هاریكارێ راهێنه‌ری: پاشخستنا یاریێ د به‌رژه‌وه‌ندیا مه دا بوو
ئه‌ڤرۆ، عه‌لی حاجی:
هاریكارێ راهێنه‌رێ تیما باسكێت بۆلا یانا زاخۆ ئه‌وێن پشكدار د خولا پلا نایابا ئیراقێ دا دیاركر ل سه‌ر داخوازیا وان یاریا ئه‌ڤرۆ ئه‌و بڕیار بوو هه‌مبه‌ری یانا حلله بكه‌ت بۆدووماهیا ڤێ حه‌فتیێ هاته پاشخستن و د به‌رژوه‌ندیا مه دابوو.
زێده‌تر جوتیار عه‌لی بۆ رۆژناما ئه‌ڤرۆگوت: ژبه‌ركو یاریزانێن تیما مه مژویلی هه‌ڤڕكیێن قاره‌مانیا ئیراقێ یا سه‌ر ئاستێ تازه‌پێگه‌هشتیانه ئه‌وا نوكه ل هه‌ردو هۆلێن یانا دخۆك و سه‌نحاریب ب پشكداریا 16 هه‌لبژارتییان دهێنه ئه‌نجامدان مه داخواز ژ ئێكه‌تیا باسكێت بۆلا ئیراقێ كربوو كو یاریا مه یا ئه‌ڤرۆ دووشه‌مبی بهێته پاشخستن بۆ ئه‌ینیا بهێت پێخه‌مه‌ت ده‌لیڤه دان ب یاریزانێن مه یێن تازه‌پێگه‌هشتی ئه‌وێن هه‌تا هه‌شت ژ وان ل گه‌ل هه‌لبژارتیێ پارێزگه‌ها دهۆكێ نه له‌ورا پاشخستن د به‌رژوه‌ندیا تیما مه دابوویه پێخه‌مه‌ت باشتر خوه به‌رهه‌ڤ بكه‌ین و یارێزانێن ماندیبوون هه‌یی و هنگاڤتنێن سڤك باشتر شێوه ڤه‌گه‌ڕیێن.
ناڤهاتی ئه‌وچه‌نده ژی دیاركر هه‌لبژارتیێ پارێزگه‌هێ شیاینه سه‌ركه‌فتنێ لسه‌ر میسان، دیوانیه و واست بینن ئه‌ڤچه‌نده ژی رامانا وێ دده‌ت كو یاریزانێن مه خودان شیانن و به‌ربژارن بۆ هه‌ڤڕكیێ ل سه‌ر رێزێن ئێكێ و باشترین ده‌لیڤه‌یه كو ئه‌م مفایی ژ ڤێ قاره‌مانیێ وه‌ربگرین و رێژه‌كا باش یاریزانێن مه جهێ خوه دناڤ هه‌لبژارتیێ ئیراقێ بكه‌ن ژبۆ پشكداریێن ده‌رڤه.
