ئه‌مریكا: دڤێت رۆسیا ده‌ست ژ ئالۆزكرنا رۆژهه‌لاتێ ئورۆپا به‌رده‌ت
ب، سه‌رجان مه‌حمود:
ئانتۆنی بیلینكن وه‌زیرێ ده‌رڤه یێ ئه‌مریكا راگه‌هاند كو ئه‌و ژ نێزیكڤه دووڤچوونا ره‌وشا ئوكرانیا و به‌رهه‌ڤیێن رۆسیا ل سه‌ر سنورێ ئوكرانیا دكه‌ن و گۆت: (ل دووڤ راپۆرتێن ل به‌ر ده‌ستێ مه رۆسیا ل سنورێ ئوكرانیا به‌رده‌وام د ناڤ بزاڤان دایه و بنگه‌هێن سه‌ربازی دروست دكه‌ت و ئه‌م ب چو ره‌نگه‌كێ بزاڤێن یه‌ك ئالی یێن رۆسیا ل هه‌مبه‌ر ئوكرانیا قه‌بوول ناكه‌ین و د كۆمبوونا حه‌فتیا بهێت یا وه‌زیرێن ده‌رڤه یێن هه‌ڤپه‌یمانیا ئه‌تلانتیك (ناتۆ) دا دێ مژارا رۆسیا و ره‌وشا ئوكرانیا ب باشی هێته نرخاندن و ب چو ره‌نگه‌كێ ئه‌م رێ ناده‌ین كو رۆسیا ئاخا ئوكرانیا داگیر بكه‌ت، ئه‌و یه‌ك دێ بیته ئه‌گه‌رێ روودانا شه‌ره‌كی نوو و د به‌رژه‌وه‌ندیا رۆسیا دا نابیت).
هه‌ر د ڤێ مژارێ دا سیرگیێ لاڤرۆڤ وه‌زیرێ ده‌رڤه یێ رۆسیا راگه‌هاند كو چو بزاڤه‌كا وان یا نه‌ئاسایی ل سه‌ر سنورێ ئوكرانیا نینه و دڤێت ئوكرانیا پرسێن خوه یێن ناڤخوه‌یی ب دیالۆگێ چاره‌سه‌ر بكه‌ت و گۆت: (ناتۆ و ئه‌مریكا پشتی تێكدان و ئالۆزكرنا ره‌وشا گه‌له‌ك وه‌لاتان ل رۆژهه‌لاتا ناڤین، ئه‌مریكا لاتین، سووریێ و لیبیا نها ژی هه‌ول دده‌ن ده‌ستێوه‌ردانێ د كاروبارێن ناڤخوه‌یی یێن ئوكرانیا دا بكه‌ن و سه‌ربازێن خوه ل سنورێن مه بجه بكه‌ن و بۆ برێڤه‌برنا پلانێن خوه یێن كرێت ژی مه ب ئالۆزكرنا ره‌وشا ئوكرانیا تۆمه‌تبار دكه‌ن، لێ د راستی دا ئه‌مریكا و ناتۆ دخوازن بنگه‌هێن خوه ل ئوكرانیا دروست بكه‌ن و ئه‌م ژی وه‌ك رۆسیا ب چو ره‌نگه‌كێ رێ ناده‌ین ئه‌مریكا و ناتۆ ل ئوكرانیا و ده‌ریا ره‌ش بنگه‌هێن سه‌ربازی دروست بكه‌ن و جاره‌كا دی هۆشداریێ دده‌ینه ئوكرانیا كو نه‌بنه ئه‌گه‌رێ هندێ ئه‌مریكا و ناتۆ ب به‌هانا هنده‌ك ئالۆزیان بنگه‌هێن سه‌ربازی دروست بكه‌ن یان ژی ده‌ستێوه‌ردانێ بكه‌ن، ئه‌و یه‌ك ب چو ره‌نگه‌كێ ناهێته قه‌بوولكرن و هه‌كه ئوكرانیا كاره‌كێ وه‌سا ب مه‌ترسیێ بكه‌ت رۆسیا دێ ب توندی به‌رسڤا ئوكرانیا ده‌ت و هه‌ر تشته‌ك ژی روو بده‌ت ئوكرانیا و ئه‌مریكا به‌رپرسن).
