ دهێنه دابینكرن و كار یێ دهێته كرن بۆ دابینكرنا میفراسه‌كێ بۆ پشكا تیشك و سونه‌رێ ل نه‌خۆشخانا ته‌نگاڤیان ل زاخۆ”.
د. شاكر عه‌بدولره‌حمان گۆتژی: “ساخله‌میا زاخۆ ژ 18 بنگه‌هێن ساخله‌میێ و سێ نه‌خۆشخانه‌یێن سه‌ره‌كی پێك دهێت، ئه‌و ژی نه‌خۆشخانا زاخۆ یا گشتی و نه‌خۆشخانا ته‌نگاڤیان و نه‌خۆشخانا ژن و زارۆكبوونێ نه دگه‌ل به‌نكا خوینێ و چه‌ند سه‌نته‌رێن ساخله‌میێ ژی ل زاخۆ هه‌نه، دیسا د پلانا وه‌زاره‌تا ساخله‌میا حوكمه‌تا هه‌رێمێ دایه چار بنگه‌هێن دی یێن ساخله‌میێ ل زاخۆ بهێنه ئاڤاكرن دگه‌ل سه‌نته‌ره‌كێ تایبه‌ت بۆ چاره‌سه‌ریا نه‌خۆشیێن دۆمدرێژ”.
