سولتان عادل دێ ڤۆلیبۆلا ئافره‌تان چالاك كه‌ت
ئه‌ڤرۆ، زنار زوبێر:
راهێنه‌ر و یاریزانێ گه‌نج یێ ڤۆلیبۆلێ سولتان عادل دیاركر وی ل سه‌ر داخوازا كارگێریا یانا ئافره‌تێن دهۆك یا وه‌رزشی گرێبه‌ستا یانێ ئیمزا كریه و ل ماوێ بهێت دێ ده‌ست بكارێ خوه كه‌ت.
زێده‌تر سولتان عادل د دیداره‌كا تایبه‌ت دا بۆ رۆژناما ئه‌ڤرۆ گۆت: ل رۆژێن بهێت دێ ستافێ خوه یێ هاریكار به‌رهه‌ڤ كه‌م و دووڤدا دێ پلانه‌كا دووم درێژ پێشكێشی كارگێریا یانا ئافره‌تێن دهۆكێ كه‌ین پێخه‌مه‌ت دروستكرنا تیمه‌كا ڤۆلیبۆلێ ژ یاریزانێن ژیێ بچووك یا كچان بۆ پاشه‌روژا یانێ و ئارمانجا من یا سه‌ره‌كی ئه‌وه تا چار سالێن بهێت تیمه‌ك هه‌بیت هه‌ڤركیا قاره‌مانیێن كوردستانێ و ئیراقێ بكه‌ت كو ماوه‌یه‌كه ئه‌ڤ یاریه ل باژێرێ دهۆكێ به‌ر ب نه‌مانێ دچیت له‌ورا ئه‌م پێدڤی ب ده‌می نه بشێن تیمه‌كێ دروست بكه‌ین كو به‌ری نوكه چو یاریزان نه‌بن یێن ڤێ یاریێ.
هه‌ژی گۆتنێ یه سولتان عادل به‌ری نوكه یاریزانێ ڤۆلیبۆلا یانێن زاخۆ، هێرش و شنگار بوویه و ئه‌نجامێن باش ده‌ستخوه ڤه ئیناینه سه‌ر ئاستێ ئیراقێ و كوردستانێ و نوكه ماموستایێ وه‌رزشی یه ل په‌یمانگه‌ها ڤیا.
