هێشتا ده‌مێ مایى هوین دشێن كێر نه‌گه‌هیته هه‌ستى!
عومه‌ر سندى
هندى رۆژا هه‌لبژارتنا سه‌رۆك كۆمارێ ئیراقێ نێزیكتر دبه، ئاگر خوه‌شتر دبه و گۆرى بلندتر دبه و ب مخابنی ڤه گۆره‌پانا قه‌بخوازیێ گه‌رمتر و به‌رفره‌هتر دبه، هه‌لبه‌ت ئه‌ڤ هه‌ڤركیه و قه‌بخوازیا د ناڤبه‌ر دو هێزێن سه‌ره‌كیێ باشۆرێ كوردستانێ پارتى دیمۆكراتى كوردستان و یه‌كه‌تیا نیشتیمانیا كوردستان هه‌ر رۆژ ب ڤى ئاواى برینه‌كا نوى ل جه‌سته‌یێ بزاڤا رزگاریخوازیا كوردستانێ ئه‌وا بخوه بریندار ڤه‌دكن و رۆژانه ژى ناڤمالا كوردى به‌ر ب په‌رته‌وازه و لێكترازانه‌كا كاڤلكارتر دبن یاكو پتر مرۆڤى بریندار دكه ڤان هه‌ردو هێزان چه‌ندین ساله په‌یمانه‌كا ستراتیجى ل گه‌ل هه‌ڤ و هه‌ر تشت ب سازان ده‌ربازكریه لێ وه‌سا خۆیا دبه كو ئه‌ڤ په‌یمانا هه‌نێ نه‌مایه هه‌رچه‌نده ب فه‌رمى هه‌لوه‌شاندنا وێ نه‌هاتیه راگه‌هاندن, چونكى ل سالا 2018 ێژى پارتى جودا ب كاندیده‌كێ (دكتۆر فوئاد حسێن) و یه‌كه‌تى جودا ب كاندیده‌كێ (دكتور به‌رهه‌م سالح) دیس كه‌تنه هه‌ڤركیێ ئه‌وبوو كاندیدێ یه‌كه‌تى به‌ریكانه بر و ل ڤێرێ ژى ره‌وش پتر ئالۆزبوو هندى یه‌كیتى نیشتیمانى كوردستانه یاوه‌كى كتكێ لێ هاتى هندى هلاڤێژى دێ هه‌رل سه‌ر پێن خوه راوه‌ستنێ دزانت بێژت: (پۆستى سه‌رۆك كۆمار پشكى كورده و له‌ناو كوردیش پشكى یه‌كێته) و پارتى دیمۆكراتى كوردستان ژى دبێژت: راسته پشكا كوردانه، لێ د ناڤ كوردان دا هیچ ئالیه‌ك ده‌ستنیشانكرى بۆ ڤى پۆستى نه‌هاتینه دیاركرن هه‌لبه‌ت ئه‌ڤ ركابه‌ریه و قه‌بخوازیه یابوویه ئه‌گه‌رێ دلگرانیا هه‌رتاكه‌ك كورد كو هه‌ست ب به‌رپسیاره‌تیێ بكه و خوه وه‌ك كورده‌ك ببینه هه‌روه‌ساژى هه‌ركه‌سێ ب درۆستى ره‌وشێ بشۆپینه وێ بزانه هێدى هێدى كێل هه‌ستى نێزیك دبه و ئه‌ڤه ژى جهێ مخابنیه‌كا مه‌زنه وه‌ك وه‌لاتیه‌كى كورد من هنده‌ك تێبینى د ڤى بابه‌تی دا هه‌نه: ب راستى ئه‌ڤ پۆسته پۆستێ سه‌رۆك كۆمارى پۆسته‌ك سومبۆلیه ته‌شریفیه بریارێن ئێكلاكه‌ر و چاره‌نڤیسى نه‌شێت وه‌رگره، نموونه ژى ل ده‌ما بۆیه‌رێن 