د. نزار به‌كر: كوخك وپه‌رسیڤ و سینگ كولبوون دناڤ زارۆكان دا گه‌له‌ك به‌لاڤبووینه
دهۆك، له‌زگین جوقی
رێڤه‌به‌رێ نه‌خۆشخانا هیڤی یا زارۆكان ل دهۆكێ دیاركركو دزڤستانا ئه‌ڤ ساله دا رێژا نه‌خۆشیان ل ده‌ڤ زارۆیان گه‌له‌ك زێده‌بووینه و پتریا وان ڤایرۆسێ كۆخك وپه‌رسیڤ وسینگ كولبوون هه‌یه و ل نه‌خۆشخانا هیڤی یا زارۆیان 200 ته‌خت هه‌نه و هه‌موو پر دبن و هه‌تا 300 نه‌خۆشان ژی دهێنه نڤاندن.
د. نزار به‌كر، رێڤه‌به‌رێ نه‌خۆشخانا هیڤی یا زارۆكان دیاركر، ئه‌ڤه رێژه‌كا زۆر یا مه‌زنه و ئه‌و زارۆكێن ئه‌م ژێ د ترسین ده‌مێ تووشی ڤایرۆسێ كوخك وپه‌رسیڤ وسینگ كولبوونێ دبن، ئه‌و زارۆكن یێن به‌روه‌خت ژدایك دبن یان زارۆكێن ره‌بوو هه‌ی ب تایبه‌تی ژی ئه‌و زارۆكێن ل ژێر ژیێ ئێك سالیێ دا، ده‌مێ تووشی ڤێ نه‌خۆشیێ دبن چاره‌سه‌ری گه‌له‌ك یا ب ساناهی نینه و گه‌له‌ك جاران ده‌رمان فایده ناكه‌ن بۆ چاره‌سه‌ریا زارۆكی، هه‌كه بێهنا وی ته‌نگ ببیت وزارۆك تشته‌كی نه‌خۆت ل نه‌خۆشخانی دهێته نڤاندن.
رێڤه‌به‌رێ نه‌خۆشخانا هیڤی یا زارۆكان ئاشكه‌را كركو ئه‌ڤ ساله رێژا نڤاندنا زارۆكێن نه‌خۆش گه‌له‌ك زێده‌بوویه و به‌هرا پتر ژ رۆژان نه‌خۆشخانه یا تژی یه ژ نه‌خۆشان و وان جهێ 200 نه‌خۆشان هه‌یه لێ 300 نه‌خۆش ژی دهێنه نڤاندن دناڤ نه‌خۆشخانێ دا و گۆت: ده‌مێ ئه‌ڤ رێژه وه‌سا بلنددبیت بێگومان كارتێكرن ل پێشكێشكرنا خزمه‌تێن ساخله‌میێ ژی هێته كرن.
د. نزار به‌كر، ئاماژه دا وی چه‌ندێ ژی كو دبیت ئه‌و زارۆكێ دناڤ نه‌خۆشخانێ دا چاره‌سه‌ریێ وه‌ردگریت تووشی دلرابوون و زكچوونێ و هنده‌ك ئێشێن دیترژی ببیت، له‌ورا خۆپاراستن گه‌له‌ك باشتره و پێدڤیه دایك وباب دڤی وه‌رزێ سالێ دا چاڤدێریا ساخله‌میا زارۆكێ خوه بكه‌ن، داكو یێ پاراستی بیت.
