كلاسیكۆیا كوردستانێ د به‌رژوه‌ندیا زاخۆ دا ب دووماهی هات
ئه‌ڤرۆ،
تیما ته‌پا پێی یا یانا زاخۆ شیا كلاسیكۆیا كوردستانێ د به‌رژوه‌ندیا خوه دا ب دووماهی بینت پشتی ب سه‌ركه‌فتی ل سه‌ر مێڤانا خوه یانا هه‌ولێرێ ب گۆله‌كێ بێی به‌رامبه‌ر، د یاریا واندا ئه‌وا دوهی ژ چارچووڤێ هه‌ڤڕكیێن گه‌ڕا ده‌هێ یا خولا پلا نایابا ئیراقێ ل یاریگه‌ها زاخۆ یا نێڤده‌وله‌تی هاتیه كرن.
گۆلا خودانێن ئه‌ردی ژلایێ پێشه‌كارێ وێ یێ به‌رازیلی لۆكاس سانتۆس ب لێدانه‌كا فاولا ئێكسه‌ر د خوله‌كا 58ێ دا تۆماركر، بڤێ ئه‌نجامێ یانا زاخۆ شیا خوه بگه‌هینته رێزا شه‌شێ ب 18 خالان ژ پێنچ سه‌ركه‌فتن، سێ وه‌كهه‌ڤی و دو خوساره‌تیان، هه‌مبه‌ری وێ یانا هه‌ولێر ب حه‌فت خالان پاشڤه‌چوو رێزا 17ێ ب پێنچ خوساره‌تی، چار وه‌كهه‌ڤی ل گه‌ل سه‌ركه‌فتنه‌كێ، ئه‌وا یانا شورته ب 26 خالان سه‌رێ لیستێ دهێت، زه‌ورا ب 22 خالان رێزا دویێ، نه‌فت وه‌سه‌ت ب هه‌مان خال كێمتریا گۆلان رێزا سێیێ دهێت.
ئه‌مجه‌د وه‌لید یاریزانێ یانا زاخۆ سه‌ركه‌فتنا یاریا ل گه‌ل هه‌ولێرێ ب گرنگی و ب شه‌ش خالان دا زانین و گۆت: ژبه‌ركو ئه‌م یێن ل رێزبه‌ندیه‌كا هه‌ستیار و سێ خالێَن ئه‌م پێشڤه‌برین، هه‌روه‌سان پشته‌ڤانیا جه‌ماوه‌ری و رژدیا یاریزانان كو ئاسته‌كێ مه‌زن نیشان دا وه‌كر ئه‌م بشێن سه‌ركه‌فتنێ تۆماربكه‌ین، ب ئۆمێدین دێ به‌رده‌وامبین ل سه‌ر ئه‌ڤان ئه‌نجامان و هه‌ڤڕكیێ بۆ رێزێن پێشیێ كه‌ین.
