دهۆك و زاخۆ دێ بنه مێڤانێن چه‌مچه‌مال و هندرین
ئه‌ڤرۆ، زنار زوبیر:
چاڤه‌ڕێ دهێته كرن ئه‌ڤرۆ ل ده‌مژمێر ئێكێ نیڤرۆ هه‌ردو یانێن پارێزگه‌هێ تیما یانا دهۆك و زاخۆ یاریێن خوه یێن ڤێ حه‌فتیێ ژ ده‌رڤه‌یی یاریگه‌ها خوه ئه‌نجامبده‌ن ژ چارچووڤێ هه‌ڤڕكیێن گه‌ڕا 15ێ بۆ یانێن پلا نایابا كوردستانێ یا ته‌پا پێی.
ل باژێرێ سلێمانیێ تیما یانا دهۆكێ دێ بیته مێڤانا یانا چه‌مچه‌مال ئێك ژ یاریێن بهێز یێن نوونه‌را پارێزگه‌هێ، دهۆك ب 17 خالان ژ پێنچ سه‌ركه‌فتن، دو وه‌كهه‌ڤی و پێنچ خوساره‌تیا ل رێزا نه‌هێ دهێت، هه‌مبه‌ری وێ خودانێن ئه‌ردی ب 18 خالان رێزا پێنجێ دهێت، راهێنه‌رێ دهۆكێ هه‌رمان سالح یاریا ئه‌ڤرۆ ب سانه‌هی نابینت و بۆ رۆژناما ئه‌ڤرۆ گوت: یاری ب زه‌حمه‌ته ژبه‌ركو دو یاریزانێن مه یێن كاریگه‌ر ئه‌وژی بارزان ئه‌حمه‌د و دلدار جبرائیل ناكه‌ن و هه‌ردیسان نه پشكداریكرنا ئه‌و یاریزانێن ل گه‌ل تیما خولا ئیراقێ دێ كارتیكرن ل سه‌ر ئاستێ تیمێ كه‌ن، هه‌رچه‌وابیت دێ بۆ ئه‌نجامه‌كێ باش و سه‌ركه‌فتنێ یاریێ كه‌ین سه‌رباری تیما چه‌مچه‌مال ئێك ژ هه‌ڤڕكێن مه‌نه، یا دشیان دا بیت بۆ سه‌ركه‌فتنێ دێ دناڤ یاریگه‌هێ دا هێته كرن.
ژلایه‌كێ دووڤه نوونه‌را دویێ یانا زاخۆ ل هه‌ولێرا پایته‌خت دێ بیته مێڤانا یانا هندرین خودانا سه‌رێ لیستێ ب 27 خالان، زاخۆ د رێزبه‌ندیه‌كا باش دا نینه ب 13 خالان رێزا 13ێ دهێت، ژ سێ سه‌ركه‌فتن، چار وه‌كهه‌ڤی و شه‌ش خوساره‌تی، راهێنه‌رێ نوو خه‌میس جومعه ئه‌وێ ئه‌ركێ تیما زاخۆ وه‌رگرتی ژ سێ یاریان چار خال كۆمكرینه و دێ بزاڤێ كه‌ت بۆ یاریا ئه‌ڤرۆ هه‌مبه‌ری بهێزترین تیما خولێ ب ئه‌نجامه‌كێ باش ڤه‌گه‌ڕیته زاخۆ.
ژ یاریێن دی یێن ئه‌ڤرۆ هێنه كرن، ئارارات- سه‌ید سادق، ده‌ربه‌ندیخان- شێروانه، سیروانی نوو- نه‌وروز، پێشمه‌رگه‌یا هه‌ولێر- برایه‌تی، هه‌ولێر- شه‌قلاوه، تیما سۆران دڤێ گه‌ڕێ دا یا چه‌ڤه‌ڕێكری بیت.
