ئاكرێ بۆ پاراستنا جهێ خوه و به‌رده‌ره‌ش و گاره دێ بزاڤێن قۆرتالكرنێ كه‌ن
ئه‌ڤرۆ،
بڕیاره ئه‌ڤرۆ ده‌مژمێر دویێ پشتی نیڤرۆ هه‌ر سێ یانێن پارێزگه‌ها دهۆكێ یانا ئاكرێ، گاره و به‌رده‌ره‌ش ب هیڤیێن سه‌ركه‌فتنێ دێ یاریێن خوه یێن گه‌ڕا حه‌فتێ ژ كۆما ئێكێ یا خولا پلا ئێكا كوردستانێ یا ته‌پا پێی ب ئارمانجێن پاراستنا جهێ خوه و هه‌روه‌سان خوه قۆرتالكرن ژ رێزێن دووماهیێ و یانا سێمێل دێ یا چاڤه‌ڕێ بیت.
تیما یانا ئاكرێ ل باژێرێ كه‌ركووكێ دێ بیته مێڤانا یانا شورجه ئێك ژ یاریێن پری هه‌ڤڕكی یێن ڤێ گه‌ڕێ دا، نوونه‌را پارێزگه‌هێ د ده‌مه‌كێ زێرین دا ده‌رباز دكه‌ت ئه‌وا نوكه سه‌رێ لیستێ دهێت ب 10 خالان ژ سێ سه‌ركه‌فتن، ئێك وه‌كهه‌ڤی و بێ خوساره‌تی، خودانێن ئه‌ردی هه‌ڤڕكا وێ یه ب هه‌شت خالان و رێزا سێیێ دهێت، ژلایێ خوه‌ڤه د یاریه‌كا دی یا ئه‌وا دێ د ناڤبه‌را هه‌ردو نوونه‌رێن پارێزگه‌هێ دا هێته ئه‌نجامدان یانا گاره ل یاریگه‌ها خوه دێ مێڤانداریا یانا به‌رده‌ره‌ش كه‌ت، هه‌ردو تیمێن پارێزگه‌هێ د رێزبه‌ندیه‌كا خراب دانه، گاره ب چار خالان رێزا شه‌شێ دهێت و ب هه‌مان خال لێ كێمتریا گۆلان به‌رده‌ره‌ش ل رێزا حه‌فتێ دهێت، یاری دێ هه‌ڤڕكی بۆ كۆمكرنا خالان بیت و وه‌رگرتنا رێزه‌كا باشتر هێته كرن، ژلایه‌كێ دووڤه تیما یانا سێمێلێ ئه‌وا د كاودانه‌كێ هه‌ستیار دا ده‌رباز دكه‌ت دێ د ڤێ گه‌ڕێ دا یا چاڤه‌ڕێ كری بیت ئه‌وا ب تنێ دو خال كۆمكرین و رێزا هه‌شتێ دهێت، ئه‌ڤ چاڤه‌ڕێ كرنه بۆ راهێنه‌رێ نوو ئاشتی موسته‌فایی گه‌له‌ك یا گرنگه و ده‌لیڤه‌كا باشه پێخه‌مه‌ت ل سه‌ر ئاست و هونه‌رێ تیما خوه ب راوه‌ستیێت تایبه‌ت پشتی وه‌كو راهێنه‌رێ نوو یێ تیما سێمێلێ هاتیه ده‌ستنیشانكرن.
