رۆژنامه‌ڤانه‌كێ تورك ل دۆر كوردان داخوازه‌كێ ژ ئه‌ردۆغانی دكه‌ت
ب، سه‌رجان مه‌حمود:
دۆغان ئۆزگوده‌ن رۆژنامه‌ڤانێ رۆژناما ئارتی گه‌رچه‌ك راگه‌هاند كو ده‌ستهه‌لاتا توركیا ب سالانه ل دژی ده‌ستكه‌فتیێن كوردێن رۆژئاڤا و باشورێ كوردستانێ ئێرشێن دژوار دایه ده‌ستپێكرن و بۆ ژناڤبرنا ده‌ستكه‌فتیێن كوردان هه‌ڤكاریا گرۆپێن هشكباوه‌ر دكه‌ت و گۆت: (ئه‌ڤ سێ سالن ب به‌هانه‌یا هه‌بوونا چه‌كدارێن پارتا كرێكارێن كوردستانێ ئۆپه‌راسیۆنه‌كا دژوار ل هه‌رێما كوردستانێ ده‌ستپێ كریه و گوند و سروشت و وه‌لاتیێن سڤیل د ئه‌نجاما ئۆپه‌راسیۆنا ده‌وله‌تا توركیا دا زیانه‌كا مه‌زن دبینن و مخابن هه‌تا نها ژی ئێرشێن ده‌وله‌تا توركیا ل سه‌ر كوردان ل هه‌رێما كوردستانێ و هه‌روه‌سا ل رۆژئاڤایێ كوردستانێ به‌رده‌وام دكه‌ن).
ناڤهاتی راگه‌هاند ژی كو ژ سالا ۲۰۱۳ ڤه ده‌ستهه‌لاتا توركیا ده‌ست ب هه‌ڤكاریا گرۆپێن چه‌كدار ل سووریێ كریه و ب رێیا وان گرۆپان ژی گه‌له‌ك ده‌ڤه‌رێن كوردان ل سووریێ هاتینه داگیركرن، لێ نها په‌یوه‌ندیێن رۆسیا و توركیا ژی ل دۆر سووریێ تێك چووینه و رۆسیا داخواز ژ توركیا دكه‌ت كو هێزێن خوه ژ ئاخا سووریێ ڤه‌كێشیت و ئێدی پشته‌ڤانیا گرۆپێن چه‌كدار نه‌كه‌ت، هه‌روه‌سا ئه‌مریكا ژی ژ سیاسه‌تا توركیا یا ل سووریێ دلگرانه، ئانكۆ ب گشتی توركیا دێ ته‌نگاڤ بیت، ژ به‌ر هندێ ژی باشتره توركیا ده‌ست ب قۆناغه‌كا نوو ل گه‌ل كوردان بكه‌ت و ئێرشێن خوه یێن ل هه‌رێما كوردستانێ و رۆژئاڤایێ كوردستانێ ژی بده‌ته راگرتن.
