عه‌بدولستار عه‌لی: دانانا ژڤانێ یاریێ بێ ئاگه‌هداریا مه بوو و رازی نابین
ئه‌ڤرۆ،عه‌لی حاجی :
سه‌رپه‌رشتێ تیما باسكێت بۆلا یانا زاخۆ دیاركر ئه‌و ژڤانێ هاتیه دیاركرن بۆ ئه‌نجامدانا یاریا وان هه‌مبه‌ری یانا شورته یا به‌غدایی ڕه‌دكه‌ن ئه‌وا ل حه‌فتیا بوری هاتیه پاشخستن بۆ حه‌فتیا بهێت ژ چارچووڤێ هه‌ڤڕكیێن گه‌ڕا نه‌هێ یا خولا پلا نایابا ئیراقێ كو بڕیاربوو ل 16ێ ڤێ هه‌یڤێ ل هۆلا بنگه‌هێ وه‌رزش و لاوێن زاخۆ هاتبا كرن.
زێده‌تر عه‌بدولستار عه‌لی د داخویانیه‌كێدا بۆ رۆژناما ئه‌ڤرۆ گوت: بڕیارا ئێكه‌تیا باسكێت بۆلا ئیراقێ ده‌رباره‌یی پاشخستنا یاریا مه ل گه‌ل یانا شورته بێ ئاگه‌هداریا مه بوو و جهێ سه‌رنجراكێشێ یه و مه ب ڕێیا سوشیال میدیایێ زانی له‌ورا ئه‌ڤێ چه‌ندێ ڕه‌دكه‌ین ژبه‌ركو چو ئه‌گه‌رێن دیاركری و مه‌ترسی نه‌بوون ل سه‌ر یاریێ لێ یا ئه‌م هزر دكه‌ین پیلان بوو ژبه‌ركو یاریزانێن یانا شورته تووشی هنگاڤتنان بووینه و ئه‌وان داخازا پاشخستنێ كریه لێ یا سه‌یر ئێكه‌تیا ئیراقێ بێ وه‌رگرتنا بۆچوونا یانا زاخۆ بڕیارا پاشخستنێ دا له‌ورا ئه‌م ژی رازی نابین یاریێ د ده‌مێ هاتیه ده‌ستیشانكرن بكه‌ین كو 27ێ ڤێ هه‌یڤێ دانایه یاری بهێته كرن و دێ ب نڤێساره‌كا فه‌رمی بۆ ئێكه‌تیا ئیراقێ فرێكه‌ین پێخه‌مه‌ت ئه‌ڤ یاریه یا پاشخستی بیت هه‌تا پشتی سه‌رێ سالا نوو، تایبه‌ت ژبه‌ركو پیشه‌كارێ مه یێ ئه‌مریكی دێ ل پێنچ شه‌مبیا بهێت ب موله‌تا فه‌رمی سه‌ره‌دانا وه‌لاتێ خوه كه‌ت كو ئێك ژ ئه‌گه‌رێن ڕه‌دكرنا مه یه ل سه‌ر ژڤانێ یاریێ.
ژلایه‌كێ دووڤه ناڤهاتی ژی گوت: لدووڤ به‌رنامێ رێكخستی یێ كادرێ راهێنانێ تیما مه به‌رده‌وامه ل سه‌ر راهێنانێن خوه یێن رۆژانه و نا هێلین راوه‌ستیان ب كه‌ڤیته د راهێنانان دا و هه‌تا نوكه ئه‌نجامێن مه گه‌له‌ك د باشن و دێ رژد بین پشكداریه‌كا سه‌رفه‌راز ب كوڕێن خابووری د خولێ دا بكه‌ین.
