زه‌ینه‌ب برێیا یانا ئافره‌تێن دهۆكێ حه‌زدكه‌ت هه‌بوونا خوه دیاركه‌ت
ئه‌ڤرۆ، زنار:
یاریزانا گه‌نج یا تیما فوتسالا یانا ئافره‌تێن دهۆك زه‌ینه‌ب عیماد دیاركر ئارمانجا وێ د ڤی وه‌رزی دا هه‌بوونا خوه د خولا هه‌رێما كوردستانێ دا ده‌ربكه‌ت و ناسناڤێ خولێ دێ هه‌ر ل پارێزگه‌ها دهۆكێ مینت.
زێده‌تر یاریزانا نافهاتی د دیداره‌كێ دا بۆ رۆژناما ئه‌ڤرۆ گۆت: ئه‌و چاڤه‌رێ ڤێ ده‌لیڤێ بوو ل ڤی وه‌رزی یاریێ بۆ یانا ئافره‌تێن دهۆك د خولا هه‌رێما كوردستانێ دا بكه‌ت ژبه‌ركو ئێكه ژ تیمێن بهێز و به‌ربژارا سه‌ره‌كی یه بۆ ناسناڤێ خولێ یه له‌ورا من باوه‌ری ب خوه هه‌یه دێ جودا ژ وه‌رزێن بوری ئاسته‌كێ باشتر پێشكێش بكه‌م و هه‌تا نوكه شیایمه ڤێ چه‌ندێ بجه بینم ل یاریێن بوری به‌رامبه‌ر یانێن سنور و شێخان د خولا كوردستانێ دا ده‌مێ شیایم گۆله‌كێ توماربكه‌م و دو گۆلان ژی دروست بكه‌م سه‌ره‌رای كو ئه‌ركێ من یێ سه‌ره‌كی به‌رگریه.
زه‌ینه‌ب عیماد ئه‌و چه‌نده ژی گۆت: من دڤێت ڤی وه‌رزی ناسناڤێ خولێ دوباره بۆ یانا ئافره‌تێن دهۆك ده‌ستڤه‌بینم ژبه‌ركو چو كێماسی د پێكهاتیێ تیمێ دا نینه و كارگێریا یانێ ژی هه‌موو تشتێ پێدڤی بۆ تیمێ به‌رهه‌ڤ كریه پێخه‌مه‌ت ڤێ ئارمانجێ زێده‌باری ڤێ چه‌ندێ ژی روبینا گورگیس راهێنه‌را تیمێ ژی روله‌كێ باش هه‌بوویه د پێشخستنا شیانێن من تایبه‌ت ژلایێ هێزا له‌شی ڤه.
