چامپیۆنزا ئه‌ڤ شه‌ڤه ده‌لیڤه‌یا دووماهیێ یه بۆ ده‌ربازبوونا هنده‌ك یانه‌یان
ئه‌ڤرۆ
دهێته چاڤه‌ڕێ كرن ئه‌ڤرۆ ژی هه‌شت یاریێن دی ژ گه‌ڕا چارێ یا قاره‌مانیا یانێن ئۆرۆپا قاره‌مانێن خولا یا ته‌پا پێی چامپیۆنزێ ژ قۆناغا كۆمان ب دروشمێ گه‌شكرنا هیڤییا بۆ ده‌ربازبوون به‌ره ب قۆناغا 16ێ هێته ئه‌نجامدان و بڤی ره‌نگی.
كۆما ئێكێ.
یانا پاریس سانجێرمان ب ئارمانجێن مه‌زن بۆ ناسناڤێ چامپیۆنزێ دێ بیته مێڤانا لایبزك یا ئه‌لمانی، یانا پارێسێ پێنگاڤه‌كا باش هاڤێتیه بۆ قۆناغا 16ێ ئه‌وا نوكه ب حه‌فت خالان سه‌رێ لیستێ دهێت، هه‌مبه‌ری وێ لایبزیك د دووماهی ده‌لیڤه‌دایه بۆ هه‌ڤڕكیا ئێك ژ پلێتێن ده‌ربازبوونێ ئه‌وا بێی خال رێزا چارێ دهێت، سانجێرمان ب چه‌كێ خوه یێ گران سه‌ركێشیا مێسی، مباپی، نه‌یمار، دی ماریا و فیراتی، هه‌مبه‌ری وێ لایبزك پشت گه‌رمیا جه‌ماوه‌رێ خوه گه‌شبینه بۆ سه‌ركه‌فتنێ، دیاریا بوری دا یانا فره‌نسی سه‌ركه‌فتن لسه‌ر لایبزكێ ب سێ گۆلان به‌رامبه‌ر دو گۆلان ئینابوو، ژلایێ خوه‌ڤه مانچسته‌ر ستی رژده چو خالان ژ ده‌ست نه‌ده‌ت و سه‌ركه‌فتنا مه‌زن لسه‌ر مێڤانا خوه دوباره‌بكه‌ت ده‌مێ ئه‌ڤ شه‌ڤه مێڤانداریا كلۆپ برۆج یا به‌لجیكا بكه‌ت، مان ستی شه‌ش خال كۆمكرینه و رێزا دویێ دهێت و كلۆپ ب چار خالان رێزا سێیێ یه كو هێشتا هیڤیێن ده‌ربازبوونێ ماینه، د یاریا بوری دا مان ستی پێنچ گۆلان به‌رامبه‌ر گۆله‌كێ سه‌ركه‌فتن تۆماركربوو.
كۆما دویێ.
یانا لیڤه‌رپۆل ل یاریگه‌ها خوه دێ بهێزا ستێرێن خوه محه‌مه‌د سه‌لاح وسادیۆ مانی و فرمینهو مێڤانداریا ئه‌تله‌تیكۆ مه‌درید یا ئسپانی كه‌ت ئێك ژ بهێزترین یاریێن ئه‌ڤ شه‌ڤه، یانا ئنگلێزی نه‌ه خال هه‌نه سه‌رێ لیستێ مكومكریه و هه‌ڤڕكا وێ چار خال هه‌نه و رێزا دویێ دهێت و پشتگه‌رمه ب هێرشبه‌رێ خوه لویس سۆارێزی، ژلایه‌كێ دووڤه ئه‌ی سی میلان یا ئیتالی د ره‌وشه‌كا هه‌ستیار دا دێ مێڤانداریا پۆرتۆ یا پورتۆگالی كه‌ت، میلان ژ سێ یاریێن بوری چو خال كۆمنه‌كرینه و رێزا دووماهیێ دهێت، لێ پۆرتۆ چار خال هه‌نه و رێزا سێیێ یه.
كۆما سێیێ.
یانا ئه‌یاكس ئه‌مستردام یا هوله‌ندایێ ب زاخه‌كا مه‌زن دێ بیته مێڤانا بۆرۆسیا دۆرتمۆند یا ئه‌لمانی، ئه‌یاكسێ نه‌ه خال كۆمكرینه و سه‌رێ لیستێ دهێت و مێڤاندارا وێ شه‌ش خال هه‌نه و رێزا دویێ یه و دێ بزاڤێ كه‌ت تۆلێن یاریا بوری ڤه‌كه‌ت پشتی ب چار گۆلان تۆشی خوساره‌تیێ كری، ژلایێ خوه‌ڤه سپۆرتینگ له‌شبۆنه د ده‌لیڤه‌كا باش دایه بۆ به‌رده‌وامیا هه‌ڤڕكیێ ئه‌وا دێ مێڤانداریا په‌شكتاش یا توركیایێ كه‌ت، خودانێن ئه‌ردی سێ خال هه‌نه و رێزا سیێ دهێت لێ په‌شكتاش چو خال كۆمنه‌كرینه و رێزا دووماهیێ دهێت و ب زه‌حمه‌ته قه‌ره‌بوویا یاریا بوری بكه‌ت ئه‌وا ب چار گۆلان تووشی خوساره‌تیێ بووی.
كۆما چارێ.
ریال مه‌درید یا ئسپانی ئێك ژ به‌ربژێرێن دی یێن ناسناڤی دێ مێڤانداریا شاختار دۆنێسك یا ئوكراینێ كه‌ت، ریالێ شه‌ش خال كۆمكرینه و سه‌رێ لیستێ دهێت، شاختار ب خاله‌كێ رێزا دووماهیێ دهێت، یاریا بوری دا یانا ئسپانی شیابوو ب پێنچ گۆلێن پاقژ سه‌ركه‌فتنێ تۆماربكه‌ت، ژلایه‌كێ دووڤه ئه‌نتر میلان یا ئیتالی هه‌مبه‌ری ئه‌ركه‌كێ ب زه‌حمه‌ت ده‌مێ دبیته مێڤانا شریف تراسبۆل یا مۆلدیڤیا ئێك ژ یانێن سه‌رنجراكێش د چامپیۆنزێ دا ئه‌وا نوكه ب شه‌ش خالان كێمتریا گۆلان ژ ریالێ رێزا دویێ دهێت و ئه‌نتر میلان ب چار خالان رێزا سێیێ یه، ئه‌ڤ یاریه دێ یاقه‌ربوویێ و گه‌شكرنا هیڤیێن ده‌ربازبوونێ بیت.
بۆ زانین هه‌موو یاری ده‌مژمێر 11 شه‌ڤ هێنه ئه‌نجامدان بتنێ هه‌ردو یاریێن میلان ل گه‌ل پۆرتۆ و ریال مه‌درید هه‌مبه‌ری شاختار دۆنێسك نه بیت ئه‌وێن ده‌مژمێر 8:45 شه‌ڤ هێنه كرن.
