محه‌مه‌د یوسف: یاریا ئه‌ڤرۆ چاره‌نڤیسه بۆ دهۆكێ
ئه‌ڤرۆ،
بڕیاره ئه‌ڤرۆ ل ده‌مژمێر دویێ پشتی نیڤرۆ تیما ته‌پا پێی یا یانا دهۆك ل باژێرێ نه‌جه‌ف بیته مێڤانا یانا كووفه ژ چارچووڤێ هه‌ڤڕكیێن كۆما ئێكێ و گه‌ڕا 17ێ یا خولا پلا ئێكا ئیراقێ ب هیڤیێن مه‌زن بۆ هه‌ڤڕكیا سه‌رێ لیستێ.
تیما دهۆك ب 31 خالان رێزا دویێ دهێت جووداهیا سێ خالان ژ خودانا سه‌رێ لیستێ یانا حدوود، ئه‌لهۆیێن چیا دێ هه‌موو بزاڤان كه‌ت به‌رده‌وامیێ بده‌نه هه‌ڤڕكیێ بۆ پلێتا ده‌ربازبوونێ و یاریا ئه‌ڤرۆ ل گه‌ل كووفه چاره‌نڤیسه ژبه‌ركو بتنێ ئه‌ڤ یاریا بهێزه ژ ده‌رڤه‌یی یاریگه‌ها خوه و دێ پێنچ یاریێن مایی چار ژوان ل یاریگه‌ها خوه كه‌ت و هه‌روه‌سان هیڤیێن خوه گه‌شترلێكه‌ت، به‌روڤاژی خوساره‌تیێ و سه‌ركه‌فتنا حدوود دێ شه‌ش خالان دووركه‌ڤیت، ژلایێ خوه‌ڤه كووفه چو هیڤیێن هه‌ڤڕكیێ بۆ پلێتا ده‌ربازبوونێ نینن ئه‌وا 22 خال كۆمكرین و رێزا پێنجێ دهێت.
لدۆر دووماهی به‌رهه‌ڤیێن تیما دهۆكێ محه‌مه‌د یوسف راهێنه‌رێ وێ ئه‌ڤ یاریه ب چاره‌نڤیس دازانین ژبۆ به‌رده‌وامیا هه‌ڤڕكیێ ل سه‌ر لیستا خولێ و پلێتا ده‌ربازبوون بۆ پلا نایاب و گوت: یاریا ئه‌ڤرۆ بهێزترین تاقیكرنه بۆ تیما مه ژبه‌ركو كووفه ئێك ژ تیمێن بزه‌حمه‌تن و دێ دناڤ ئه‌رد و یاریگه‌ها وێ دا بیت، لێ هه‌موو یاریزان به‌رهه‌ڤن و رژدن بۆ یاریا مان و نه‌مانێ و رێژه‌كا مه‌زن دێ هه‌لوه‌ستێ مه بۆ هه‌ڤڕكیێ دیاركه‌ت، پلانا مه دێ هێرشبرنه هه‌تا دووماهی چڕكه و هه‌موو یاریزان د هوشداریا هێرشن هه‌ڤدژ و به‌ره‌ڤانیه‌كا رێكخستی دا بن، یا گرنگ كو كارگێریا یانێ هه‌ر تشته‌كێ پێدڤی بۆ تیمێ به‌رهه‌ڤكریه ژ روویێ مادی و مه‌عنه‌وی ڤه ئه‌ڤچه‌نده ژی د به‌رژوه‌ندیا تیما مه دایه بهیڤییا وێ یه‌كێ ب سێ خالێن یاریێ ڤه‌گه‌ڕێنه دهۆكێ.
ژ یاریێن دی حدوود خودانا سه‌رێ لیستێ دێ بیته مێڤانا یانا مرور ئه‌وا 19 خالان رێزا هه‌شتێ دهێت، عه‌له‌م- سلیخ، رومادی- یفاع ئه‌لمه‌ده‌نی، سوق ئه‌لشیوخ- مه‌سافی ئه‌لجنوب- جنسییه- به‌حری، عه‌فه‌ك- میسان.
