ئه‌ڤرۆ ئاكرێ هه‌مبه‌ری پێنگاڤا دووماهیێ یه بۆ نایابا كوردستانێ
ئه‌ڤرۆ، قه‌یس وه‌یس
تیما ته‌پا پێی یا یانا ئاكرێ ب ژڤانه ئه‌ڤرۆ ل ده‌مژمێر 2:30 پشتی نیڤرۆ یاریا خوه یا چاره‌نڤیس ژبۆ ده‌ستڤه ئینانا پلێتا ده‌ربازبوونێ بكه‌ت ده‌مێ ل یاریگه‌ها خوه مێڤانداریا یانا به‌رده‌ره‌ش بكه‌ت، ژ چارچووڤێ هه‌ڤڕكیێن كۆما ئێكێ و گه‌ڕا 16ی یا خولا پلا ئێكا كوردستانێ ده‌ربازبوون بۆ پلا نایاب.
نوونه‌را پارێزگه‌هێ یانا ئاكرێ ئه‌وا ب 25 خالان سه‌رێ لیستێ دهێت پێدڤی ب سه‌ركه‌فتنێ یان وه‌كهه‌ڤیێ ژی هه‌یه پێخه‌مه‌ت مسۆگه‌ركرنا پلێتا ده‌ربازبوونێ بۆ پلا نایاب ژبه‌ركو هه‌ڤڕكا وێ یا دویێ یانا پیشه‌سازی ل رێزا دویێ دهێت ب 23 خالان، هه‌كه ئاكرێ وه‌كهه‌ڤی ژی بیت و پیشه‌سازی سه‌ركه‌فتنێ تۆماربكه‌ت لدووڤ سیسته‌مێ خولێ دێ ڤه‌گه‌ڕێنه یاریێن دناڤبه‌را وان هه‌ردو تیمان دا ئه‌وا یانا ئاكرێ شیایی سه‌ركه‌فتنێ د هه‌ردو یاریان دا تۆماربكه‌ت ئانكۆ باشترین دێ بۆ ئاكرێ بیت، لێ خوساره‌تیا نوونه‌را پارێزگه‌ها دهۆكێ و سه‌ركه‌فتنا پیشه‌سازی دێ هیڤیێن ده‌ربازبوونێ ژ ده‌ست ده‌ن.
لدور دووماهی به‌رهه‌ڤیێن یانا ئاكرێ هوزه‌ڤان زاهد سه‌رپه‌رشتێ تیمێ بۆ رۆژناما ئه‌ڤرۆ دیاركر یاریا ئه‌ڤرۆ ل گه‌ل به‌رده‌ره‌ش یا مان و نه‌مانێ یه بۆ پلا نایاب و زه‌حمه‌تا چه‌ندین سالانه دڤێت بگه‌هینه هیڤیێن خوه، بۆ ڤێ یاریێ هه‌موو یاریزان به‌رهه‌ڤیێن باش كرینه و كارگێریا یانێ بۆ ئارامكرنا ده‌رونێ وان و به‌رهه‌ڤكرنا هه‌ر تشته‌كێ پێدڤی بۆ تیمێ دابینكریه، ئه‌م هه‌مبه‌ری تۆماركرنا دیرووكێ نه و پێنگاڤا دووماهیێ یه بۆ ده‌ربازبوون به‌ره ب پلا نایاب، هه‌رچه‌نده وه‌كهه‌ڤی ژی د به‌رژوه‌ندیا مه‌دایه لێ بتنێ بۆ سێ خالان كه‌ین، هیڤییا مه و جه‌ماوه‌ر ئه‌وه ئه‌ڤرۆ ئاهنگێن سه‌ركه‌فتنێ ب گێڕینن.
ژ یاریێن دی یێن ئه‌ڤرۆ دێ هێنه كرن، سێمێل ئه‌وا 14 خال هه‌ین رێزا پێنجێ دێ بیته مێڤانا یانا شۆرجه یا كه‌ركووكی خودانا هه‌مان خال و رێزا شه‌شێ، گاره خودانا 12 خالان رێزا حه‌فتێ ل هه‌ولێرا پایته‌خت بیته مێڤانا خاك ئه‌وا 17 خال كۆمكرین و رێزا چارێ یه، یانا پێشه‌سازی دێ مێڤانداریا برۆسك كه‌ت خودانا رێزا سێیێ ب 21 خالان.
