ب هاتنا ده‌سته‌كا نوو باسكێت بۆلا پارێزگه‌هێ هاته ڤه‌ژاندن
ئه‌ڤرۆ، زنار زوبێر:
پشتی ل ماوێ بوری ئێكه‌تیا باسكێت بۆلا پارێزگه‌هێ هاتیه گوهۆڕین و ل شوونا وان ده‌سته‌یه‌كا نوو بۆ ڤێ ئێكه‌تیێ هاتیه ده‌ستنیشانكرن ژلایێ نوونه‌راتیا دهۆك یا لژنا ئولومپیا كوردستانێ ڤه نوكه ئه‌ڤ یاریه جاره‌كا دی ڤه‌ژاندن تێدا په‌یدابوو ب ئه‌نجامدانا چه‌ندین چالاكیان ژوانا ڤه‌كرنا قوتابخانه‌كا دادڤانیێ.
د ڤی چارچووڤه‌ی دا سه‌ردار سالح سه‌روكێ نوو یێ ئێكه‌تیا باسكێت بۆلا پارێزگه‌ها دهۆكێ د داخویانیه‌كێ دا بۆ رۆژناما ئه‌ڤرۆ گۆت: پشتی ل ماوێ بوری ئه‌م ده‌ستبكاربوین ل ئێكه‌تیا باسكێت بۆلا پارێزگه‌ها دهۆكێ چه‌ندین پێشنیار مه ئاراسته‌ی نوونه‌راتیا دهۆك یا لژنا ئولومپی كر بۆ ئه‌نجامدانا چالاكیێن تایبه‌ت ب ڤێ یاریێ وخۆشحالی ڤه پشته‌ڤانێن مه بوون پشتی رازه‌مه‌ندی مه ژ ئێكه‌تیا باسكێت بۆلا ئیراقێ وه‌رگرتی ئێكه‌م كارێ مه خوله‌كا دادڤانیا باسكێت بۆلێ پله سێ مه ڤه‌كر و نوكه به‌رده‌وامه و نێزیكی 125 كه‌سان پشكدارن و وانه‌بێژێ ڤێ خولێ ژی دادڤانێن نێڤده‌وله‌تی نه كو ژ به‌غدا هاتینه پاشان ل ماوه‌یه‌كێ دی دێ خوله‌كا دی یا پله دو بۆ ڤان دادڤانێن ده‌رچن ژ ڤێ خولێ ئه‌نجامده‌ین ل زاخۆ و پاشان دێ قوتابخانه‌یه‌كا دادڤانیێ ڤه‌كه‌ین كو جارا ئێكێ یه ئه‌ڤ كاره دهێته‌كرن هه‌تاكو دادڤانێن مه یێن پارێزگه‌هێ باوه‌رناما نێڤده‌له‌تی وه‌رگرن.
سه‌ردار سالح ئه‌و چه‌نده ژی گۆت: پشتی ڤان خولان دێ خوله‌كا بهێزكرنا شیانێن راهێنه‌رێن باسكێت بۆلێ ژی ڤه‌كه‌ین بۆ راهێنه‌رێن پارێزگه‌ها دهۆكێ كو به‌رده‌وامی دانه ب خولا ئێكێ دیسان شیاین مێڤانداریا قاره‌مانیا باسكێت بۆلا هه‌لبژارتیێن پارێزگه‌هان ل سه‌ر ئاستێ تازه‌پێگه‌هشتیان ژی بكه‌ین كو خۆشبه‌ختانه هه‌لبژارتیێ دهۆكێ دێ به‌ربژێره‌كێ بهێز بیت بۆ ڤێ قاره‌مانیێ كو بریاره ل 18 ڤێ هه‌یڤا شوباتێ ده‌سپێبكه‌ت.
ل دووماهیێ نافهاتی گۆت: ب هه‌موو شیانێن خوه كاركه‌ین پێخه‌مه‌ت ڤه‌گه‌ڕاندنا ئاستێ باسكێت بۆلا پارێزگه‌ها دهۆكێ بۆ ئاستێ وێ یێ جاران و ئه‌ڤ یاریه دووباره بهێته ڤه‌ژاندن و نه‌مریت.