16ى ئوكتۆبه‌رێ، دیسا سه‌رۆك كۆمار كوردبى لێ نه‌شیا حه‌شدا شه‌عبى راوه‌ستینه كو كه‌ركووكێ داگیر نه‌كه نها ژى سه‌رۆك كۆمار كورده و رۆژانه ل ده‌وروبه‌رێ كه‌ركووكێ و ده‌ڤه‌رێن ماددا 140سته‌ما ل كوردان دئێته‌كرن و مولكێن كوردان یێ ژێ دهێنه ستاندن و عه‌ره‌بكرنژى به‌رده‌وامه دبه كو كه‌سه‌ك بپرسه: (پا چما ل سه‌ر ده‌مێ مام جه‌لالى سه‌رۆك كۆمارى رۆل هه‌بوو؟ به‌رسڤ: ب دیتنا من ئه‌و ب كه‌ساتیا مام جه‌لالى و په‌یوه‌ندیێن وى یێن كه‌سایه‌تى ب هه‌موو پێكهاتێن عه‌ره‌بیڤه هه‌روه‌سا ب ده‌وله‌تێن عه‌ره‌بى و ناڤچێ ڤه یا دی ژى مام جه‌لال مه‌له‌ڤانه‌كى باشبو د هونه‌رێ رازیكرنێ و پێكئینانێ و رێڤه‌برنا كرێزاندا مه‌ره‌ما من ل ڤێرێ ئه‌وه كو ئه‌ڤ پۆسته هندێ نائینه ببه ئه‌گه‌رێ تێكدانا ناڤمالا كوردان. ده‌م هێشتا بۆ چاره‌سه‌ركرنا ڤى بابه‌تى یێ ل پێشیا مه‌ماى یه‌كێتى و پارت دیسا دشێن چه‌ند كۆمبوونه‌كێكێن لۆتكه‌ى بكن و بگه‌هن لێكتێگه‌هشتنه‌كێ و ل سه‌ر كاندیده‌كێ پێكوه‌رن داكو ئه‌و كاندیدژى بهێز بكه‌ڤه مه‌یداناكارى و هه‌میژى پشتگیریێ ل بریار و چالاكیێن وى بكن خاله‌كا دی ژى گرنگه ل سه‌ر خاتریا ناڤمالا كوردى و به‌رژه‌وه‌ندی گشتى خوه مه‌رج نینه یه‌ك ژڤان هه‌ردو كاندیدابه پارتى و یه‌كه‌تى دشێن ل سه‌ر كاندیده‌كى كوردێ پاقژێ خوه‌دى شیان و ئه‌زمۆن لهه‌ڤ بكن بلا هه‌ردو كاندیدێن خوه ڤه‌كێشن سیاسه‌ت ب دانوستاندن و دیالۆگ دبه سیاسه‌ت ب هه‌ڤركى و قه‌بخوازى نابه هه‌ڤڕكى وێ مه بگه‌هینه تۆنێله‌كا تارى ئه‌ڤ كێشه نه‌هندا ئالۆزه هه‌تاكو چاره‌سه‌رى بۆ نه‌به‌تنێ نیازیه‌كا ساخله‌م دخوازه ئه‌گه‌ر ب ڤى ره‌نگى هه‌ره ب ڤێ هه‌ڤركیێ هه‌ردو كاندید بگه‌هنه به‌غدا هه‌لبه‌ت ئێك دێ ده‌ركه‌ڤت ب راستى كارڤه‌دانێن ڤێ پرۆسێسێ یێن نێگاتیف دێ ل سه‌ر هه‌رێما كوردستانێ ره‌نگڤه‌دن، باشه كه‌نگێ سازشكرن بۆ هه‌ڤدو ژ پێخه‌مه‌ت به‌رژه‌وه‌ندیا بلند وگشتى بوویه كێماسى هه‌تا ئیرۆ كێماسى بت؟ من ئیرۆ هنده‌ك ده‌زگه‌هێن راگه‌هاندن و مه‌دیایا یه‌كێتى دشۆپاندن بۆ من تێبینیه‌ك خوه‌یابى یه‌كتیێ پرسا سه‌رۆك كۆمار و كه‌ساتیا ب رێز به‌رهه‌م سالحى یاكریه پرسا سه‌ركه‌فتن و شكه‌ستنێ ل هه‌مبه‌ر پارتى، ئانكو ئه‌گه‌ر كاندیدێ یه‌كه‌تى بسه‌ركه‌ت و ده‌نگ ئینان ئه‌ڤه یه‌كه‌تى ل سه‌ر پارتى بسه‌ركه‌فت و به‌روڤاژی ژى درۆسته ب دیتنا من، ئه‌ڤاهه‌نێ شاشیه‌ك مه‌زنه ئالیه‌ك و هێزه‌ك سه‌ره‌كى ل هه‌رێمێ ب ئه‌ڤى چاڤى مێزه‌ى هه‌ڤپشكێ خوه د حوكۆمداریێ دا بكه خالادن ژى وه‌سا خۆیایه یه‌كێتى هند ب كاندیدێ خوه‌ڤه گرێدایه، هه‌روه‌ك بێژه ژبه‌ركو پارتى هنده‌ك تێبینی ل سه‌ر دكتۆر به‌رهه‌مى هه‌نه هه‌ما گه‌ره‌ك ئه‌وبه ئه‌ڤه‌ژى دووره ژ لۆژیكا سیاسى كو مه ل ده‌ستپێكا بابه‌تى گۆت سیاسه‌ت ب ڕكمانه نایێ كرن.
هیڤیدارین هه‌ردو ئالى پێداچوونه‌كا دى ب ئه‌ڤى بابه‌تیدا بكن به‌رژه‌وه‌ندیا گشتى ده‌ینن پێشیا به‌رژه‌وه‌ندیێن حزبى یێن به‌رته‌نگ و لهه‌ڤ بگه‌هن پارتى دیمۆكراتى كوردستان وه‌كو هێزه‌ك سه‌ره‌كى و برایێ مه‌زن ئه‌گه‌ر ده‌ستپێشخه‌ریه‌كێ بكه ب دیتنا من دێ پێنگاڤه‌كا دیرۆكى به، مایه بێژم راستى مرۆڤ حێبه‌تى دمینه ده‌ما مێزه‌ى هه‌لویستێن ئالیێن دن یێن پارتیێن هه‌رێما كوردستانێ دكه، باشه كانێ رۆلێ وان د ئه‌ڤێ ئارێشێ دا؟ گه‌ره‌كبى ئیرۆ پارتیێن دن ڤه‌ده‌ر ژ پارتى و یه‌كه‌تى ب رۆله‌ك ئه‌رێنى و پۆزه‌تیڤ له‌یزتبان ژبۆ لهه‌ڤ نێزیككرنا دیتنان هه‌روه‌كو ئه‌ڤه تنێ پرسا هه‌ردو هێزێن سه‌ره‌كى لێ وه‌سا نینه پرس پرسا هه‌رێمێ یه و ئه‌م هه‌میژى دیه‌ك گه‌مى داینه خودێ نه‌كه نقۆبینا وێ نقۆبینا مه هه‌میانه و ب ئه‌ڤى ئاواى هه‌ره چارسالێن دیژى هه‌ڤركى و ململانێ دێ به‌رده‌وامبه و ئه‌زمۆنا هه‌رێمێ وێ پتر له‌كه‌دارببه پشتگیریا دۆستێن كوردان ژى نامینه وه‌كو ده‌مێ ئه‌م یه‌ك گرتى ئانكو وێ ب چاڤه‌ك دن مێزه‌ى مه بكن و ئیرۆ ژ هه‌موو رۆژان پتر چاڤێن ده‌وله‌تێن ده‌ردور و فۆكساوان ل سه‌ر مه‌یه د ئه‌ڤى بابه‌تی دا، هه‌لبه‌ت مێزه‌كرنا وان نه‌كو بهیڤینه ئه‌م لهه‌ڤ بێن به‌لكو ترساوان ئه‌وه ئه‌ڤ هه‌ردو هێزه لهه‌ڤ وه‌رن وڤێ ئارێشێ بداوى بینن.
