ئه‌حمه‌د كازم: حه‌فت یاریزانێن مه پشكدار نابن و رژدین بۆ سه‌ركه‌فتنێ
ئه‌ڤرۆ،
چاڤه‌ڕێ یه ئه‌ڤرۆ ده‌مژمێر دو یێ پشتی نیڤرۆ تیما ته‌پا پێی یا یانا دهۆك ب هیڤیێن ئه‌نجامه‌كێ باش ببیته مێڤانا هه‌ڤڕكا خوه یانا میسان ژ چارچووڤێ یاریێن گه‌ڕا 14 یا خولا پلا ئێكا ئیراقێ ئه‌وا دێ ل یاریگه‌ها مه‌یموونه ل باژێرێ میسان هێته ئه‌نجامدان.
تیما یانا دهۆكێ ب 24 خالان رێزا دویێ دهێت و دێ هه‌موو بزاڤا كه‌ت سه‌ركه‌فتنێ تۆماربكه‌ت پێخه‌مه‌ت به‌رده‌وامی دان بۆ هه‌ڤڕكیا سه‌رێ لیستێ، هه‌مبه‌ری وێ یانا میسان ئه‌وا ب 22 خالان رێزا سێیێ یه ده‌لیڤه به‌رده‌ستێ وێ ژی مایه بۆ هه‌ڤڕكیا سه‌رێ لیستێ و دێ بزاڤێ كه‌ت مفایی ژ ئه‌رد و جه‌ماوه‌رێ خوه وه‌ربگریت و قه‌ره‌بوویا یاریا بوری بكه‌ت ئه‌وا ب گۆله‌كێ ل گه‌ل مێڤانا خوه خوساره‌ت بووی، هه‌رچه‌نده دهۆك دێ بێ پشكداریا حه‌فت یاریزانێن خوه بیت ئه‌وێن ژبه‌ر هنگاڤتنێ نه‌شێن پشكداربن.
لدوور دووماهی به‌رهه‌ڤیێن تیما دهۆكێ ئه‌حمه‌د كازم راهێنه‌رێ وێ بۆ رۆژناما ئه‌ڤرۆ گوت: یاریه‌كا ب زه‌حمه‌ته هه‌مبه‌ری تیمه‌كا هه‌ڤڕك و خودانێن ئه‌ردی و هه‌ر یاریه‌كا دكه‌ین بتنێ هزر ل سه‌ركه‌فتنێ دهێته كرن ژبه‌ركو چو ڕێكێن دی نینن و ئارمانجا مه ده‌ربازبوونه، لێ د ڤێ یاریی دا تیما مه بێ حه‌فت یاریزانان پشكداریێ كه‌ت ژبه‌ر هنگاڤتنا ئه‌وژی، عه‌باس تالب گۆلپارێز، نیاز مه‌غدید، محه‌مه‌د سه‌عید، كامیران خالد، عه‌لی نوری، دلۆڤان سالح و مرتجا عادل، ئه‌ڤ یاریزانه هه‌موو كاریگه‌رن و سه‌ره‌كی نه هه‌مبه‌ری وێ من باوه‌ری ب یاریزانێن دی هه‌یه دێ جهێ وان گرن و ئارمانجا خوه ب جهئینن ئه‌وژی ده‌ستڤه ئینانا سێ خالێن یاریێ یه.
ژ یاریێن دی یێن ئه‌ڤرۆ ، حدوود خودانا سه‌رێ لیستێ ب 29 خالان دێ مه‌سافی مێڤانكه‌ت ئه‌وا 17 خال هه‌ین و رێزا حه‌فتێ دهێت، هه‌روه‌سان سلیخ- دیفاع ئه‌لمه‌ده‌نی، عه‌له‌م- سوق ئه‌لشیوخ، عه‌فه‌ك- رومادی هه‌مبه‌ری ئێك بن.
بۆ زانین 24 یانه پشكداری خولا پلا ئێكا ئیراقێ بووینه و هاتینه به‌لاڤكرن ل سه‌ر دو كۆمان، قاره‌مانا هه‌ر كۆمه‌كێ دێ ده‌ربازبیته پلا نایاب و چار یانێن دووماهیێ ژ هه‌ر كۆمه‌كێ دێ پاشڤه‌چنه پلا دو یا ئیراقێ.
