ئه‌ڤرۆ د چامپیۆنزێ دا شه‌ش پلێتێن ده‌ربازبوونێ دێ ئێكلابن
ئه‌ڤرۆ.
چاڤه‌ڕێ یه ئه‌ڤرۆ ژی هه‌شت یاریێن دی یێن قۆناغا كۆمان ژ قاره‌مانیا یانێن ئۆرۆپا قاره‌مانێن خولا چامپیۆنز لیگ ده‌ربازبوون بۆ قۆناغا 16ێ ب ئارمانجێن ده‌ربازبوون و گه‌شكرنا هیڤیان بهێنه ئه‌نجامدان و بڤی ره‌نگی.
كۆما ئێكێ.
ژ گرنترین و بهێزترین یاریێن ئه‌ڤرۆ جه‌ماوه‌رێ وه‌رزشی چاڤه‌ڕێ دكه‌ت ل ده‌مژمێر 11ێ شه‌ڤه ده‌مێ یانا مانچسته‌ر ستی یا ئنگلێزی ل یاریگه‌ها خوه مێڤانداریا پاریس سانجێرمان یا فره‌نسی دكه‌ت، یانا ئنگلێزی سه‌رێ لیستێ ب نه‌ه خالان دهێت و یا فره‌نسی ب هه‌شت خالان رێزا دویێ یه، مان ستی ب وه‌كهه‌ڤی ژی ده‌لیڤا ده‌ربازبوونێ دێ مسۆگه‌ر كه‌ت لێ سانجێرمان پێدڤی ب سه‌ركه‌فتنێ هه‌یه بۆ پلێتا ده‌ربازبوونێ، دیسان هه‌ر ئه‌نجامه‌كی دی بیت هه‌ردو یانه ده‌ربازدبن ب مه‌رجه‌كی خوساره‌تیا كلۆپ برۆچ یا به‌لجیكی ئه‌وا ل رێزا سێیێ دهێت ب چار خالان كو ده‌لیڤا وێ یا دووماهیێ ل گه‌ل خودانێن ئه‌ردی یانا لایبزیك یا ئه‌لمانی مایه بۆ هیڤیێن قۆناغا 16ێ، پاریس سانجێرمان ب چه‌كێ گران دێ هێته دناڤ یاریگه‌هێ دا ب سه‌ركێشیا لیۆنێل مێسی، كلیان مپابی، نه‌یمار و دی ماریایی، هه‌مبه‌ری وێ كیڤێن دی برۆین، ره‌حیم ئسترلینگ، گۆندۆگان و رۆدرێگۆ هێزا مان ستی نه.
كۆما دویێ
د یاریه‌كا دی یا بهێز و چاره‌نڤیس دا یانا ئه‌تله‌تیكۆ مه‌درید یا ئسپانی دێ ل یاریگه‌ها خوه مێڤانداریا ئه‌ی سی میلان یا ئیتالی كه‌ت، ئه‌تله‌تیكۆ د كاودانه‌كێ خراب دایه و چو بژارده نینن ژبلی سه‌ركه‌فتنێ ژبۆ به‌رده‌وامیا هیڤیێن ده‌ربازبوونێ و دیسان دێ گۆه ل ده‌نگۆباسێن یاریگه‌ها ئانفێلد بیت ب هیڤیێن سه‌ركه‌فتنا لیڤه‌رپۆلێ، یانا ئسپانی چار خالان كۆمكرینه رێزا سێیێ یه و میلان ب خاله‌كێ رێزا چارێ دهێت هیڤیێن ده‌ربازبوونێ نه‌ماینه، ژلایه‌كێ دووڤه یانا لیڤه‌رپۆل یا ئنگلێزێ دێ مێڤانداریا پورتۆ یا پورتۆگالی كه‌ت، یانا ئنگلێزی ئه‌وا به‌ری ڤێ یاریێ ده‌ربازبوونا خوه مسوگه‌ركری ب 12 خالان سه‌رێ لیستێ دهێت، هه‌رچه‌نده خوساره‌تیا پۆرتۆ ژی هیڤیێن خوه ژ ده‌ست ناده‌ت و دبیت گه‌ڕا شه‌شێ و دووماهیێ دێ خودانا پلێتا دویێ ئێكلاكه‌ت، بۆ زانین هه‌ردو یاری ده‌مژمێر 11ێ شه‌ڤ هێنه ئه‌نجامدان.
كۆما سێیێ
دڤێ كۆمێ دا هه‌ردو یانێن سپۆرتینگ له‌شبۆنا یا پورتۆگالی و بورۆسیا دورتمۆند یا ئه‌لمانی دێ شه‌ڕی بۆ پلێتا دویێ یا ده‌ربازبوونێ كه‌ت پشتی یانا ئه‌یاكس ئه‌مسترام یا هوله‌ندی پلێتا ئێكێ مسۆگه‌ركری ب 12 خالان سه‌رێ لیستێ دهێت، سپۆرتیگ دێ مێڤانداریا بورۆسیا كه‌ت ب پشتبه‌ستنا جه‌ماوه‌رێ خوه بۆ سه‌ركه‌فتنێ و پێدڤی زێده‌تر دو گۆلانه، لێ سه‌ركه‌فتنا یانا ئه‌لمانی ب هه‌ر ئه‌نجامه‌كی دێ ده‌ربازبوونێ مسوگه‌ر كه‌ت، یاری ل ده‌مژمێر 11ێ شه‌ڤ هێته ئه‌نجامدان، ژلایێ خوه‌ڤه بۆ یانا ئه‌یاكس وه‌كو گه‌شت ل توركیێ یه و دێ بیته مێڤانا په‌شكتاش ئه‌وا بێی خال رێزا دووماهیێ دهێت، ئه‌ڤ یاریه ده‌مژمێر 9:45 شه‌ڤ هێته كرن.
كۆما چارێ.
بۆ تۆلڤه‌كرنێ و پشتراستكرنا ده‌ربازبوونێ ده‌مژمێر 11ێ شه‌ڤ یانا ریال مه‌درید یا ئسپانی دێ بیته مێڤانا یانا شریف تێراسبۆل یا مۆلدیڤیایێ، یانا ئسپانی نه‌ه خال كۆمكرینه و سه‌رێ لیستێ دهێت، خودانێن ئه‌ردی ب شه‌ش خالان رێزا سێیێ یه و دێ بزاڤێ كه‌ت دوباره سه‌ركه‌فتنا خوه ل سه‌ر ریالێ بینت و ده‌ربازبوونه‌كا مێژوویی د تۆمارا قاره‌مانیا چامپیۆنزێ دا بنڤێسیت، لێ ئارمانجێن تۆلڤه‌كرنێ و پشتراستكرنا ده‌ربازبوونێ د پلانا یانا شاهان دا یه، ژلایێ خوه‌ڤه ئه‌نتر مێلانا ئیتالی خودانا حه‌فت خالان و رێزا دویێ دهێت دێ مێڤانداریا شاختار دۆنێتسك یا ئۆكراین كه‌ت ئه‌وا ب خاله‌كێ رێزا دووماهیێ دهێت، سه‌ركه‌فتنا وێ ل سه‌ر شاختارێ و خوساره‌تیا یانا شیریف دێ ده‌ربازبوونێ مسۆگه‌ر كه‌ت، لێ هه‌ر ئه‌نجامه‌كێ دی د به‌رژوه‌ندیا وێ دا نینه، ئه‌ڤ یاریه ده‌مژمێر 9:45 شه‌ڤ هێته ئه‌نجامدان.
