ئاكرێ بۆ سه‌رێ لیستێ و سێمێل و به‌رده‌ره‌ش بزاڤێن خوه قۆرتالكرنێ كه‌ن
ئه‌ڤرۆ،
ئه‌ڤرۆ ده‌مژمێر دو پشتی نیڤرۆ هه‌رسێ یانێن پارێزگه‌ها دهۆكێ تیما یانا ئاكرێ، سێمێل و به‌رده‌ره‌ش یاریێن خوه یێن گه‌ڕا شه‌شێ ژ چارچووڤێ هه‌ڤڕكیێن خولا پلا ئێكا كوردستانێ ده‌ربازبوون بۆ پلا نایاب ئه‌نجامبده‌ن و یانا گاره دێ دڤێ گه‌ڕێ دا یا چاڤه‌ڕێ كری بیت.
ل باژێرێ كه‌ركووكێ تیما یانا سێمێلێ دێ بیته مێڤانا یانا خاك، یانا پارێزگه‌هێ لبن گڤاشتنێن مه‌زن دایه پشتی ئه‌نجامێن لاواز تۆماركرین كو ژ چار یاریان دو خوساره‌تی و دو وه‌كهه‌ڤی ئیناینه و رێزا حه‌فتێ دهێت ب دو خالان، ئه‌ڤچه‌نده ژی نه لدووڤ ئارمانجا كارگێریا یانێ و هیڤی خوازیا جه‌ماوه‌رێ وێ دایه كو بوو ئه‌گه‌ر راهێنه‌رێ خوه ب گوهۆرن و ئاشتی مسته‌فا راهێنه‌رێ به‌رنیاس یێ پارێزگه‌هێ ل جهی وی ب دانن، لێ ئه‌ڤ یاریه دڤێت یا قه‌ره‌بووكرنێ بیت ئه‌گه‌ر سێمێلێ بڤێت هیڤیێن ده‌ربازبوونێ ژ ده‌ست نه‌ده‌ت.
ژلایێ خوه‌ڤه یانا ئاكرێ دێ مێڤانداریا یانا پێشه‌سازی كه‌ت ئێك ژ یاریێن بهێز بۆ نوونه‌را دویێ یا پارێزگه‌هێ، ئاكرێ ب هه‌شت خالان رێزا سێیێ دهێت بتنێ سێ یاری ئه‌نجامداینه و هه‌شت خال كۆمكرینه هه‌مبه‌ری وێ یانا مێڤان شه‌ش خال هه‌نه و رێزا چارێ دهێت، ده‌لیڤه‌كا باش د ده‌ستێ كوڕێن ئاكرێ دانه بۆ به‌رده‌وامیا هه‌ڤڕكیێ به‌ره ب سه‌رێ لیستێ ژبه‌ركو خودانا رێزا ئێكێ هه‌شت خال هه‌نه.
ژلایه‌كێ دووڤه یانا به‌رده‌ره‌ش دێ شورجه یا كه‌ركووكی مێڤان كه‌ت، نوونه‌را سێیێ د رێزبه‌ندیه‌كا خراب دایه كو بتنێ خاله‌ك هه‌یه ژ سێ یاریان و رێزا هه‌شتێ و به‌ری دووماهیێ دهێت، هیڤیێن وێ د لاوازن هه‌مبه‌ری تیما كه‌ركووكی ئه‌وا هه‌شت خال هه‌ین و رێزا دویێ دهێت لێ دێ بزاڤێ كه‌ت دناڤ ئه‌رد و جه‌ماوه‌رێ خوه دا ئه‌نجامه‌كێ باش ده‌ستڤه بینت.
