ئهڤرۆ دهۆك چاڤ ل سهرێ لیستێ یه
ئهڤرۆ،
دهێته چاڤهڕێ كرن ئهڤرۆ دهمژمێر دو یێ پشتی نیڤرۆ تیما تهپا پێی یا یانا دهۆك ب هیڤیێن مهزن ژبۆ ب دهستڤه ئینانا سێ خالان دێ بیته مێڤانا یانا عهفهك ل باژێرێ نهجهف ژ چارچووڤێ كۆما ئێكێ و ههڤڕكیێن گهڕا 12ێ و دهستپێكا قۆناغا دویێ یا خولا پلا ئێكا ئیراقێ.
تیما یانا دهۆك ئهوا نوكه ب 24 خالان رێزا دویێ دهێت دێ بزاڤێ كهت سهركهفتنێ ل سهر خودانێن ئهردی یانا عهفهك بینن ئهوا ب 15 خالان رێزا حهفتێ دهێت، پێخهمهت بهردهوامی بۆ ههڤڕكیا سهرێ لیستێ ئهوا تیما حدود ب 25 خالان رێزا ئێكێ دهێت و دێ یاریا خوه ههمبهری سلیخ كهت، هیڤیێن دهۆكێ سێ خالێن یاریێ یه ل گهل عهفهك و شكهستنا ههڤڕكا وێ حدوده پێخهمهت وهرگرتنا سهرێ لیستێ، پشتی دوورخستنا راهێنهرێ وێ عادل ناسر و ئینانا راهێنهر ئهحمهد كازم نوونهرا پارێزگههێ دێ ب پلانێن جودا هێته دناڤ یاریگههێ دا ژبۆ سهركهفتنێ.
لدور دووماهی بهرههڤیێن وان ئهحمهد سهبری ستێرا گهنج یێ یانا دهۆك بۆ رۆژناما ئهڤرۆ گوت: بهرههڤیێن مه د ئاستهكێ بلند دانه و ئهم ههموو رژدین بۆ سهركهفتنێ ژ نهجهف ڤهگهڕیێن، مه ئێك ئارمانج ههیه بهره ب سهرێ لیستێ بچین و پارێزین ههتا دووماهیا خولێ پێخهمهت دهربازبوون بۆ نایاب، تیما عهفهك دێ دناڤ ئهرد و جهماوهرێ خوه دا كهت و یاری ب سانههی نابیت لێ گهشبینین دێ سێ خالان دهستڤهئینن.
ههروهسان ناڤهاتی گۆت: ههرچهنده قۆناغا دویێ یا خولێ ههموو یانه ب شێوهكێ باشتر خوه بهرههڤ دكهن و ههر یاریهكا دهێته كرن وهكو یا دووماهیێ یه ژبهركو سیستهمێ خولێ چار یانه پاشڤه دچنه پلا دو لهورا ههموو یانه دێ بزاڤێ كهن خالان ژ دهست نهدهن تایبهت دناڤ یاریگهها خوه دا، تیما یانا دهۆك ژی ب پشتهڤانیا كارگێریا یانێ ههر تشتهكێ پێدڤی بۆ هاتیه دابینكرن و خالێن سهركهفتنێ بهرههڤكرینه بهیڤی نه ب گههینه ئارمانجا خوه.