هه‌رمان سالح: دێ گوهۆرین هه‌بن و سه‌ركه‌فتن ئارمانجا مه‌یه
ئه‌ڤرۆ،
ئه‌ڤرۆ تیما ته‌پا پێی یا یانا دهۆكێ ب ژڤانه ل ده‌مژمێر دو یێ نیڤرۆ مێڤانداریا یانا كۆیه ب ئارمانجێن سه‌ركه‌فتنێ و ده‌ربازبوون بۆ قۆناغا هه‌شتێ یا قاره‌مانیا كۆپا كوردستانێ ژ چارچووڤێ هه‌ڤڕكیێن گه‌ڕا 16 ئه‌وا دێ ل یاریگه‌ها یانا دهۆكێ هێته كرن، ژلایه‌كێ دووڤه بڕیاربوو ئه‌ڤرۆ یانا سێمێلێ یاریێ ژ ده‌رڤه‌یی یاریگه‌ها خوه ببیته مێڤانا یانا رانیه ل یاریگه‌ها شه‌هید فرانسۆ حه‌ریری یا دویێ لێ هاته پاشئێخستن بۆ رۆژا چارشه‌مبی ژبه‌ر ئه‌نجامدانا یاریێن قاره‌مانیا رۆژئاڤا ئاسیا ل سه‌ر ئاستێ لاوان ئه‌وا نوكه هه‌ڤڕكیێن وێ ل هه‌ولێرا پایته‌خت دهێنه كرن.
لدور دووماهی به‌رهه‌ڤیێن تیما دهۆكێ بۆ ڤێ یاریێ هه‌رمان سالح راهێنه‌رێ تیمێ بۆ رۆژناما ئه‌ڤرۆ گوت: یاریه‌كا گرنگه و دڤێت مفایی ژ ئه‌رد و جه‌ماوه‌رێ خوه وه‌ربگرین و بكه‌ڤیته د خزمه‌تا تیمێ دا ژبۆ بده‌ستڤه‌ئینانا سه‌ركه‌فتنێ،بۆ ڤێ یاریێ دێ گوهۆرین هه‌بن دناڤ پێكهایتێ تیمێ دا ژبه‌ركو مه یاریه‌كا دی یا خولا كوردستانێ پشتی سێ رۆژێن دی، لێ رامانا وێ ئه‌و نینه بهێز ناهێنه د ناڤ یاریێ دا به‌لكو دێ باشترین شێوه به‌رهه‌ڤبین و ئارمانج و هیڤیێن مه ناسناڤێ كۆپا كوردستانێ یه.
