بریكارێ وه‌زاره‌تا كاره‌بێ: كۆنتڕۆلا ب هه‌ده‌ردانا كاره‌با نیشتمانی دێ هێته كرن
هه‌ولێر، قائید میرۆ:
بڕیاره سالا بهێت كار ب سیسته‌مێ پیڤه‌رێن زیره‌كێن كاره‌بێ بهێته كرن و به‌رپرسه‌كێ وه‌زاره‌تا كاره‌بێ ژی دبێژیت: پڕۆسا گرێدانا پیڤه‌رێن زیره‌ك یا به‌رده‌وامه و هه‌تا نوكه زێده‌تری ملیۆن پیڤه‌ران ل سه‌رانسه‌ری هه‌رێما كوردستانێ هاتینه گرێدان.
كامل قه‌زاز، بریكارێ وه‌زاره‌تا كاره‌بێ بۆ رۆژناما ئه‌ڤرۆ دیار كر، حوكمه‌ت ل سه‌ر ته‌مامكرنا پرۆژێ پیڤه‌رێن زیره‌كێن كاره‌بێ یا رژده و گۆت: “بڕیاره ئه‌ڤ ساله قۆناغا ئێكێ ب دوماهی بهێت، ئه‌و ژی گرێدانا ئامیرێن پیڤه‌رێن زیره‌كه، به‌لێ ئه‌ڤ ساله ل هه‌موو ده‌ڤه‌ران كار ناكه‌ت، به‌لكو كاركرنا وان پیڤه‌ران ب شێوه‌یه‌كێ گشتی دێ كه‌ڤیته د سالا بهێت دا، هه‌تا نوكه زێده‌تری ملیۆن پیڤه‌ران هاتینه گرێدان و پڕۆسا گرێدانا پیڤه‌رێن زیره‌ك ژی یا به‌رده‌وامه بۆ وان جهێن پیڤه‌ر نه‌هاتینه گرێدان”.
كامل قه‌زاز گۆتژی: “پیڤه‌رێن زیره‌كێن كاره‌بێ ب شێوه‌یه‌كێ پێشكه‌فتی هاتیه چێكرن و دێ كۆنتڕۆلا ره‌وشا كاره‌بێ كه‌ت، ب تایبه‌تی ل هه‌رێما كوردستانێ رێژه‌یه‌كا زۆرا كاره‌بێ ب هه‌روه دچیت، به‌لێ پیڤه‌رێن زیره‌كێن كاره‌بێ ل دووڤ سیسته‌مه‌كێ پێشكه‌فتی هاتیه به‌رهه‌مئینان و كێمترین شاشی تێدا هه‌نه، ئه‌ڤه ژی دێ بیته ئه‌گه‌رێ كۆنتڕۆلكرنا كاره‌با نیشتیمانی و ئیدی چو كه‌سه‌ك نه‌شێت كاره‌بێ ژ ده‌رڤه‌ی پیڤه‌ری ببه‌ت”.
