نۆشداره‌ك: 92% ژ نۆشداران ده‌ست دگه‌ل كۆمپانیێن ده‌رمانان هه‌یه
هه‌ولێر، قائید میرۆ
نۆشداره‌كا پارێزگه‌ها سلێمانیێ گه‌نده‌لیێ مه‌زن یێن كه‌رتێ ساخله‌میێ ئاشكرا دكه‌ت و راگه‌هاند، كاره‌ساتێن زۆر مه‌زن و مه‌ترسیدار ل كه‌رتێ ساخله‌می دا هه‌نه و كار گه‌هشتیه ئاسته‌كی سێكس دگه‌ل وان كچێن مری ژی دهێته‌كرن یێن بۆ پشكنینێ دهێنه هنارتن بۆ نۆشداریا داد. هه‌روه‌سا دبێژیت: تۆڤێ زه‌لامێن بیانی و ره‌شپیستا بۆ دانانا زارۆكان دهێته بكارئینان.
دكتۆر باخان ئازاد، نۆشدارا گشتی بۆ رۆژناما ئه‌ڤرۆ دیار كر “كه‌رتێ ساخله‌می ل هه‌رێما كوردستانێ پڕی گه‌نده‌لی بوویه و ل گۆره‌ی زانیاریێن هاتینه به‌لاڤكرن 90%ێ نۆشداران تێكه‌لی گه‌نده‌لیێ بووینه و ده‌ست هه‌یه دگه‌ل كۆمپانیێن ده‌رمانان، نۆشدارێن كه‌ڤن بووینه بارگرانی ل سه‌ر كه‌رتێ ساخله‌می و مووچه‌یه‌كێ زۆر هه‌مبه‌ر ده‌وامه‌كا زۆر كێم مفادارن و تنێ ناڤێ وانا لسه‌ر میلاكێ حوكمه‌تێ یه و پاره و مووچه‌یێ باش وه‌ردگرن، به‌رۆڤاژی هنده‌ك نۆشدار ب تنێ ئێك ده‌مژمێر ده‌واما نه‌خۆشخانێ دكه‌ن، نابێژم هه‌موو به‌لێ زۆربه‌یا نۆشدارێن كه‌ڤن مژۆلی بازرگانیێ نه ب وه‌لاتیان و من به‌لگه هه‌نه نۆشدار هه‌نه ئێك رۆژدا 140 نه‌خۆشان ل كلینیكا ئێڤاریان دبینیت، ئه‌ڤه د ده‌مه‌كی دایه نابیت ل گۆره‌ی پیڤه‌رێن زانستی نۆشدار ڤێ هژمارا زۆرا نه‌خۆشان ببینیت، له‌وڕا ژی پێدڤیه چاكسازی د كه‌رتێ ساخله‌می دا بهێته‌كرن و كه‌رتێ گشتی و ئه‌هلی بهێته جوداكرن، ئه‌ز پێشنیار دكه‌م مووچێ نۆشداران ل نه‌خۆشخانێن سه‌ر ب حوكمه‌تێ ڤه ل گۆره‌ی ده‌مژمێرێن وان ده‌وامێ بیت، چونكه پاره‌یه‌كێ زۆر هه‌یڤانه بۆ كه‌رتێ ساخله‌می دهێته مه‌زاختن و وه‌لاتی ده‌مێ نه‌ساخ دبن نه‌چارن سه‌ره‌دانا نه‌خۆشخانێن تایبه‌ت بكه‌ن.
ڤێ نۆشدارا ژن گۆت ژی “باوه‌ری د كه‌رتێ ساخله‌میێ دا نه‌مایه و چه‌ندین به‌لگه و زانیاریێن زۆر نهێنی و گرنگ ژلایێ هژماره‌ك نۆشداران هاتینه كۆمكرن و ل هه‌ر وه‌لاته‌كی ئه‌و به‌لگه و زانیاری بهێنه كۆمكرن ئه‌ڤه لایه‌نێن په‌یوه‌ندیدار و دادگه‌هێن ڤی وه‌لاتی دێ ب ئه‌ركێ رابن بۆ لێپرسینێ، بۆ نموونه سه‌نته‌رێ بلۆری یێ چاندنا زارۆكان هه‌بوویه تۆڤێ خه‌زیری بۆ بیكا وی بكار ئینایه و دووگیان بوویه، هه‌تا كاره‌ساتێن كه‌رتێ ساخله‌میێ گه‌هشتینه ئاسته‌كی سێكس دگه‌ل وان ته‌رمان هاتیه‌كرن یێن ژ بۆ پشكنین و هلێكاریێ هاتینه هنارتن بۆ نۆشداریا داد.
ل دۆر كه‌رتێ ده‌رمانان ژی دكتۆر باخان ئازاد ئاشكراكر “گه‌نده‌لیێ هه‌موو بیاڤێن ساخله‌میێ ڤه‌گرتینه و كه‌رتێ ده‌رمانان ژی بێ به‌هر نینه ژ وان گه‌نده‌لیێن دهێنه‌كرن، هژماره‌ك به‌رپرسێن گه‌نده‌ل كۆمپانیێن ده‌رمانان هه‌نه و ل كه‌یفا ده‌رمانا ده‌نه وه‌لاتیان، ساخله‌میا عێراقێ بخۆ ئاشكراكریه 75%ێ ده‌رمانانێن دهێنه ناڤا عێراقێ و هه‌رێما كوردستانێ جهێ باوه‌ریێ نینه، زانیاریێن زێده‌تر هه‌نه و دبێژن رێژا ده‌رمان خراپ زۆر زێده‌تره و دگه‌هیته 90%ێ، مافێ خه‌لكینه باوه‌ری ب نۆشدار و نه‌خۆشخانه‌یان نه‌هێت، چونكو ده‌مێ گه‌نده‌لی گه‌هشته ئاسته‌كی چو باوه‌ری دناڤبه‌را وه‌لاتی و نۆشداری نامینیت، زۆربه‌یا نۆشداران ل نه‌خۆشخانێن حوكمه‌تێ ده‌مێ نه‌ساخ سه‌ره‌دانا ئه‌ڤی نۆشداری دكه‌ت ترسێ بۆ نه‌ساخی په‌یدا دكه‌ن هه‌تا نه‌چاربیت ل ئه‌هلی نه‌شته‌رگه‌ریێ ئه‌نجامبده‌ت، زۆربه‌یا وان نه‌خۆشان د بنه‌ڕه‌تدا پێدڤی ب ڤان نشته‌رگه‌ری و چاره‌سه‌ریان هه‌ر نینه.
