كوردفۆبیا
پشتی ڤێ چه‌ندێ كو باژێرێ كۆبانێ ژ ئالیێ شه‌ڕڤانان و ب پشتیڤانیا هێزێن پێشمه‌رگه و هه‌ڤپه‌یمانیان هاته ئازادكرن، ل گشت باژێر و باژێرۆكێن كوردستانێ، ب تایبه‌تی ل باكوورێ كوردستانێ ئاهه‌نگ و كه‌رنه‌ڤالێن سه‌ركه‌فتنێ هاتنه سازكرن و ل باژێرێ ئامه‌د مه‌زنترین ئاهه‌نگ رێڤه‌چوو كو د ڤێ باژێرێ كه‌ڤنار به هه‌زاران وه‌لاتی هاتنه سه‌ر شه‌قامان و كێفخوه‌شیا خوه ب ڤێ سه‌ركه‌فتنا مه‌زن و ره‌ڤین و شه‌كستا چه‌ته‌یێن داعش خوه‌یاكرن كو ل باشوور و رۆژئاڤایێ كوردستانێ و ب تایبه‌تی ل كۆبانێ یا به‌رخودانێ ئه‌فسانه‌یا وێ ب داوی بوو.
پشتی وان بوویه‌ران، حوكمه‌تا توركیا ئالایێن خوه ل سه‌ر سنۆرێن به‌رامبه‌ر كۆبانێ بلند كر و دخواست بێژیت، سه‌ركه‌فتنا پێشمه‌رگه‌ه و شه‌ڕڤانان چ كارتێكرنێ ناكه‌ته سه‌ر یه‌كپارچه‌یا كۆمارا توركان و سه‌ركرده و لیده‌رێن ڤێ ده‌وله‌تێ داخویانی ل دووڤ داخویانیدان و پێداگری ل سه‌ر وێ چه‌ندێ كرن كو ئێدی تورك ناهێلن ئه‌زموونا كوردی ئه‌وا ل باشوورێ كوردستانێ روودا، جاره‌ك دی ل رۆژئاڤا كوردستانێ ژی روو بده‌ت.
هه‌ر ل ده‌ستپێكا دروستبوونا ده‌وله‌تا توركان، ده‌سه‌لاتدارێن تورك د ناخێ خوه دا ژ كوردان دترسن، تووشێ فۆبیا كوردان بوونه، ترسه‌كا بێ هزر و بنه‌ما د ده‌روونێ وان دا چێ بوویه، ترسه‌كا پر ناته‌ندروسته. ئه‌و وه‌ها هزر دكه‌ن كو مه‌زنترین دوژمنێن توركان كوردن، د ترسن ئێكپارچه‌یا ده‌وله‌تان وان ل سه‌ر ده‌ستێ گه‌لێ كوردستانێ بهێ رۆخاندن و توركیایا ئێكگرتی بهێ هه‌لوه‌شاندن. ده‌سه‌لاتدارێن تورك ل ناڤێ كوردستانێ دترسن، ب پلان و به‌رنامه هه‌ولدانه د هش و ناخێ تاكه‌كه‌سێ تورك دا ڤێ ترسێ بچینن، نها پرانیا توركان ده‌ما ناڤێ كوردستانێ دبهیزن، تووشێ له‌رزی و ڤه‌جنقینێ دبن، ب گۆتنه‌كا دی رژێمێن ده‌سه‌لاتدار كارینه ڤێ ترسێ د دلێ وان بچینن.
هه‌ر ئێك ژ مه د ناخێ خوه دا ژ تشته‌كی دترسیت، لێ مرۆڤێ ئاسایی و ته‌ندروست ل وی تشتی دترسیت كو ستراكتور و بنه‌مایه‌ك هه‌به، وه‌ك میناك مرۆڤێ هه‌ژار ل پاشه‌رۆژێ دترسیت، چونكو خودانێ خوه نینه و ل ره‌وشێن دژوار دترسه كارێ خوه ژ ده‌ست بده‌ت، یان تووشی نه‌خۆشیه‌كێ ببیت و نه‌شێت كار بكه‌ت، هه‌لبه‌ت هه‌ڤرووشی ژیانه‌كا دژواتر دبیت و كۆمه‌كا پرسگرێك و گرفتان بۆ وی و خێزانا وی دروست دبن.
ئه‌ڤ ترسه‌كائاسایی و سروشتیه، لێ فۆبیا كوردان ئه‌وا د هشێ مرۆڤێ تورك دا هاتیه چاندن، ترسه‌كا ئاشۆپی یه، ده‌سه‌لاتدارێن تورك ئه‌ڤ ترسه د هشێ وان دا چاندنه، ژبۆی كو گشت توركان ل دۆر ڤێ ترسێ كوم بكه‌ن و تاكه‌كه‌سێ تورك هه‌ست بكه‌ت، كو گه‌ف و مه‌ترسی ل سه‌ر شۆناس و ناسنامه و هه‌بوونا كیانێ وان هه‌یه و ژێده‌رێ سه‌ره‌كیێ ڤێ مه‌ترسیێ ژی كوردن.
