ئێكه‌تیا ته‌پا پێی یانێن شێخان و گاره سزادان
ئه‌ڤرۆ،
د كۆمبوونا خوه یا ڤێ حه‌فتیێ دا ئه‌وا ل شه‌مبیا بوری هاتیه ئه‌نجامدان ئێكه‌تیا ته‌پا پێی یا كوردستانێ چه‌ند بڕیار و راسپاردێن نوو ده‌ڕكرن ژوانا سزادانا هه‌ردو یانێن پارێزگه‌ها دهۆكێ شێخان و گاره ب كۆژمه‌كێ پاره‌یی و گه‌ڤێن ڤه‌كێشانا وان ژ خولێ.
لدووڤ بڕیارا ئێكه‌تیا ناڤهاتی كو ده‌ر ئه‌نجامێ خوه ڤه‌كێشانا هه‌ردو تیمێن فۆتسالا یانا گاره و شێخان به‌رامبه‌ر تیما ئافره‌تێن دهۆكێ ژ چارچووڤێ هه‌ڤڕكیێن گه‌ڕا سێیێ و حه‌فتێ یا خولا فۆتسالا كچان و پشتی دۆڤچوونا راپۆرتا سه‌رپه‌رشتیار و دادڤانێن یاریێ هاتیه كرن بڕیاردا سزادانا هه‌ر ئێك ژ یانێن گاره و شێخان ب كۆژمێ 500 هزار دیناران و هه‌روه‌سا سزادانا یانا سنۆر ب هه‌مان كۆژمه پشتێ وێ یانێ ژی خوه ژ یاریا هه‌مبه‌ر ئافره‌تێن دهۆكێ ڤه‌كێشایی و دڤێت بۆ ماوێ دو حه‌فتیان ئه‌ڤ سزایه بهێته ئه‌داكرن ئه‌گه‌ر نه دێ ئه‌و تیم هێنه دوورخستن ژ چالاكیێن ئێكه‌تیا ته‌پا پێی یا كوردستانێ.
هه‌روه‌سا ژبۆ زێده‌تر ده‌لیڤه‌دان بۆ هه‌ڤڕكیا ناسناڤێ خولا فۆتسالێ ئه‌و هه‌ر چار یانێن ده‌ربازدبنه قۆناغا چارێك دووماهیێ دێ خال و گۆلێن وان یێن د ماوێ هه‌ڤڕكیێن خولێ ژ قۆناغا كۆمان هێنه ڕاكرن پێخه‌مه‌ت قۆناغا دویێ یا بهێزتر بیت بۆ ناسناڤی.
بۆ زانین ل ژمارا ئێكشه‌مبیا بوری یا رۆژناما ئه‌ڤرۆ جێگرا سه‌رۆكا یانا ئافره‌تێن دهۆكێ ناله سۆپه‌ر د داخویانیا خوه دا بۆ رۆژنامێ گه‌ڤێن خوه ڤه‌كێشانا تیما خوه كربوون ئه‌گه‌ر ئێكه‌تیا ته‌پا پێی یا كوردستانێ چو هه‌لوه‌ستان هه‌مبه‌ری ره‌فتارێن یانێن خوه ڤه‌كێشی ژ یاریێن وان نه‌كه‌ن.
