سه‌رۆكێ یانا ئامێدیێ: قه‌ردارین و د شیان دا نینه تیما ته‌پا پێی ڤه‌گه‌ڕێت
ئامێدیێ، نه‌وزاد هلۆری
د داخویانیه‌كێدا سالار رێكانی سه‌رۆكێ یانا ئامێدیێ یا وه‌رزشی بۆ رۆژناما ئه‌ڤرۆ گۆت: ل سالا 1997ێ یانه هاتیه دامه‌زراندن ب كۆمه‌كا باش یا هه‌بوونا یاریێن وه‌رزشی ژوانا یاریا ته‌پا پێی ئه‌وا پشكداری خولا پلا ئێكا كوردستانێ كری، لێ مخابن ئه‌ڤه چه‌ند ساله هاتیه راوه‌ستاندن سه‌رباری مه یاریگه‌ه و یاریزان ژی هه‌نه بتنێ نه‌بوونا پشته‌ڤانیێ ئه‌و شیان نینن كو دوباره تیما خوه ڤه‌گه‌ڕێنن و هه‌رده‌مێ لایه‌نه‌كی خوه ل یانێ كره پشته‌ڤان گه‌شبینین دێ باشترین تیم هێته به‌رهه‌ڤكرن.
ژلایه‌كێ دووڤه ناڤهاتی ئه‌وچه‌نده ژی دیاركر د نوكه دا تیما ڤۆلی بۆلا كچان سه‌ر ئاستێ پلا دو یاریێ دكه‌ت و تیما باسكێت بۆلا كوڕان یا پله ئێك و هه‌روه‌سان تیمه‌كا سه‌ر ئاستێ ئیراقێ یا یاریا كیك بۆكسینگێ كو گه‌هشتیه هه‌ڤڕكیێن ئاسیا و چه‌ندین یاریزانێن قاره‌مان په‌یدابووینه و شیاینه سێ میدالیێن قاره‌مانیا عه‌ره‌بی ب ده‌ستخوه‌ڤه بینن ئه‌وا لڤێ دووماهیێ ل دهۆكێ هاتیه كرن.
ژلایه‌كێ دووڤه سالار رێكانی گۆت: گوهۆرین دناڤ كارگێریێ دا هاتینه كرن و ستاڤه‌كێ نوو و شاره‌زا كه‌ڤیته كاری،لێ ئاریشا مه یانێ چو داهاتی نینن تنێ پارێزگه‌ها دهۆكێ هه‌یڤانه كۆژمه‌كێ پاره‌یی بۆ مه دابیندكه‌ت زێده‌باری یانه یا قه‌رداره ب هیڤییا هاریكاریان كاروبارێن خوه برێڤه‌دبه‌ن، سه‌رباری ئه‌ڤان هه‌موو ئاسته‌نگان نوكه دا كار ل سه‌ر رێكخستنا پێنگاڤێن داهاتی دكه‌ین وه‌كو پلانێن مه و دێ ل گه‌ل راهێنه‌ر و یاریزانێن خوه كۆمبیت ژبۆ گه‌نگه‌شێن جودا ب هیڤیێن پێشئێخستنا وه‌رزشا ده‌ڤه‌را ئامێدیی.
