وه‌زاره‌تا كاره‌بێ: ده‌مژمێرێن دانا كاره‌با نیشتمانی دێ زێده بن
ئه‌ڤرۆ:
په‌یڤدارێ وه‌زاره‌تا كاره‌با حوكمه‌تا هه‌رێما كوردستانێ دیار كر، ژ ئه‌گه‌رێ نزمبوونا پلێن گه‌رمێ، رۆژانه داخوازی ل سه‌ر بكارئینانا كاره‌بێ ژلایێ وه‌لاتیێن هه‌رێما كوردستانێ ڤه زێده دبیت.
ئومێد ئه‌حمه‌د، په‌یڤدارێ وه‌زاره‌تا كاره‌با حوكمه‌تا هه‌رێما كوردستانێ خویا كر، نوكه وه‌لاتی ئامیرێن كاره‌بێ یێن خوه گه‌رمكرنێ بكار دئینن، له‌وما د ڤێ هه‌یڤێ دا داخوازی ل سه‌ر كاره‌بێ پێنج هزار مێگاوات ده‌ربازكرینه و ڤێ چه‌ندێ ژی وه‌كریه كو پێدانا كاره‌با نیشتمانی بۆ وه‌لاتیان بۆ 15 ده‌مژمێران د شه‌ڤ و رۆژه‌كێ دا كێم ببیت.
ئومێد ئه‌حمه‌د دبێژیت: بۆ پڕكرنا وێ كورتئینانا د كه‌رتێ كاره‌بێ دا دروستبووی، بڕیاره چار یه‌كه‌یێن دی یێن به‌رهه‌مئینانا كاره‌بێ بكه‌ڤنه كاری، داكو ده‌مژمێرێن دانا كاره‌با نیشتمانی بۆ وه‌لاتیان بهێنه زێده كرن، هه‌ر یه‌كه‌كا كاره‌بێ ژی زێده‌تر ژ ١٠٠ مێگاواتێن كاره‌بێ دێ به‌رهه‌م ئینیت و به‌رهه‌مئینانا كاره‌بێ بۆ چار هزار مێگاواتان دێ بلند بیت.
