تیما دهۆك هاته سزادان و كارگێری بێ هه‌لوه‌ست نابیت
ئه‌ڤرۆ، قیس وه‌یس
لژنه‌یا رێكوپێكیێ ل ئێكه‌تیا ته‌پا پێی یا ئیراقێ بڕیاردا تیما یانا دهۆك ب ئه‌نجامێ سێ گۆلان به‌رامبه‌ر چنه بهێته دۆراندن پشتی یانا حدوود سكالا ل سه‌ر دهۆكێ تۆماركری كو پێنچ یاریزانێن پیشه‌كار د یاریا وان دا پشكداركربوون ئه‌وا ل حه‌فتیا بوری ژ چارچووڤێ خولا پلا ئێكا ئیراقێ هاتیه كرن كو به‌روڤاژی یاسا و رێنومایێن وانه.
لدووڤ نڤێسارا ئێكه‌تیا ته‌پا پێی یا ئیراقێ كو پشتی دۆڤچوونا بابه‌تێ سكالایێ كرین دیاربوو تیما دهۆكێ پێنچ یاریزانێن پیشه‌كار د ئێك ده‌مدا دناڤ یاریگه‌هێ دا پشكدار كرینه و ئه‌ڤچه‌نده ژی به‌روڤاژی یاسایا به‌ندێ 14 یا سیسته‌مێ به‌ریكانایه، له‌ورا لدووڤ به‌ندێ 65/ 1 یا رێنومایێن رێكۆپێكیێ بڕیارا خوساره‌تكرنا تیما دهۆكێ هاته دان ئه‌وا د وێ یاریێ دا ب وه‌كهه‌ڤبووین بێ گۆل
ژلایێ خوه‌ڤه سه‌رۆكێ یانا دهۆك یا وه‌رزشی دیاركر كو هیچ رێنومایه‌ك بوو ئه‌وان نه‌هاتیه كو دڤێت ب چار یاریزانێن پیشه‌كار یاریێ بكه‌ن و سه‌رپه‌رشتێ یاریێ ژی بوو مه دووپاتكر كو ئه‌م دشێن ب پێنچ یاریزانا یاریێ بكه‌ین و گوت: مه پێرابوونێن یاسایی كرینه و پارێزه‌رێ یانێ ژی دیاركریه كو بڕیارا ئێكه‌تیێ یا شاشه و دێ كاركه‌ین ل دادگه‌ها تایبه‌ت یا(منازعات) مافێ خوه وه‌ربگرین.
زێده‌تر عه‌بدوللا جه‌لال گۆت: ئه‌ڤه گه‌له‌ك یڕیارێن شاش ژلایێ ئێكه‌تیا ئیراقێ دژی یانێن كوردستانێ هاتینه ده‌ڕكرن و ئه‌گه‌ر چو گوهۆڕین په‌یدا نه‌بوون دێ ل گه‌ل رێڤه‌بریا گشتی یا وه‌رزشی ل هه‌رێمێ و گۆڤه‌ند عه‌بدولخالق ئه‌ندامێ ئێكه‌تیا ته‌پاپێی یا ئیراقێ به‌یانامه‌كا تایبه‌ت هه‌بیت هه‌لوه‌سته‌كێ تۆند راگه‌هینن ژبه‌ركو مه گه‌له‌ك كار لسه‌ر تیمێ كریه ژبۆ ده‌ربازبوون بۆ پلا نایاب و دێ هه‌موو بزاڤا كه‌ین سكالا مه سه‌ربگریت.
