د خوله‌كا كۆژه‌ك دا مرورێ هیڤیێن دهۆكێ ڤه‌مراندن
ئه‌ڤرۆ، قه‌یس وه‌یس
هیڤیێن تیما ته‌پا پێی یا یانا دهۆك بۆ ده‌ربازبوونا پلا نایابا ئیراقێ لاواز بوون و هاتنه ڤه‌مراندن پشتی یانا مرور یا به‌غدایی د خوله‌كا 92ێ دا شیایی گۆلا سه‌ركه‌فتنێ ل سه‌ر تیما دهۆكێ بینت، د یاریا واندا ئه‌وا دوهی ژ چارچووڤێ هه‌ڤڕكیێن گه‌ڕا 20ێ یا خولا پلا ئێكا ئیراقێ ل یاریگه‌ها وه‌لا‌و باژێرێ به‌غدا هاتیه كرن.
د نیڤا ئێكێ دا هه‌ر ژ ده‌ستپێكێ یاریزانێن دهۆكێ گڤاشتن ل سه‌ر گۆلا مرور كرن و چه‌ندین ده‌لیڤێن مه‌ترسی ژ ده‌ستدان ژوانا شوتێن هێرشبه‌ران مورتجا عادل و ئه‌حمه‌د سه‌بری و وه‌لید سه‌لمان و شیانێن گۆلپارێز عه‌باس تالبی، هه‌مبه‌ری وێ یانا مرور ژی لدووڤ پلانه‌كا رێكخستی رێك ل هێرشێن دهۆكێ دكرن و هێرشێن هه‌ڤدژی ب كار دئینان.
د نیڤا دویێ دا پشتی ئامۆژگاریێن راهێنه‌رێ دهۆكێ محه‌مه‌د یوسف بۆ یاریزانێن خوه و شێوازێ پلانێن گڤاشتن بۆ سه‌ر گۆلا مرورێ رێكخستی هه‌رچه‌نده ده‌ستپێكا یاریێ ئه‌و ئاستێ چاڤه‌ڕێ كری نیشان نه‌دا تا 20 خوله‌كێن دووماهیێ دا هه‌موو یاریزانێن دهۆكێ و پشتی چه‌ندین گوهۆڕینێن هاتنه كرن گڤاشتنێن مه‌زن ل سه‌ر گۆلا مرور كرن ئه‌وێن بتنێ شیاین هێلا به‌ره‌ڤانیێ ب گرن و نه‌هێلین چو گۆلا بكه‌ن و شیانێن گۆلپارێزێ وان ژی گه‌له‌ك هه‌لكه‌فتا نه‌هێلا گۆل بهێته تۆماركرن، لێ د خوله‌كا 92ێ دا و ژ فاوله‌كا ئێكسه‌ر یاریزانێ مرور كه‌رار سه‌عد شیا گۆلا ئێكێ و سه‌ركه‌فتنێ بۆ تیما خوه بینت و هیڤیێن دهۆكێ لاواز كرن و ڤه‌مراندن و هێلا ب هیڤییا بڕیارا دادگه‌ها كاس یا نێڤده‌وله‌تی و سه‌ركه‌فتن د هه‌ردو یاریێن بهێت دا هه‌مبه‌ری وێ خودانا سه‌رێ لیستێ یانا حدوود حه‌فتیا بهێت و دووماهیێ دا تووشی خوساره‌تیێ بیت ئه‌وا دوهی سه‌ركه‌فتی لسه‌ر سوق ئه‌لشیۆخ ب دو گۆلان بێ به‌رامبه‌ر.
بڤان ئه‌نجامان حدوود ب 41 خالان سه‌رێ لیستێ دهێت و ئێك یاری مایه ژ خولێ، دهۆك ب 33 رێزا دویێ دهێت و دو یاری ماینه.
