یانا زاخۆ ب داتا مه‌زاختیێن هه‌یڤانه دیاردكه‌ن
ئه‌ڤرۆ، عه‌لی حاجی:
د پرێس كۆنفرانسه‌كێ دا سه‌رۆكێ یانا زاخۆ یا وه‌رزشی بۆ رۆژناما ئه‌ڤرۆ دیاركر پشتی ده‌ست ب كاربوونا كارگێریا نوو دێ هه‌یڤانه داهات و مه‌زاختیێن خوه بۆ هه‌موویان دیاركه‌ین ب شه‌فافیه‌ت و بڕیارا چوونا جه‌ماوه‌ری بۆ یاریگه‌هێ ب پلێتان بۆ شێوه‌كێ ده‌مكی هاتیه راگرتن.
زێده‌تر بلند شه‌فیق گوت: ئه‌و كارێ ئه‌م دكه‌ین دێ هه‌موو جه‌ماوه‌ر ئاگه‌هداربن تایبه‌ت یێن مه‌زاختیێن دهێنه كرن و ئێكه‌م داتایا هه‌یڤا ده‌ه كو ده‌ستپێكا كاربوونا مه‌یه بڤی ره‌نگی بوون، بۆ تیما ته‌پا پێی یا خولا ئیراقێ 87 ملیۆن دینار وه‌كو مووچه هاتینه پارڤه‌كرن، تیما خولا كوردستانێ 26 ملیۆن و 450 هزار دیناربوون، تیما باسكێت بۆلێ 12 ملیۆن و850 هزار دینارا هاتیه مه‌زاختن، بۆ هه‌ردو هه‌یڤێن چڕیا ئێكێ و دویێ دگه‌هنه 252 ملیۆن دیناران، تێچوویێ تیمێن مه بۆ ده‌رڤه‌یی یاریگه‌هێ دبنه 61 ملیۆن دینار، سه‌رجه‌مێ گشتی یێ مووچه و خه‌رجیاتا بۆ هه‌ردو هه‌یڤێن بوری دگه‌هنه 313 ملیۆن دیناران، لدور نۆژه‌نكرنا یاریگه‌هێ هه‌تا نوكه كار ل سه‌ر به‌رده‌وامه و هه‌رده‌مێ ب دووماهی هات دێ ل گه‌ل لژنا په‌یوه‌ندیدار كۆنگره‌كێ رۆژنامه‌ڤانی دانین هه‌موو ئامارا دیاركه‌ین.
لدووماهیێ ناڤهاتی دیاركر پشتی نه‌رازیبوونا جه‌ماوه‌رێ وه‌رزشی ل سه‌ر بڕیارا مه یا سیسته‌مێ پلێتان بۆ چوونا ژورا یاریگه‌هێ ئه‌م ل گه‌ل سه‌رپه‌رشتێ ئیداره‌یا زاخۆ به‌رێز گۆهدار شێخۆ كۆمبووین كو ژلایێ خوه‌ڤه داخاز ژ مه‌كری ئه‌ڤ بڕیاره بهێته راگرتن هه‌تا پێداچوونێ ل سه‌ر بكه‌ین و سه‌رپه‌رشتێ ئێدارا زاخۆ مه‌زاختیێن دورستكرنا هنده‌ك پێدڤیێن یاریگه‌هێ ب ستویێ خوه‌ڤه گرتینه هه‌تا بڕیارا ڤه‌گه‌ڕاندنا پلێتا بهێته كرن، هیڤییه جه‌ماوه‌ر بزانیت ئه‌ڤ بڕیاره دێ هاریكار بیت بۆ یانێ ژبه‌ركو ئه‌وی پاره‌یی بۆ پێدڤیێن یاریگه‌هێ بیت.
