كۆمپانیه‌كا راپرسیان: هه‌كه نها هه‌لبژارتن بهێنه كرن ئه‌ردۆغان سه‌رناكه‌ڤیت
ب، سه‌رجان مه‌حمود:
كۆمپانیا ARA یا راپرسیان به‌ری چه‌ند رۆژان راپرسیه‌ك ل پرانیا باژێرێن توركیا ئه‌نجام دایه و ژ وه‌لاتیان پرسیار كریه هه‌كه نها هه‌لبژارتن بهێنه كرن دێ ده‌نگێ خوه ده‌ته كیژ ئالیێ سیاسی یان هه‌ڤپه‌یمانیێ، كۆمپانیا ناڤهاتی ل ۲۰ باژێرێن توركیا و حه‌فت باژێرێن باكورێ كوردستانێ ل گه‌ل دو هزار و سه‌دو دو كه‌سان ئاخڤیه و ل دووڤ ئه‌نجامێن راپرسیێ ٣٢% پشكداربوویان ئاشكرا كرینه كو دێ ده‌نگێ خوه ده‌نه ئاكپارتیێ و ٢٧% ژی راگه‌هاندینه كو ئه‌و دێ ده‌نگێ خوه ده‌نه پارتیا كۆماری و ١٥% ژی دیار كرینه كو دێ ده‌نگێ خوه ده‌نه پارتیا باش و پارتیا بزاڤا نه‌ته‌وه‌په‌رست ژی ب تنێ ٨% ده‌نگێ خه‌لكی بۆ خوه كۆم دكه‌ت، دیسان ١٠% ژ پشكداربوویان ژی دیار كرینه كو ئه‌و دێ د هه‌لبژارتنان دا ده‌نگێ خوه ده‌نه هه‌ده‌پێ.
هه‌مان كۆمپانیێ دیار كریه كو ل گۆر ئه‌نجامێ راپرسیا وان یا سالا ٢٠١٨ ده‌ردكه‌ڤیت كو رێژا ده‌نگێن ئاكپارتیێ گه‌له‌ك كێم بوویه چونكو وی ده‌می ٤٣% پشكداربوویان پشته‌ڤانی ل ئاكپارتیێ دكرن و هه‌كه نها هه‌ڤپه‌یمانی ژی بهێنه دروستكرن هه‌ڤپه‌یمانیا ئاكپارتی و پارتیا بزاڤا نه‌ته‌وه‌په‌رست نه‌شێن كابینا نوو یا حوكمه‌تێ ئاڤا بكه‌ن، ئانكۆ ئاكپارتی ل هه‌مبه‌ر ئۆپۆزسیۆنێ دێ تووشی شكه‌ستنێ بیت.
