خوزی ئێكانه راهێنه‌را كچه پێنچ باوه‌رنامێن نێڤده‌وله‌تی ده‌ستڤه ئیناینه
ئه‌ڤرۆ،
راهێنه‌را پارێزگه‌ها دهۆكێ و هاریكارا راهێنه‌رێ هه‌لبژارتیێ ئیراقێ بۆ یاریا فۆتسالا كچان خوزی حه‌مید دهێته هژمارتن ئێكه‌م كچ ل سه‌ر ئاستێ كوردستانێ و ئیراقێ پێنچ باوه‌رنامێن نێڤده‌وله‌تی ب ده‌ستخوه‌ڤه ئیناینه.
د دیداره‌كێ دا ناڤهاتی بۆ رۆژناما ئه‌ڤرۆ دیاركر هه‌تا نوكه شیایه پێنچ باوه‌رنامێن نێڤده‌وله‌تی و باوه‌رپێكری سه‌ر ئاستێ ئاسیا و فیفایێ بۆ یاریا ته‌پا پێی یا یاریگه‌هێن مه‌زن، فۆتسال و یاریگه‌هێن بچووكری ب ده‌ستخوه‌ڤه بینت ئه‌وژی پشتی زه‌حمه‌كا مه‌زن و ماندیبوونه‌كا زێده بشێوێ تیۆری و پراكتیكی و گۆت: یا گرنگ ئه‌ز شیایمه مفایی و شاره‌زاهیه‌كا باش وه‌ربگرم و دووماهی پێشهاته و نوویاتیێن ته‌پا پێی یا كچان وه‌ربگرم و پێزانین باش ل سه‌ر كارێ راهێنانێ وه‌رگرینه، ئه‌ڤه هه‌موو دێ بنه به‌لانس بۆ پێشخستنا وه‌رزشا فۆتسالێ كو د شیان دا بیت بۆ وه‌رزشا پارێزگه‌هێ و كوردستانێ دا بكه‌م، هه‌رده‌م من پلان هه‌نه و ل سه‌ر كار دكه‌م و گه‌له‌ك جاران ل گه‌ل ئێكه‌تیا ته‌پا پێی یا ئیراقێ گه‌نگه‌شه كرینه لسه‌ر بابه‌تێن راهێنانێ، هه‌رچه‌نده ل گه‌ل هه‌لبژارتیێ ئیراقێ گرێدایمه لێ هه‌رده‌م هزرا من ل دهۆكێ یه كو بشێم خزمه‌تا باژێرێ خوه بكه‌م لێ گرنگیێ ب كارێن مه ناده‌ن و خه‌لكه‌كێ دی مفایی ژ شیانێن مه وه‌ردگریت.
ژلایه‌كێ دووڤه ناڤهاتی دیاركر وه‌كو راهێنه‌ر پرانیا داخوازیا بۆ وێ ژ یانێن ئیراقێ دهێت لێ ژبه‌ركو د نوكه دا مژویلی خواندنا خوه یا ماسته‌رێ یه و نه‌شێت به‌رده‌وامیێ ل به‌غدا بده‌تێ و گۆت: ئاستێ فۆتسالێ ل كوردستانێ باشتره ژ ئیراقێ ئه‌وژی ژبه‌ر هه‌بوونا ژماره‌كا یاریزانێن خودان ته‌كتیك و هونه‌ر و ئه‌ڤچه‌نده ژی بۆ به‌رده‌وامیا خولا كوردستانێ ڤه‌دگه‌ڕیێت و یا پارێزگه‌هێ ژی به‌ری نوكه باشتر بوو ژبه‌ركو ژمارا یانا زێده‌تر بوون، هه‌مبه‌ری وێ نوكه ژمارا یاریزانان زێده‌بووینه و به‌روڤاژی یانه كێم بووینه و هنده‌ك یانه پشتبه‌ستنێ لسه‌ر یاریزانێن ده‌رڤه دكه‌ن، له‌ورا هیڤییا مه ئه‌وه یانێن مه یێن دهۆكێ پشته‌ڤانیا كچێن باژێرێ خوه بكه‌ن هه‌ر چه‌وا چاڤدانا تیمێن كوڕان دكه‌ن ژبه‌ركو دده‌مه‌كی دا دهۆك ب پایته‌ختێ فۆتسالا كوردستانێ و ئیراقێ دهاته نیاسین، مخابن مه یانه هه‌نه خودان یاریگه‌ه و هۆل لێ ئاماده نینن ئێك تیما كچان دروست بكه‌ن و ملیارا دینارا لسه‌ر كوڕان مه‌زێخین و بێ ئه‌نجام و نه‌شێن ملیۆنه‌كێ بۆ تیما كچان بمه‌زێخن.
