ل دهۆكێ بۆ جارا ئێكێ هه‌ژماره‌كا نشته‌رگه‌ریێن ده‌گمه‌ن هاتنه ئه‌نجامدان
دهۆك، له‌زگین جوقی:
رێڤه‌به‌رێ سه‌نته‌رێ ئازادی یێ نشته‌رگه‌ری و نه‌خۆشیێن دلی ل پارێزگه‌ها دهۆكێ دیار كر، بۆ جارا ئێكێ هه‌ژمارا نشته‌رگه‌ریێن ده‌گمه‌ن یێن دلی و مێشكی و ده‌ماران دهێنه ئه‌نجامدان، ئه‌و ژی د چارچوڤێ مه‌زنترین كۆنفرانسێ نێڤده‌وله‌تی یێ نۆشدارێن دلی دا ل هه‌رێما كوردستانێ.
د. عه‌لا ْ سالم، رێڤه‌به‌رێ سه‌نته‌رێ ئازادی یێ نشته‌رگه‌ری و نه‌خۆشیێن دلی ل پارێزگه‌ها دهۆكێ بۆ رۆژناما ئه‌ڤرۆ دیار كر، ل دهۆكێ كۆنفرانسه‌ك ل دۆر نه‌خۆشی و نشته‌رگه‌ریێن دلی ل هه‌رێما كوردستانێ هاته ئه‌نجامدان و گۆت: “د چارچوڤێ وی كۆنفرانسی دا هه‌ژماره‌كا جۆرێن نشته‌رگه‌ریێن دلی هاتنه ئه‌نجامدان، ب تایبه‌تی ژی یێن قه‌سته‌رێن دلی كو بۆ جارا ئێكی یه ئه‌و جۆرێن نشته‌رگه‌ریان ل دهۆكێ دهێنه كرن كو نشته‌رگه‌ریه‌ك بۆ نه‌خۆشه‌كێ 61 سالی هاتیه كرن، ئه‌و ژی بۆریێن دلی هشك ببوون و كارێ خوه ئه‌نجام نه‌ددان، هه‌كه ئه‌و جۆرێ نشته‌رگه‌ریێ بۆ ڤێ نه‌خۆشی نه‌هاتبا كرن، دا ره‌وشا وی گه‌له‌ك نه‌باش بیت، ئه‌ڤ نشته‌رگه‌ریه ب رێیا قه‌سته‌رێ هاته كرن”.
گۆتژی: “نشته‌رگه‌ریا ده‌مارا خوینێ یا زكی ژی ل دهۆكێ هاته ئه‌نجامدان كو نه‌خۆشه‌كێ 82 سالی ده‌مارا خوینێ یا زكێ وی مه‌زن بوویه، ب رێیا قه‌سته‌رێ نشته‌رگه‌ری دێ بۆ هێته ئه‌نجامدان”.
د. مه‌جید حسین، تایبه‌تمه‌ندێ نه‌خۆشیێن دل و هناڤان و قه‌سته‌را دلی ل دهۆكێ بۆ ئه‌ڤرۆ دیار كر، ژ ئه‌نجامێ كۆنفرانسێ نه‌خۆشی و نشته‌رگه‌ریێن دلی ل هه‌رێما كوردستانێ هه‌ژماره‌كا نشته‌رگه‌ریێن دلی یێن قه‌سته‌ران هاتنه ئه‌نجامدان، زێده‌باری ئه‌نجامدانا نشته‌رگه‌ریێن ده‌گمه‌ن یێن نه‌خۆشیێن دلی بێ سینگێ نه‌خۆشی بهێته ڤه‌كرن ب هاریكاریا تیمه‌كێ نۆشدارێن ئوردنی هه‌ژماره‌كا نشته‌رگه‌ریێن تایبه‌ت یێن مێشكی هاتینه ئه‌نجامدان، ب تایبه‌تی بۆ وان نه‌خۆشێن مه‌ترسیا خوینبه‌ربوونا دلی ل سه‌ر هه‌ی، ئه‌ڤ نشته‌رگه‌ریه ب رێیا ئامیرێن قه‌سته‌رێن دلی هاتنه كرن.
رێڤه‌به‌رێ سه‌نته‌رێ ئازادی یێ نشته‌رگه‌ری و نه‌خۆشیێن دلی ل پارێزگه‌ها دهۆكێ خویا كر، كۆنفرانسێ ئێكێ یێ نێڤده‌وله‌تی یێ نۆشدارین دلی ل هه‌رێما كوردستانێ، ل هولا كۆنفرانسان یا زانكۆیا دهۆك، ل رۆژێن 27 هه‌تا 29/10 هاته ئه‌نجامدان، د كۆنفرانسی دا نۆشدارێن ئوردنی و توركی و رۆژئاڤایێ كوردستانێ و ئه‌مریكی پشكداربوون، چه‌ندین سمینار و بابه‌تێن گرنگ ل سه‌ر نه‌خۆشیێن دلی هاتنه شرۆڤه‌كرن و چه‌ندین نشته‌گه‌ریێن ده‌گمه‌ن هاتنه ئه‌نجامدان.
