وه‌لاتی یابانێ پشته‌ڤانیا دو پڕۆژه‌یێن گرنگ یێن ساخله‌میێ ل دهۆكێ دكه‌ت
دهۆك، له‌زگین جوقی:
رێڤه‌به‌رێ گشتی یێ ساخله‌میا پارێزگه‌ها دهۆكێ دیار كر كو ب ئاماده‌بوونا بالیۆزێ یابانێ و نوونه‌رێ یونسێف ل ئیراقێ و نوونه‌رێ وه‌زاره‌تا ساخله‌میا ئیراقا فیدرال دوهی 4/1/2022ێ پشكا چاڤدێریا چڕ بۆ تووشبوویێن كۆرۆنایێ و عمباره‌كا ڤاكسینێ ل دهۆكێ هاتنه ڤه‌كرن.
د. ئه‌فراسیاب موسا، رێڤه‌به‌رێ گشتی یێ ساخله‌میا پارێزگه‌ها دهۆكێ بۆ رۆژناما ئه‌ڤرۆ خویا كر، وه‌لاتی یابانێ پشته‌ڤانیا دو پرۆژه‌یێن گرنگ یێن ساخله‌میێ ل دهۆكێ كریه، هه‌ردو پرۆژه دوهی ل دهۆكێ هاتنه ڤه‌كرن، ئه‌و ژی پشكا چاڤدێریا چڕ بۆ تووشبوویێن كۆرۆنایێ ل نه‌خۆشخانا لالاڤ یا كۆرۆنایێ و عمباره‌كا هه‌لگرتنا ڤاكسینێ بۆ هه‌لگرتنا ڤاكسینا دژی كۆرۆنایێ بوون و گۆت: “پشكا چاڤدێریا چڕ ژ 10 ته‌ختان پێك دهێت و دێ یا تایبه‌ت بیت بۆ چاره‌سه‌ریا تووشبوویێن كۆرۆنایێ، ئه‌ڤ پرۆژه كه‌ڤتنه د كاری دا بۆ خزمه‌تكرنا خه‌لكێ پارێزگه‌ها دهۆكێ”.
ناڤهاتی ئاشكرا ژی كر كو وه‌لاتێ یابانێ پشته‌ڤانیا ماددی یا پرۆژان كریه و هه‌ردو پرۆژه ب رێیا رێكخراوێن یونسێف و پی دبلیۆ جی هاتینه ئه‌نجامدان و گۆت: “وه‌لاتی یابانێ و رێكخراوا یونسێف هه‌رده‌م پشته‌ڤانیا كه‌رتێ ساخله‌میێ ل پارێزگه‌ها دهۆكێ دكه‌ن”.
سوزوكی كیتاران، بالیۆزێ وه‌لاتی یابانێ گۆت: “ئه‌ز پێخوشحالم من سه‌ره‌دانا دهۆكێ كری و ئه‌ڤه ئێكه‌مین جاره سه‌ره‌دانا دهۆكێ كه‌م، ئه‌ز حه‌ز دكه‌م رێزگرتنا خوه پێشكێشی ساخله‌میا دهۆكێ بكه‌م و ئه‌ڤ هه‌ردو پرۆژه ژی پشته‌ڤانیا وه‌لاتی یابانێ یه بۆ ساخله‌میا پارێزگه‌ها دهۆكێ، دیسا هه‌ر ژ ده‌ستپێكا شه‌رێ تیرۆرستێن داعش و هاتنا ئاواره و په‌نابه‌ران بۆ پارێزگه‌ها دهۆكێ و به‌لاڤبوونا كۆرۆنایێ وه‌لاتێ یابانێ پشته‌ڤانیا ساخله‌میا دهۆكێ كریه و بۆ هه‌ر ره‌وشه‌كا چاڤه‌رێ نه‌كری ژی دێ یا هاریكار بیت و هه‌رده‌م یابان دێ پشته‌ڤانیا كه‌رتێ ساخله‌میێ ل دهۆكێ كه‌ت”.
