كچێن زاخۆ كۆنترۆلا قاره‌مانیا ئیراقێ كرن
ئه‌ڤرۆ، عه‌لی حاجی:
كچێن باژێرێ زاخۆ ب ناسناڤێ قاره‌مانیا دایسۆن یا ئیراقێ هاتنه خه‌لاتكرن، پشتی شیاین ل رێزێن پێشییێ ب ده‌ستخوه‌ڤه بینن، د هه‌ڤڕكیێن واندا ئه‌وا دوهی ل سنورێ ئیدارا زاخۆ ب پشكداریا ده‌ه یانێن ئیراقێ بۆ دو به‌ریكانێن جودا كو پێكهاتی بوو ژ به‌ریكانا پایسكلان و غاردانێ هاتبوو ئه‌نجامدان.
یاریزانێن زاخۆ ئه‌وێن رێزا ئێكێ هه‌تا سێیێ ب ده‌ستخوه‌ڤه ئیناین ئه‌وژی دوعا فه‌یسه‌ل رێزا ئێكێ، نه‌جوا ئه‌حمه‌د رێزا دویێ و میدیا مه‌هدی رێزا سێیێ هاتن كو شیاین نمرێن پیڤایی د ئێكه‌م قاره‌مانی دا ل سه‌ر ئاستێ ئیراقێ تۆماركرین.
د داخویانیه‌كێدا به‌ختیار عوسمان سه‌رۆكێ ئێكه‌تیا ئیراقێ یا یاریا سیانی دایسۆن بۆ رۆژناما ئه‌ڤرۆ گوت: بۆ جارا ئێكێ یه قاره‌مانیه‌ك ل سه‌ر ئاستێ ئیراقێ و یا فه‌رمی بهێته ئه‌نجامدان و ب شێوه‌یێ سه‌ركه‌فتی و رێكخستی و پشته‌ڤانیا ئیدارا سه‌ربه‌خویا یا زاخۆ هاتبوو ئه‌نجامدان كو وه‌زیرێ وه‌رزش و لاون ل حوكمه‌تا ئیراقێ و رێڤه‌به‌رێ گشتی یێ وه‌رزشی یا هه‌رێمێ دۆپاتی ل سه‌ر پشته‌ڤانیێ و مێڤانداریا باژێرێ زاخۆ بۆ ڤێ قاره‌مانیێ كربوو، له‌ورا گه‌شبینم ده‌ستپێكا سه‌ركه‌فتنا چالاكیێن مه ژ زاخۆ و هه‌رێما كوردستانێ هاته نڤێسین و ده‌ستكه‌فته‌ك بۆ هه‌موو گه‌لێ ئیراقێ.
هه‌روه‌سا ناڤهاتی ئه‌وچه‌نده ژی دیاركر كو رێژا پشكداریێ ده‌ه یانا د قاره‌مانیه‌كێ دا بۆ جارا ئێكێ بهێته كرن نه كێمه به‌لكو گه‌شبینی یه كو به‌ره ب پێشڤه‌چوونێ و زێده‌تر پێشكه‌فتنێ یه له‌ورا هیڤییا مه ئه‌وه هه‌موو لایه‌ن و یانێن كوردستانێ و ئیراقێ پشته‌ڤانبن.
