ئافره‌تێن دهۆك و هه‌ولێر د دیربیێ كوردستانێ دا
ئه‌ڤرۆ، زنار زوبێر:
تیما یانا ئافره‌تێن دهۆكێ ب ژڤانه ل رۆژا ئه‌ینیا بهێت ژ گڕنترین یاریێن گه‌ڕا چارێ یا خولا فۆتسالا یانێن پلا نایابا كوردستانێ ببیته مێڤانا كچێن یانا ئافره‌تێن هه‌ولێرێ كو دهێته هژمارتن دێربیێ كوردستانێ و هه‌ڤڕكیێ بۆ ناسناڤێ خولێ ئه‌وا دێ ل هه‌ولێرا پایته‌خت هێته ئه‌نجامدان، ژلایێ خوه‌ڤه كچێن گاره دێ ل هۆلا گرتیا كولیژا چاندنێ مێڤانداریا كچێن شێخان كه‌ن ئه‌وا دێ یاریێن وان ل ده‌مژمێر دویێ پشتی نیڤرۆ هێنه كرن.
لدور یاریا دێربیێ كوردستانێ روبینا گۆرگیس بۆ رۆژناما ئه‌ڤرۆ گوت: یاریه‌كا بهێزه و ڤه‌بڕه بۆ هه‌ڤڕكیا ناسناڤی مه چو كێماتی دناڤ تیمێ دا نینن و هه‌موو یاریزان به‌رهه‌ڤن و مه كار ل سه‌ر هه‌موو لایه‌نا كریه تایبه‌ت ده‌رۆنی و ل سه‌ر خالێن هێزێ و لاواز تیما مێڤاندار كاركریه، ئافره‌تێن هه‌ولێرێ دو باشترین پیشه‌كارێن ئیرانی هه‌نه به‌روڤاژی تیما مه ژبه‌ر ره‌وشا خراب یا داریی مه نه‌شیایه په‌یدابكه‌ین، لێ مه باوه‌ری ب شیانێن یاریزانێن خوه هه‌یه و ئارمانجا مه ژی سه‌ركه‌فتنه.
ژلایێ خوه‌ڤه مه‌زن محه‌مه‌د راهێنه‌رێ ئافره‌تێن هه‌ولێرێ گوت: هه‌رده‌م یاری دناڤبه‌را هه‌ردو تیمان دا تامه‌كا تایبه‌ت هه‌یه و دهێته هژمارتن دێربیێ كوردستانێ، ئافره‌تێن دهۆكێ بهێزترین هه‌ڤڕكا مه‌یه بۆ ناسناڤی و كۆمه‌كا یاریزانێن شاره‌زا و ستێر دناڤ رێزێن وێ دا هه‌نه، له‌ورا ئه‌م دێ ب هه‌ستیاری سه‌ره‌ده‌ریێ ل گه‌ل ڤێ یاریێ كه‌ین و دڤێت مفایی ژ ئه‌رد و جه‌ماوه‌رێ خوه وه‌ربگریت ژبۆ سه‌رێ لیستێ و گه‌شكرنا هیڤیێن ناسناڤێ كوردستانێ.
