هه‌رمان سالح: دێ بۆ سه‌ركه‌فتنێ یاریێ كه‌ین
ئه‌ڤرۆ،
بڕیاره ئه‌ڤرۆ ده‌مژمێر سێ ئێڤاری هه‌شت یاری ژ چارچووڤێ گه‌ڕا چارێ یا خولا پلا نایابا كوردستانێ بۆ یاریا ته‌پاپێی بهێنه ئه‌نجامدان و هه‌ردو نوونه‌رێن پارێزگه‌هێ تیما یانا دهۆك و زاخۆ یاریێن خوه ب ئارمانجا سه‌ركه‌فتن و قه‌ربوویێ بكه‌ن.
ل یاریگه‌ها ده‌لال یانا زاخۆ دێ مێڤانداریا یانا سه‌ید سادق كه‌ت ئێك ژ تیمێن نوو هاتیه دناڤ خولا پلا نایاب دا، د یاریا بوری دا زاخۆ د دێربیێ پارێزگه‌هێ دا تووشی خوساره‌تیێ بوو و چار خالان رێزا ده‌هێ دهێت، سه‌ید سادق شه‌ش خال كۆمكرینه و رێزا چارێ دهێت ، ژلایێ خوه‌ڤه دهۆك دێ ب زاخه‌كا مه‌زن به‌ره ب هه‌ولێرێ رێكه‌فیت و بیته مێڤانا یانا شه‌قلاوه تیمه‌كا دی یه كو نوو هاتیه دناڤ خولێ دا، دهۆكێ شه‌ش خال كومكرینه و رێزا شه‌شێ دهێت هه‌مبه‌ری وێ خودانێن ئه‌ردی سێ خال هه‌نه و رێزا 11ێ دهێت.
لدور به‌رهه‌ڤیێن دهۆكێ د داخویانیه‌كێدا هه‌رمان سالح راهێنه‌رێ تیما ته‌پا پێی یا یانا دهۆكێ دیاركر كو بۆ یاریا ئه‌ڤرۆ سه‌ركه‌فتن كریه ئارمانج و هه‌موو یاریزان ب زاخه‌كا مه‌زن هێنه دناڤ یاریگه‌هێ دا تایبه‌ت پشتی سه‌ركه‌فتنا دێربیێ پارێزگه‌هێ ل گه‌ل زاخۆ، بتنێ ئێك یاریزان هنگاڤتی یه لێ گه‌شبینم دێ ئاسته‌كێ مه‌زن و ئه‌نجامه‌كێ باش ڤه‌گه‌ڕیێن، هه‌رچه‌نده ئه‌ركێ مه ب سانه‌هی نابیت لێ رژدیا یاریزانا و هیڤیێن مه گه‌شبینم دێ ئارمانجا خوه ب جهئینن.
