به‌رشه‌لۆنا و سیڤییا هه‌مبه‌ری ده‌لیڤا دووماهیێ بۆ ده‌ربازبوونێ نه
ئه‌ڤرۆ،
چاڤه‌ڕێ دهێته كرن ئه‌ڤرۆ هه‌شت یاریێن گه‌ڕا پێنجێ یا قۆناغا كۆما ژ چارچووڤێ قاره‌مانیا یانێن ئۆرۆپا قاره‌مانێن خولا چامپیۆنز لیگ بهێنه كرن ژبۆ مسۆگه‌ركرنا پلێت ده‌ربازبوونێ بۆ قۆناغا 16ێ پشتی هه‌ر چار یانێن بایرن میۆنخ، یۆڤانتۆس، لیڤه‌رپۆل و ئه‌یاكس ئه‌مستردام ده‌ربازبوونا خوه مسۆگه‌ر كری.
كۆما پێنجێ.
د یاریه‌كا پری هه‌ڤڕكی بۆ پلێتا دویێ یا ده‌ربازبوونێ یانا به‌رشه‌لۆنه یا ئسپانی ب سه‌ركێشیا راهێنه‌رێ خوه یێ نوو چاڤی هێرناندز دێ ده‌مژمێر 11 شه‌ڤ مێڤانداریا هه‌ڤڕكا خوه به‌نفیكا یا پورتۆگالی كه‌ت، یانا كاته‌لۆنی ب شه‌ش خالان رێزا دویێ و به‌نفیكا ب چار خالان رێزا سێیێ دهێت، سه‌ركه‌فتنا به‌رشه‌لۆنا ده‌ربازبوون دێ مسۆگه‌ر كه‌ت هه‌مبه‌ری وێ به‌نفیكا دێ بزاڤێ كه‌ت هه‌كه خاله‌كێ ب ده‌ستڤه بینت دێ هیڤیێن وێ گه‌ش مینن، ژلایێ خوه‌ڤه یانا بایرن میونخ یا ئه‌لمانی ئه‌وا 12 خال كۆمكرین و سه‌رێ لیستێ دهێت دێ بیته مێڤانا دینامۆكێڤ یا ئۆكراینێ خودانا خاله‌كێ و رێزا دووماهیێ دهێت، یانا ئه‌لمانی چو گڤاشتن ل سه‌ر نابن ژبه‌ركو ده‌ربازبوونا خوه مسۆگه‌ر كریه، ئه‌ڤ یاریه دێ ل ده‌مژمێر 9:45 شه‌ڤ هێته ئه‌نجامدان.
كۆما شه‌شێ.
دڤێ كۆمێ دا چو یانا پلێتا ده‌ربازبوونێ مسۆگه‌ر نه‌كریه له‌ورا دێ یاریێن پری هه‌ڤركی هێنه كرن، ل ده‌مژمێر 9:45 شه‌ڤ یانا ڤیاریال یا ئسپانی دێ مێڤانداریا مانچسته‌ر یونایتد یا ئنگلێزی كه‌ت، یانا ئنگلێزی ب حه‌فت خالان سه‌رێ لیستێ دهێت و خودانێن ئه‌ردی ب هه‌مان خال كێمتریا گۆلان رێزا دویێ دهێت ئانكو دێ بیته ئێك ژ بهێزترین یاریێن ئه‌ڤ شه‌ڤه دا، سه‌ركه‌فتنا ڤیاریالێ دێ نێزیكێ ده‌ربازبوونێ كه‌ت سه‌رباری سه‌ركه‌فتنا وێ ژی ئه‌و پێدڤی ب خوساره‌تیا ئه‌تلانتا هه‌یه بۆ گه‌شكرنا هیڤیێن خوه، لێ یانا مانچسته‌ر د ره‌وشه‌كا خراب دایه پشتی ئه‌نجامێن نه باش د خولا ئنگلێزی دا، لێ ستێرێن وێ وه‌كو كرستیانۆ رۆنالدۆ، پۆكبا، ماركۆس راشفۆرد و سانچۆ خودان سه‌ربۆرێن مه‌زنن د چامپیۆنزێ دا، ژلایه‌كێ دووڤه یانا ئه‌تلانتا یا ئیتالی ده‌مژمێر 11 شه‌ڤ بیته مێڤانا یۆنگ بۆیز یا سویسرایێ، ئه‌تلانتا ب پێنچ خالان رێزا سێیێ دهێت و خودانێن ئه‌ردی ب سێ خالان رێزا چارێ دهێت، ئانكۆ ئه‌تلانتا پێدڤی ب سه‌ركه‌فتنێ یه بۆ گه‌شكرنا هیڤیێن خوه.
كۆما حه‌فتێ.
كۆما دووماهی هیڤییا بۆ هه‌ر چار یانێن پشكدار، یانا سیڤییا یا ئسپانی ئه‌وا رێزا دووماهیێ ب سێ خالان دێ مێڤانداریا فۆلفسبۆرگ یا ئه‌لمانی كه‌ت ئه‌وا پێنچ خال كۆمكرین و رێزا سێیێ دهێت، یانا ئسپانی ده‌لیڤا دووماهیێ دایه بۆ پلێته‌كا دده‌ربازبوونێ و دڤێت سه‌ركه‌فتنێ تۆماربكه‌ت هه‌تا بگه‌هیته ئارمانجا خوه، یانا مێڤان تیمه‌كا ب سانه‌هی نابیت، د یاریا دویێ یا ڤێ كۆمێ دا رێدبۆل سالزبۆرگ یا نه‌مسایی خودانا سه‌رێ لیستێ ب حه‌فت خالان دێ بیته مێڤانا لیل یا فره‌نسی خودانا رێزا دویێ ب پێنچ خالان،سه‌ركه‌فتنا سالزبۆرگێ دێ پلێتا كۆما خوه مسۆگه‌ر كه‌ت، لێ خودانین ئه‌ردی د ده‌لیڤه‌كا زێرین دایه بۆ تۆماركرنا دیرۆكێ، هه‌ردو یاری دێ ل ده‌مژمێر 11ێ شه‌ڤ هێنه ئه‌نجامدان.
كۆما هه‌شتێ.
كۆپیتكا یاریێن ئه‌ڤ شه‌ڤ دا و ئێك ژ یاریێن دی یێن بهێز یاریگه‌ها ستامفۆرد برێد گیانا چێلسی یا ئنگلێزی دێ مێڤانداریا یۆڤانتۆس یا ئیتالی كه‌ت، چێلسی ب نه‌ه خالان رێزا دویێ دهێت و یانا ئیتالی 12 خال كومكرینه و سه‌رێ لیستێ دهێت و یاریا ئه‌ڤرۆ دێ بفه‌رمی ده‌ربازبوونا خوه پشتراسكه‌ت، لێ یانا ئنگلێزی ناهێلیت هیڤیێن خوه ژ ده‌ست بده‌ت و وه‌كهه‌ڤی ژی دێ ده‌ربازبوونا خوه مسۆگه‌ركه‌ت، د یاریه‌كا دی دا مالمۆ یا سویدی دێ مێڤانداریا زێنت پۆترسبۆرگ یا روسیایێ كه‌ت د یاریه‌كا بێ هیڤی بوون دا، مالمۆ بیێ خال رێزا دووماهیێ یه و زێنیت ب سێ خالان رێزا سێیێ ب سێ خالان دهێت.
