سكرتێرێ گشتی یێ ناتۆ ب توندی هۆشداریێ دده‌ته رۆسیا
ب، سه‌رجان مه‌حمود:
ئۆلاف شولز شیره‌تكارێ نوو یێ ئه‌لمانیا و یان ستۆلتێنبێرگ سكرتێرێ گشتی یێ هه‌ڤپه‌یمانیا ئه‌تلانتیك (ناتۆ) ل بروكسه‌لێ ل ناڤه‌ندا ناتۆ كۆمبوونه‌ك سازكرن و تێدا ره‌وشا وه‌لاتێن ئه‌ندام د ناڤ رێزێن ناتۆ دا و په‌یوه‌ندیێن ل گه‌ل ئوكرانیا و رۆسیا گه‌نگه‌شه كرن و پشتی كۆمبوونێ سكرتێرێ گشتی یێ ناتۆ راگه‌هاند كو ئه‌و به‌رده‌وام دووڤچوونا ره‌وشا وه‌لاتێن ئه‌ندامێن ناتۆ دكه‌ن و هه‌ول دده‌ن د هه‌ر واری دا سیسته‌مێ به‌رگریێ یێ وه‌لاتێن ئه‌ندام بهێزتر بكه‌ن و گۆت: (هه‌ر گه‌ف و ئێرشه‌كا بۆ سه‌ر وه‌لاته‌كی ئه‌ندام دهێته واته‌یا گه‌ف ل هه‌موو ناتۆیێ و بۆ ڤێ چه‌ندێ بۆ پاراستنا هه‌موو وه‌لاتێن ئه‌ندام د ناڤ سیسته‌مه‌كی دا كار دكه‌ین و هه‌ماهه‌نگیا مه د ئاسته‌كی بلند دایه).
سكرتێرێ گشتی یێ ناتۆ هه‌ر وه‌سا راگه‌هاند ژی كو گه‌فێن رۆسیا بۆ سه‌ر ئوكرانیا ب چو ره‌نگه‌كێ ناهێته قه‌بوول كرن و گۆت: (رۆسیا داخواز ژ مه كریه كو ئوكرانیا و جۆرجیا نه‌بنه ئه‌ندام د ناڤ رێزێن ناتۆ دا لێ داخوازیێن روسیا ره‌وا نینن، ئه‌م ل دووڤ به‌رنامێ خوه بزاڤێ دكه‌ین و پاراستنا ئوكرانیا ژی بۆ مه گرنگه و ئه‌م ناهێلین رۆسیا مه‌یدانا ده‌ستهه‌لاتا خوه به‌رفره‌هتر بكه‌ت و بۆ ڤێ چه‌ندێ دڤێت رۆسیا ده‌ست ژ سیاسه‌تا خوه یا توند ل دژی ئوكرانیا به‌رده‌ت و هه‌موو پرسێن هه‌ی ژی دڤێت ب رێیا دیالۆگێ و ل دووڤ قانوونێن نێڤده‌وله‌تی چاره‌سه‌ر بكه‌ت).
ل هه‌مبه‌ر ئاخڤتنا سكرتێرێ گشتی یێ ناتۆ، سیرگێی لاڤرۆڤ وه‌زیرێ ده‌رڤه یێ رۆسیا ژی راگه‌هاند كو ئه‌و چاڤه‌رێ دكه‌ن ناتۆ خوه ژ سنورێ ئوكرانیا دوور بكه‌ت و نه‌بیته پشكه‌ك ژ ئالۆزیێن ل ده‌ڤه‌رێ و گۆت: (به‌ری نها مه داخواز ژ ناتۆ كربوو كو بریارا سالا 2008 یا ناتۆ د ده‌ربارێ وه‌رگرتنا ئوكرانیا و جۆرجیا د ناڤا رێزێن ناتۆ دا هلوه‌شینیت و هه‌كه ناتۆ ل سه‌ر بریارا خوه رژد بیت دێ بیته سه‌ده‌مێ دروستبوونا ئالۆزیێن دژوارتر و بێگومان دێ به‌رسڤا مه ژی گه‌له‌ك دژوار بیت و ئه‌م جاره‌كا دی دوپات دكه‌ین كو ئه‌نجامێن وێ چ دبیت بلا ببیت ئه‌م ناهێلین ناتۆ ببیته هه‌ڤسنۆرێ مه و دڤێت د زووترین ده‌م دا بزاڤێن سه‌ربازی یێن ناتۆ ل سنورێ ئوكرانیا نه‌مینن).