كوردان نه‌هێلا توركیایه‌كا ئێك زمان و تاك نه‌ته‌وه د ڤی وه‌لاتی دا جهگیر ببیت، كورد كاری پلانێن ئاسمیله‌كرنێ ژ ناڤ ببه‌ن و ب زمان و خاك و دۆزا خوه ڤه گرێدایی بن.
پرانیا توركان تشته‌كێ وه‌ها ل دۆر هه‌بوون و ناسنامه و دیرۆكا كورد و كوردستانێ نزانن، هه‌ست دكه‌ن كو ئه‌ڤ ناڤه ژیانا وان ئالۆز كریه، پڕانیا مێدیایێن توركان هه‌تا نها ژی ل سه‌ر ڤی ته‌وه‌رێ كار دكه‌ن، ناهێلن تاكه‌كه‌سێ تورك ل سه‌ر ره‌هه‌ندێن دۆزا گه‌لێ كوردستانێ ئاگه‌هدار و سه‌رهلببن و ئه‌ڤێ چه‌ندێ ژی نه‌هێلایه دید و نێرینه‌كا روون و زه‌لال و دیمۆكراسی ده‌ربارێ گشت دۆزان، ب تایبه‌تی پرسا كوردی د هشێ بینه‌ر و خوینده‌ڤانێ تورك دا به‌رجه‌سته ببن.
پێدڤی یه ئێدی ده‌سه‌لاتدارێن تورك پێداچوونه‌كێ ل سه‌ر پرۆژه‌یێن خوه ل ته‌ڤایا بیاڤان بكه‌ن كو ئێدی سه‌رده‌مێ وێ چه‌ندێ نه‌ما هه‌بوونا ملیۆنان كوردان ب نه‌بوون هه‌ژمار بكه‌ن و د ڤێ كورد ب ناسنامه و شووناسا خوه ببه پشكه‌كا سه‌ره‌كی ژ پێكهاته‌یا سیاسی، ئابووری، جڤاكی، دیپلۆماسی و حوكمرانیا توركیا.
پشتی ڤێ چه‌ندێ كو هێزێن كوردی كارین ب هێزا خوه ل هه‌مبه‌ر مه‌غولێن سه‌ده‌یێ بیست و ئێكان راوه‌ستن و ئه‌فسانه‌یا وان تێك بشكێنن و ل جهێ ته‌ڤایا جیهانا دیمۆكراسی شه‌ڕێ تیرۆرێ بكه‌ن كو پشتگیریا ئه‌مریكا و رۆژئاڤا و پرانیا ده‌وله‌تێن جیهانی ژی بده‌ست ئینایه. ئه‌و سه‌رده‌م ب سه‌ر چوو كو ئێدی مرۆڤێ تورك و رایا گشتی د ڤی ولاتی دا ب درووشمێن شۆڤینـزیم بهێنه خاپاندن، نها ئه‌م د گاڤه‌كا گرنگ و هه‌ستیار دا ده‌رباز دبین و د ڤێ ژ هێڤی و ئۆمێد و ئارمانجێن هه‌ڤدو نه‌ترسین و گوهداریا ده‌نگێن ژیان دوستان بكه‌ین و رێزێ ژ جوداهیێن هه‌ڤدو بگرین، هه‌كه ئه‌و بخوازن ئه‌ڤ ده‌ڤه‌ره و ده‌وله‌تێن رۆژهه‌لاتا ناڤین، ده‌ڤه‌رێن ئارام و سه‌قامگیر بن، پێدڤی پره‌نسیپێن دیمۆكراسی د ژیانا خوه یا سیاسی دا پراكتیزه بكه‌ن و گشت جوداهی ب ئاوایه‌كێ سه‌رده‌میانه دایه‌لۆكێ ل گه‌ل هه‌ڤدو بكه‌ن.
داعشێ هۆڤانه‌نه ب تنێ مه‌ترسی یه ل سه‌ر گه‌لێن رۆژهه‌لاتا ناڤین، به‌لكو ته‌ڤایا گه‌لێن جیهانێ و توركیا ژی ڤه‌ده‌ر نینه ل بازنه‌یا مه‌ترسیا داعشێ، به‌لكو به‌ره‌ڤاژی هه‌بوون و ڤه‌مانا ڤێ گرۆپا چه‌ته ل داویێ دبه به‌لایا سه‌رێ چێكه‌رێن ڤێ گرۆپێ و وه‌ك خاله‌كا شه‌رمه‌زاریێ ل دیرۆكا وان دهێ نڤیساندن.
