سه‌رۆكێ كازاخستانێ: تیرۆرستان خوا‌ستن ب كۆده‌تایا سه‌ربازی وه‌لاتێ مه ژناڤ ببه‌ن
ب، سه‌رجان مه‌حمود:
ئالۆزیێن ل كازاخستانێ به‌رده‌وام دكه‌ن و رۆسیا و هه‌ڤالبه‌ندێن وێ د ناڤ سێ رۆژان دا نێزیكی 80 هزار سه‌رباز بۆ ڤه‌گه‌راندنا ئارامیێ و پاراستنا ده‌ستهه‌لاتا قاسم جۆمارد تۆكاییڤ ل ده‌ڤه‌رێن هه‌ستیار یێن كازاخستانێ بجه كرن و ل دووڤ راگه‌هاندنا رۆسیا سه‌رۆكێ كازاخستانێ داخوازیێن رۆسیا قه‌بوول كرینه و بۆ ڤێ چه‌ندێ ب فه‌رمانا پۆتینی ب هزاران سه‌رباز بۆ كازاخستانێ هاتنه شاندن و د ره‌وشا نها دا پرانیا دام و ده‌زگه‌هێن ده‌وله‌تێ كه‌ڤتینه ژێر كۆنترۆلا هێزێن ئێمناهیێ یێ رۆسیا و كازاخستانێ.
د ڤێ مژارێ دا قاسم جومارد تۆكاییڤ د داخۆیانیه‌كا رۆژنامه‌ڤانی دا راگه‌هاند كو ل دووڤ زانیاریێن ل به‌ر ده‌ستێ وان هژماره‌ك زێده تیرۆرست ب پشته‌ڤانیا هێزێن ده‌رڤه خوا‌ستن كۆده‌تایا سه‌ربازی ئه‌نجام بده‌ن و گۆت: (تیرۆرستان خوا‌ستن پرسا په‌ترۆلێ ئانكۆ هنده‌ك ئاریشێن بچووك بكار بینن و ب رێیا خوه‌نیشادانان ئالۆزیان دروست بكه‌ن و ده‌مێ ڤالاهیه‌ك چێبوو ب كۆده‌تایا سه‌ربازی یا تیرۆرستی ده‌وله‌تا مه ژناڤ ببه‌ن لێ خه‌لكێ مه یێ هشیار بوو و ب هه‌ڤكاریا بله‌ز یا رۆسیا و وه‌لاتێن هه‌ڤپه‌یمان مه شیا پیلانا تیرۆرستان ژناڤ ببه‌ین).
ناڤهاتی هه‌روه‌سا راگه‌هاند ژی كو ب چو ره‌نگه‌كێ دانوستاندنان ل گه‌ل تیرۆرستان ناكه‌ین و دڤێت تیرۆرست یان دێ خوه راده‌ست بكه‌ن یان ژی دڤێت بهێنه دادگه‌هكرن و گۆت: (رۆسیا و گه‌له‌ك وه‌لاتێن دی هه‌ڤكاریا مه كرن، بێگومان ئه‌م رێ ناده‌ین كو تیرۆرست ئارامیا وه‌لاتێ مه تێك بده‌ن، ژ به‌ر هندێ ژی یا پێدڤی بیت ل دژی تیرۆرستان دێ كه‌ین و مه دڤێت د زووترین ده‌م دا ره‌وشا وه‌لاتێ خوه ئارام بكه‌ین).
هه‌ژی ئاماژه‌پێدانێ یه كو ژ به‌ر ئالۆزیێن ڤێ دووماهیێ ل كازاخستانێ هه‌تا نها ب ده‌هان وه‌لاتیێن سڤیل و هێزێن ئێمناهیێ هاتینه كوشتن و ب سه‌دان كه‌س ژی بریندار بووینه و هه‌تا نها ژی ئالۆزیێن ل وی وه‌لاتی به‌رده‌وامن.
