ب په‌نه‌لتیه‌كێ زاخۆ سێ خال ژ ده‌ست دان
ئه‌ڤرۆ،
تیما ته‌پا پێی یا یانا زاخۆ سێ خالێن گرنگ د ناڤ ئه‌رد و جه‌ماوه‌رێ خوه ژ ده‌ست دان پشتی ل گه‌ل مێڤانا خوه یانا زه‌ورا یا به‌غدایی تووشی خوساره‌تیێ بووی ب گۆله‌كێ بێی به‌رامبه‌ر، د یاریا واندا ئه‌وا دوهی ژ چارچووڤێ هه‌ڤڕكیێن گه‌ڕا 12ێ یا خولا پلا نایابا ئیراقێ ل یاریگه‌ها زاخۆ یا نێڤده‌وله‌تی هاتیه كرن.
دنیڤا ئێكێ دا یاریزانێن زاخۆ ده‌ست ب گڤاشتنان كرن و شیان كونترۆلێ ل سه‌ر یاریگه‌هێ بكه‌ن و چه‌ندین ده‌لیڤێن گۆلكرنێ ژ ده‌ستدان، ژ نشكه‌كێ ڤه و د خوله‌كا 36ێ دا دادڤانێ یاریێ پیشه‌كارێ زاخۆ برونۆ ئۆلیڤێرا ب كارتا سۆر دوورخست ئه‌وا ئه‌ڤ نیڤه بێی گۆل ب دووماهی هاتی، د نیڤا دویێ دا یانا زاخۆ ب نه‌ه یاریزانان هاتنه د ناڤ یاریێ دا هه‌مبه‌ری وێ تیما مێڤان هه‌موو بزاڤكرن كو مفایی ژ كێماتیا زاخۆ وه‌ربگریت تا خوله‌كا 56ێ شیان گۆلا پێشكه‌فتنێ ب لێدانه‌كا په‌نه‌لتیێ بینن ئه‌وا ژلایێ پیشه‌كارێ خوه یێ جه‌زائیری لهواری ته‌ویل ڤه هاتیه تۆماركرن، پشتی ڤێ گۆلێ یانا زاخۆ گڤاشتنێن مه‌زن ل سه‌ر گۆلا مێڤان كرن لێ هه‌موو بێ ئه‌نجام بوون،د ماوێ هه‌ردو نیڤان دا ژبه‌ر نه‌رازیبوونا جه‌ماوه‌ری ل سه‌ر بڕیارێن دادڤانی سێ جاران یاری هاتبوو راوه‌ستاندن و دنیڤا دویێ دا ده‌ه خوله‌ك بۆ ده‌مێ زێده‌كری هاتبوونه بلندكرن لێ یاری ب سه‌ركه‌فتنا زه‌ورا ب گۆله‌كێ ب دووماهی هات.
عه‌بدولوه‌هاب ئه‌بولهێل راهێنه‌رێ تیما زاخۆ ئه‌گه‌رێن خوساره‌تیێ بۆ دادڤانێ یاریێ ڤه‌گه‌ڕاند و گوت: تیما مه گه‌له‌ك باشتر بوو ژ زه‌ورا و هه‌موو یاریزانا ئاسته‌كێ مه‌زن نیشان دا لێ مخابن دادڤانێ یاریێ خوه‌شی بۆ جه‌ماوه‌ری و یاریزانا نه هێلا كو ب شێوه‌كێ بله‌ز كارته‌كا سۆر یا نه دروست دا پیشه‌كارێ مه برونۆیی ئه‌وا كارتیكرنا مه‌زن یا نه‌رێنی ل سه‌ر ئاستێ تیمێ كری و جه‌ماوه‌ر ژ تۆره‌بووین، هه‌كه دادڤان ب دروستی دووڤ چووبا چو كارت پێدڤی نه‌بوون لێ مخابن بوو ئه‌گه‌ر نه‌هێلا زاخۆ سه‌ركه‌فتنێ تۆماربكه‌ت، هیڤییا مه ئه‌وه ئێكه‌تیا ته‌پاپێی یا ئیراقێ دووڤچوونا ڤیدیویا كارتا سۆر بكه‌ت كو بوو ئه‌گه‌ر جه‌ماوه‌ر ژی تۆره‌بیت و تیما مه خوساره‌ت بیت.
ژلایه‌كێ دووڤه یانا نه‌وروز تووشی خوساره‌تیێ بوو ل گه‌ل ئه‌مانه‌ت به‌غداد ب گۆله‌كێ بێی به‌رامبه‌ر، بڤێ ئه‌نجامێ یانا زاخۆ بشێوه‌كێ به‌روه‌خت پاشڤه چوو رێزا حه‌فتێ ب 19 خالان و زه‌ورا ب 28 خالان رێزا سێیێ دهێت، نه‌وروز ب ده‌ه خالان رێزا 15ێ و هه‌ولێر ب هه‌شت خالان رێزا 17ێ دهێن.
