كاژین تاها:دامه‌زراندنا رێكخراوا وه‌رزشی و دیده‌ڤانی پێنگاڤا ئێكانه‌یه ل كوردستانێ
ئه‌ڤرۆ،
د داخویانیه‌كێدا به‌رپرسا چالاكیێن رێكخراوا ئاكرێ بۆ وه‌رزش و دیده‌ڤانی دیاركر بۆ جارا ئێكێ یه ل قه‌زا ئاكرێ و كوردستانێ رێكخراوه‌كا تایبه‌ت یا ب وه‌رزشێ ڤه گرێدایی و ب شێوێ ئه‌كادیمی وزانستی پێخه‌مه‌ت خزمه‌تا هه‌موو وه‌رزشڤانێن كوڕ و كچ و پێشخستنا ئاستێ وه‌رزشێ.
زێده‌تر كاژین تاها بۆ رۆژناما ئه‌ڤرۆ گوت: رێكخراوا مه پێكدهێت ژ سێ كه‌سان و نه یا حكومی یه و بێ قازانجه و مه‌ره‌ما سه‌ره‌كی به‌لاڤكرنا ره‌وشه‌نبیریا وه‌رشی و گرنگی دان ب یاریێن مللی و ئه‌نجامدانا هه‌موو وه‌رزشان و دانانا خیڤه‌گه‌هێن دیده‌ڤانی و كورسێن وانه‌بێژی و راهێنانانا، دیسان رێزلێنان وه‌رزشڤانێن قاره‌مان و یاریزانێن دێرین و ئه‌نجامدانا چه‌ندین چالاكیێن وه‌رزشی ڤه، ئه‌ڤه هه‌موو پێحه‌مه‌ت په‌ره‌پێدان و به‌لاڤكرنا ره‌وشه‌نبیریا وه‌رزشی و ساخكرنا یاریێن مللی نه و پێشخستنا هه‌موو وه‌رزشا بۆ كچ و كوڕان.
ژلایه‌كێ دووڤه ناڤهاتی دیاركر د نێزكترین ده‌م دا دێ ڤیسته‌ڤالا خوه یا ئێكێ و ناساندنێ رێكخن و هه‌موو بزاڤێن وان دێ بۆ چاوانیا پێشخستنا وه‌رزشێ ب هه‌موو جوران بیت ژلایێ ره‌وشه‌نبیری و زانستی و ئه‌كادیمی ڤه و ب هه‌ردو شێوازان تیۆری و پراكتیكی و گوت: رێكخراوا دێ بۆ هه‌موویان بیت هه‌رچه‌نده ده‌ستپێكێ ل باژێرێ ئاكرێ دایه لێ هه‌كه پێدڤی بیت دێ پرانیا ده‌وروبه‌ران ڤه‌گڕیت و ئه‌م گه‌شبینن پێنگاڤا ئێكێ دێ یا سه‌ركه‌فتی بیت و لایه‌نێن په‌یوه‌ندیدار هاریكاربن ژبه‌ركو پێنگاڤا مه بۆ خزمه‌تا گه‌نج و لاو و هه‌موو وه‌رزشڤانێن ده‌رڤه‌رێ یه.
