سێ میدالیێن برۆنزی به‌رهه‌مێ لاوێن زاخۆ د قاره‌مانیا ئیراقێ دا بوو
ئه‌ڤرۆ،
تیما لاوێن یانا زاخۆ ب سێ میدالیێن برۆنزی ژ قاره‌مانیا ئیراقێ بۆ یاریا خۆلێگدانا ئازاد ژ باژێرێ به‌غدا ڤه‌گه‌ڕیان، پشتی شیاین رێزێن سێیێ بۆ كێشێن جودا ب ده‌ستڤه بینن و دو یاریزان ده‌ربازی تاقیكرنێن دووماهیێ بۆ هه‌لبژارتیێ ئیراقێ بوون،د هه‌ڤڕكیێن واندا ئه‌وا ل باژێرێ به‌غدا ب پشكداریا 12 یانێن ئیراقێ هاتیه كرن.
عه‌لی ته‌یب راهێنه‌رێ تیما لاوێن زاخۆ بۆ رۆژناما ئه‌ڤرۆ گوت: پشتی هه‌ڤڕكیه‌كا دژوار دناڤبه‌را یاریزانێن مه و یێن یانێن دی یێن ئیراقێ سێ یاریزانێن لاوێن زاخۆ گه‌هشتنه قۆناغا دووماهیێ و ب میدالیا برۆنزی هاتنه خه‌لاتكرن پشتی ل رێزبه‌ندیا سێیێ هات ئه‌وژی، دلێر محه‌مه‌د زه‌كی بۆ كێشا 61كگم، محه‌مه‌د وه‌سفی بۆ كێشا 71 كگم و ئه‌مین عه‌بدولره‌حمان بۆ كێشا 79 كگم كو هه‌ڤڕكیه‌كا بهێز ل گه‌ل هه‌رسێ یانێن بهێز سه‌ر ئاستێ ئیراقێ ئه‌وژی دیوانیه، ئه‌مانه‌ت به‌غدا و ئه‌عزه‌میه ئه‌وێن یاریزانێن هه‌لبژارتیێ ئیراقێ ل گه‌ل تیمێن وان هه‌ین.
ژلایه‌كێ دووڤه ناڤهاتی گوت: ئه‌ڤه پشكداریا ئێكێ بوو یا یاریزانێن مه یێن لاوان ل سه‌ر ئاستێ ئیراقێ و ژبلی رێزا سێیێ هه‌ردو یاریزانێن مه دلێر محه‌مه‌د و ئه‌مین عه‌بدولره‌حمان بۆ تاقیكرنێن دووماهیێ یێن هه‌لبژارتیێ ئیراقێ هاتینه داخازكرن ژبه‌ر ئاست و شیانێن وان دناڤ قاره‌مانیێ دا، هه‌رچه‌نده ژبه‌ركو یاسایه‌كا نوو هاتبوو رێكخستن ئه‌ڤچه‌نده ژی گوهۆرینه‌كا نوو كو یاریزانێن مه كه‌ڤتینه دناڤ هه‌ڤڕكیان دا، لێ یا گرنگ مفایه‌كێ گه‌له‌ك باش ژێ هاته وه‌رگرتن و بۆ سالا بهێت گه‌شبینم زێده‌تری شه‌ش یاریزانێن مه دێ هه‌ڤڕكیێ بۆ رێزێن ئێكێ كه‌ن.
