زاخۆ د مه‌ترسیا داكه‌فتنێ دایه
ئه‌ڤرۆ، عه‌لی حاجی:
چاڤه‌ڕێ دهێته كرن ئه‌ینیا بهێت یاریێن گه‌ڕا 24ێ ژ خولا پلا نایابا كوردستانێ یا ته‌پا پێی بهێنه ئه‌نجامدان، تیما یانا دهۆكێ دێ مێڤانداریا یانا سۆران كه‌ت و ژلایێ خوه‌ڤه تیما یانا زاخۆ ده‌مه‌كێ هه‌ستیارده‌رباز دكه‌ت ئه‌وا رێزا به‌ری دووماهیێ دهێت كو دڤێ گه‌ڕێ دا لدووڤ خشتێ به‌ری ده‌ستپێكرنا خولێ ل گه‌ل یانا هه‌لۆ بوو لێ دێ یا چاڤه‌ڕێ كری بیت ژبه‌ركو یانا هه‌لۆ ل ده‌ستپێكا خولێ خوه ژ هه‌ڤڕكیان ڤه‌كێشا بوو.زاخۆ دێ یا چاڤه‌ڕێ كری بیت.
لدۆر تیما زاخۆ و دووماهی پێشهاته بلند شه‌فیق سه‌رۆكێ یانێ دیاركر كو ئه‌و لسه‌ر لاوازیا ئه‌نجام و رێزبه‌ندیا تیما خوه بێ ده‌نگ نابن و كارگێریا یانێ بڕیاردا بۆ یاریێن مایی رێژه‌كا باش یا یاریزانێن تیما وان دخولا ئیراقێ دا بۆ تیما خوه یا خولا كوردستانێ ڤه‌گۆهێزن ژوانا یاریزانێن پیشه‌كارن بۆ هندێ مفایی ژێ وه‌ربگرن و خوه ژ داكه‌فتنێ بۆ پلا ئێكا كوردستانێ قورتالبكه‌ن.
ژلایێ خوه‌ڤه لدور دووماهی به‌رهه‌ڤیێن تیما دهۆكێ هه‌رمان سالح راهێنه‌رێ تیمێ بۆ رۆژناما ئه‌ڤرۆ گوت: یاریێن مایی ژ خولێ هه‌موو دگرنگن و هه‌ر ئه‌نجامه‌كێ یاریه‌كێ دێ كارتیكرنه‌كا مه‌زن لسه‌ر رێزبه‌ندیێ كه‌ت، ئه‌ركێ مه ب سانه‌هی نینه لێ بۆ سه‌ركه‌فتنێ ژی درژدین تایبه‌ت جوداهیا دناڤبه‌را مه و تیمێن پێشیێ و پاشیێ ، ژ ئاستێ یاریزانێن خوه رازیمه و ئه‌و پلانا مه دانایی سه‌ركه‌فتی نه، بۆ یاریا سۆران هه‌موو یاریزان به‌رهه‌ڤن بێ كێماسی و مه پشتبه‌ستن لسه‌ر پێكهاتیه‌كێ پرانیا وان لاون.
ژ یاریێن دێ یێن خولێ بۆ رۆژا ئه‌ینی، شه‌قلاوه- ئارارات، چه‌مچه‌مال- ده‌ربه‌ندیخان، رۆژا شه‌مبیا بهێت، شێروانه- برایه‌تی، هه‌ولێر- سیروانی نوو، سه‌ید سادق- نه‌وروز، هندرین- پێشمه‌رگا هه‌ولێرێ.
بۆ زانین سیروانی نوو سه‌رێ لیستێ دهێت ب 43 خالان، هندرین رێزا دویێ ب 40 خالان، سه‌یدسادق رێزا سێیێ ب33 خالان، چه‌مچه‌مال و دهۆك رێزێن حه‌فت و هه‌شتێ دهێت ب 29 خالان، زاخۆ ب19 خالان رێزا 15ێ وبه‌ری دووماهیێ دهێت.
