ده‌ه یاسایێن چاڤی ل سه‌ر یاریزانێن به‌رشلونا سه‌پاندین
ئه‌ڤرۆ، زنار زوبێر:
هوسا دیاره هاتنا راهێنه‌رێ گه‌نج یێ یانا به‌رشلونا و ستێرا وێ یا به‌رێ چاڤی هێرناندز بۆ راهێنه‌راتیا تیمێ ل جهێ یێ لادای رونالد كومانی دێ چه‌ندین گوهۆرینان كه‌ت، ل دووڤ راپورته‌كا رۆژناما ئاس یا ئسپانی چاڤی ده‌ه یاسایێن نوو یێن رێكاری ل سه‌ر یاریزانێن تیما ته‌پا پێی سه‌پاندینه و به‌روڤاژی یێ پێگیریێ پێ نه‌كه‌ت دێ سزاده‌ت ئه‌وژی ئه‌ڤه‌ێن ل خوارێ نه.
1- پێدڤیه هه‌موو یاریزان به‌ری ده‌مێ ده‌ستنیشان كری یێ راهێنانان ب ده‌مژمێره‌ك و نیڤان ل یانێ ئاماده‌بن ئه‌ڤ بریاره هاته پێش ژ به‌ركو ل ماوێ بوری گه‌له‌ك هه‌لكه‌فتان دا یاریزانێن به‌رشه‌لونا ژ به‌ر ئه‌گه‌رێن جودا گیرودبوون ل ده‌مێ ئه‌نجامدانا راهێنانان دا كو پێدڤیه ب 90 خوله‌كا به‌ری ئه‌نجامدانا راهێنانان یاریزان ل یاریگه‌هێ ئاماده‌بن.
2- دیسان چاڤی هێرناندز دگه‌ل ستافێ خوه یێ هاریكار و نۆشدارێ تیمێ دێ ب دو ده‌مژمێران به‌ری راهێنانان ل یاریگه‌هێ ئاماده‌بن ئانكو ب نیڤ ده‌مژمێرێ به‌ری یاریزان بهێن داكو یاریگه‌ها راهێنانان به‌رهه‌ڤ بكه‌ن به‌ری یاریزان بگه‌هن.
3- پێدڤیه هه‌موو یاریزان پێكڤه رۆژانه ده‌مێ نان خارنێ ل یانێ ئاماده‌بن و ئێك جورێ خارنێ بخون و بێ جووداهی و ئه‌و خارن ژی دێ ل ژێر سه‌رپه‌رشتیا نوشدارێ یانێ یێ تایبه‌تمه‌ند خارنێ پێخه‌مه‌ت رێگری ل هه‌ر نه‌خوشیه‌كێ یان هنگافتنا یاریزانان.
4- ڤه‌گه‌راندنا سیاسه‌تا سزادانا یاریزانان ب كوژمێن دارایی، ئه‌ڤ بریاره هاته پێش پشتی چوونا راهێنه‌رێ به‌ری نوكه یێ به‌رشلونا لویس ئێنركی ژ سالا 2017 ئه‌ڤ سزایێن دارایی نه‌هاتینه بجهئینان ل سه‌ر یاریزانان ژ ئه‌گه‌رێ پێگیرینه‌كرن یان رێكارێن یانێ و راهێنه‌ری و گیروبوونا وان بۆ راهێنانان.
5- چاڤی بریاردایه ژ ئه‌گه‌رێ دووباره‌كرنا هه‌ر ره‌فتاره‌كێ كو بیته ئه‌گه‌رێ سزادانا یاریزانان و ئه‌گه‌رێ دووباره‌كرنا وێ دێ سزایێ وی دارایی بیته دوجاركی.
6- چاڤی هێرناندز بریاردایه هه‌موو یاریزان به‌ری ده‌مژمێر 12 شه‌ڤ ڤه‌گه‌رنه مالێن خوه و ئه‌و دێ ب چه‌ند رێنمایێن نوو ڤێ چه‌ندێ بجهئینت و دووڤچوونێ ل سه‌ر ڤێ خالێ كه‌ت و نابیت یاریزان تاكو دره‌نگی شه‌ڤ هاتن و چوونێ بكه‌ن تایبه‌ت ئه‌و دو رۆژێن به‌ری یاریان.
7- لدووڤ ئه‌و راپورتێن رۆژنامه‌ڤانی به‌لاف بووین چاڤی هێرناندز بریاردایه و هه‌موو یاریزان ژی ئاگه‌هداركرینه ئه‌و دێ پشتبه‌ستنێ ل سه‌ر وی یاریزانی كه‌ت یێ خوه زێده‌تر ماندی بكه‌ت و كار ل سه‌ر خوه بكه‌ت د یاریان و راهێنانان دا و به‌رێ خوه ناده‌ته ناڤێن یاریزانێن ستێر د تیمێ دا و ب ئێك ئاست دێ وه‌كهه‌ڤ بن یێ بشێت هه‌بوونا خوه دیاربكه‌ت.
8- چاڤی ستافێ راهێنه‌رێن خوه یێن هاریكار د یانا به‌رشلونا دا راسپاردینه زێره‌ڤانیێ و دووڤچوونا ره‌فتارێن یاریزانان بهێته كرن ژ ده‌رڤه‌ی یاریگه‌هێ كو هه‌ر ره‌فتاره‌كا خه‌له‌ت پێدڤیه ئه‌و دگه‌ل یاریزانی بهێته ئاگه‌هداركرن داكو كارتێكرنا خوه ل سه‌ر تیمێ نه‌كه‌ت.
9- هه‌روه‌سا بریاردایه چو راهێنانێن هێزی كو مه‌ترسیا هنگافتنا یاریزانان تێدابیت نه‌كه‌ن د ڤی ماوه‌ی دا دیسان ژ ده‌رڤه‌ی یاریگه‌هێ ژی یاریزان ئاگه‌هداركرینه چو كاران نه‌كه‌ن مه‌ترسیا هنگافتنێ ل سه‌ر بیت تایبه‌ت به‌ریكانه‌یێن پایسكلان ل ده‌ڤه‌رێن چیایی.
10- چاڤی یاریزانێن مه‌زن و خودان سه‌ربور یێن تیمێ ئاگه‌هداركرینه كو پێدڤیه ئه‌و بنه نموونه‌یا یاریزانێن گه‌نج بۆ چاڤلێكرنێ تایبه‌ت ژ ده‌رڤه‌ی یاریگه‌هێ و ل جهێن گشتی و رازی بین پشته‌ڤان وێنه‌یان ل گه‌ل بگرن و ئیمزایان بۆ وان بكه‌ن ده‌مێ ژ دهێته داخوازكرن.
