تێله‌ڤزیون و موبایلان په‌یوه‌ندی یێن جڤاكی ل ده‌ڤ زارۆیان كێم كرینه
دهۆك، رەڤین سالح:
تێله‌ڤزیون و موبایل ئێك ژ حاله تێن به‌ربه‌رلاڤه دناڤ زارۆیان دا، و كارتێكرن ل زارۆیان كریه بویه ئه‌گه‌رێ گیروبوونا ئاخفتنێ و دووركه‌تنا وان ژ په‌یوه‌ندیێن جڤاكی و نه‌تێكه‌لی كرن دگه‌ل زارۆیێن ژیێ خوه، تایبه‌تمه‌نده‌كا ده‌روونی دیاركر ل دور حاله‌تێن ئه‌و دبینن و ب دیتنا وێ 50% ئه‌ڤ ئاریشه یا زێده‌بووی ل ناڤ زارۆیان دا.
د.ئێهدا‌و جورج نوشدارا شاره‌زایا ده‌روونی یا زارۆیان ل سه‌نته‌رێ ساخله‌مییا ده‌روونی یا زارۆ سنێله‌یان ل دهوكێ دیاركر تێله‌ڤزیوون و موبایل كارتێكرنێ ل زارۆی دكه‌ن، وگۆت: دایك ده‌مێ شولێ مالێ دكه‌ت، دێ زارۆیێ خوه دانته به‌ر تێله‌ڤزیوونێ، و زارۆ یێ بێده‌نگ و ئارامه، بو وێ خوشه و دهێلیته هوسا، ده‌مێ ژیێ زارۆی دبیته سێ و چار سال، گیروبوونا ئاخفتنێ بو وان په‌یدا دبیت، هه‌روه‌سان چه‌ند هه‌یڤ بیت لێ هه‌كه ژ بچووكاتی ته هێلا پێش تێله‌ڤزیونێ یان موبایلێ، كارتێكرن ل سه‌ر مێشكێ وان و تێگه‌هشتنا واند بیت و كارتێكرن ل پێشكه‌فتنا زمانێ وی و پێشكه‌فتنا ئالیێ جڤاكی دكه‌ت، وه‌كو په‌یوه‌ندیا بهێز دگه‌ل دایكو بابان یان زارۆیێن ژیێ وان نینه، دیسان ئالیێ لڤینێ كارتێكرن لێ دبیت، چونكو هه‌ر قوناغه‌كا گه‌شه‌كرنا زارۆی لڤین هه‌نه وه‌كو چاوان ته‌پێ گریت یان یاریه‌كێ، هه‌روه‌سان، دووڤ ناڤێ خوه نازڤریت،ئه‌ڤه هه‌موو ل جه‌م زارۆیان یێ كێمه و گیرویه.
نوشدارا شاره‌زایا نه‌خوشیێن ده‌روونی یا زارۆیان خویاكر سالا ئێكێ بو دایكێ گه‌له‌كا بزه‌حمه‌ته لێ پێدڤی یه ده‌مێ ڤالا هه‌بیت، بو زارۆیێ خوه، وگوت: ده‌مێ شیرێ خوه بده‌تێ ته‌ماشه‌ی چاڤێن زارۆیێ خوه بكه‌ت، پێدڤی یه باب یێ هاریكاربیت دگه‌ل دایكێ، چونكو ل ڤێره ب به‌هانه‌یا هندێ كو باب یێ بكاریڤه مژووله، و هاریكاریا دایكێ ناكه‌ت، ئه‌ڤه ژی دبیته بارگرانی بو دایكێ هه‌موو ئه‌رك دكه‌ڤنه ل سه‌ر ملێن وێ، هنده‌ك جاران د رۆژێ دا ئه‌م سێ حاله‌تان دبین.
د.ئیهدا‌و جورج دازانین كارتێكرنا تێله‌ڤزیون و موبایل ل سه‌ر وان زارۆیێن ژچارسالیێ مه‌زنتر دێ بینی هه‌تا دره‌نگی شه‌ڤ ب موبایلێ ڤه مژوولن، وگوت: خه‌وا وان نه‌یا رێكو پێكه، و كارتێكرن ل سیسته‌مێ خارنا وان دبیت، لڤینا زێده ل جه‌م وان هه‌یه، هه‌روه‌سان فێری توندوتیژیێ دبن، دیسان ده‌مێ دگه‌هنه قوناغا خاندنێ زه‌حمه‌تیا خاندنێ ل جه‌م وان په‌یدا دبیت.
نوشدارا شاره‌زایا نه‌خوشیێن ده‌روونی یا زارۆیان دیاركر چاره‌سه‌ریا ڤان حاله‌تان ده‌سپێكێ پێدڤی ب هشیاركرنا دایك بابایه ، وگوت: پێدڤییه ئه‌م وێ هشیاركرنێ بو دایك و بابا بێژین كو ڤان ئه‌گه‌ران یا وه ل زارۆیێ وانكری، هنده‌ك جاران ئه‌م پشكنینا خوینێ بو دكه‌ین كا ئاریشه‌ك هه‌یه، هه‌كه زارۆ مه‌زنتر بن ئه‌م روینشتنێن ده‌روونی بو دكه‌ین، گروپ هه‌نه، هه‌كه دایك و باب هاریكار نه‌بن زارۆیێ وان مفای چاره‌سه‌ریێ نابینت، چونكو هنده‌ك جاران دایك و باب خه‌مساریێ دكه‌ن زارۆیێ خوه نائینه سه‌ره‌دانێ یان ده‌رمانێن وان دروست ناده‌نێ، ب دیتنا من ل دووڤ حاله‌تێن ئه‌م دبینن 50% ئه‌ڤ حاله‌تێ ب كارئینانا تێله‌ڤزیوون و موبایل ل ناڤ زارۆیان زێده‌بوویه.
