ڤه‌كۆله‌ره‌كێ سیاسی:چو جاران هه‌رێما كوردستانێ نه‌بوویه گه‌ف ل سه‌ر وه‌لاتێن ده‌وروبه‌ر
ئه‌ڤرۆ ، زنار تۆڤی:
سه‌رۆكێ په‌یمانگه‌ها ڤه‌كۆلینێن ئه‌مریكی – كوردی، كارۆخ خوشناو، د دیداره‌كێ دا بۆ رۆژناما (ئه‌ڤرۆ) راگه‌هاند، ئێك ژ سامانێن نیشتیمانی ل هه‌رێما كوردستانێ، كو سازش ل سه‌ر ناهێته كرن، پێكهاتیه ژ وی پێگه‌هێ سه‌قامگیری یێ هه‌رێمێ ل ڤێ ده‌ڤه‌را پری ئاریشه دا هه‌یی، ب ره‌نگه‌كێ كو قه‌وارێ هه‌رێما كوردستانێ هه‌رده‌م پشكه‌كا گرنگ بوویه ژبۆ بده‌ستڤه‌ئینانا ئارامی و ئاسایشا ڤێ ده‌ڤه‌رێ، هه‌روه‌سا چو جاران هه‌رێما كوردستانێ نه‌بوویه گه‌ف بۆ سه‌ر وه‌لاتێن جیران، به‌رۆڤاژی هه‌رێما كوردستانێ ب سه‌قامگیریا خوه هاتیه جوداكرن ژ ئیراقه‌كا ئالۆز و نه‌سه‌قامگیر، ئه‌ڤ سامانێ نیشتیمانی هه‌رده‌م جهێ شانازیا خه‌لكێ كوردستانێ و هنارتیێن دبلۆماسی و رێكخراوێن ناڤده‌وله‌تی بوویه، چونكی ل ژێر سیبه‌را ڤی پێگه‌هێ سه‌قامگیر دا نه ب تنێ خه‌لكێ كوردستانێ، به‌لكو ب سه‌دان هزار ئاواره ل ناڤه‌راست و ژێریا ئیراقێ و پارچێن دیتر یێن كوردستانێ ڤه‌حه‌واندینه، له‌وما ئاسایشا هه‌رێما كوردستانێ ب ره‌نگه‌كێ گشتی و ئاسایشا هه‌ولێرا پایته‌خت ب تایبه‌تی هێلا سۆرن و نابیت ب چو ره‌نگان رێ ب چو وه‌لات و گرۆپ و میلیشیان بهێته دان، ل ژێر هه‌ر به‌هانه‌كێ هه‌رێما كوردستانێ بكه‌نه مه‌یدانا ئێكلاكرنا ململانیێن ناڤخوه‌یی و هه‌رێمایه‌تی و ناڤده‌وله‌تی، هه‌روه‌سا ئه‌ڤه جارا نه‌هێ یه ب مووشه‌كان هێرشێ دكه‌نه سه‌ر هه‌ولێرا پایته‌خت، به‌لێ هێرشا مووشه‌كی یا ڤێ جارێ راسته‌وخوه ژ ئالیێ ئیرانێ ڤه هاتیه ئه‌نجامدان، ب به‌هانه‌یا هه‌بوونا باره‌گایێن مۆسادا ئیسرائیلی ل هه‌ولێرێ، ئه‌ڤ به‌هانه ژی یا دووره ژ راستییێ.
كارۆخی ئه‌وژی گۆت” ده‌مێ سه‌ره‌دانا مسته‌فا كازمی سه‌رۆك وه‌زیرێن ئیراقێ بۆ هه‌ولێرا پایته‌خت، ب بێمنه‌تی هه‌ردو سه‌رۆكاتیێن هه‌رێما كوردستانێ و حوكمه‌تا هه‌رێما كوردستانێ، داخوازا پێكئینانا لژنه‌كا ڤه‌كۆلینان كریه بۆ راستی و دروستیا وان به‌هانه‌یێن ئیرانێ، یا روهن و ئاشكرایه، كو مه‌ره‌ما ئیرانێ ژ هێرشا ڤێ جارێ چه‌ند ئارمانجه‌ك یێن هه‌ین، ژ وانا: داكو فشارێ بێخیته سه‌ر هه‌رێما كوردستانێ، ب مه‌ره‌ما تێكدانا وێ بالانس و هه‌ڤسه‌نگیا هه‌رێما كوردستانێ راگرتی ل سه‌ر ئاستێ ناڤخوه‌یا ئیراقێ دناڤبه‌را شیعه و سوننه‌یان دا، هه‌روه‌سا ل سه‌ر ئاستێ وه‌لاتێن ڤێ ده‌ڤه‌رێ، دیسان فشارێ بێخیته سه‌ر هه‌رێما كوردستانێ داكو وه‌به‌رئێنانێ د بیاڤێ گازا سروشتی دا و پركرنا پێدڤیێن بازارێ ئورۆپی دا نه‌كه‌ت”.
سه‌رۆكێ په‌یمانگه‌ها ڤه‌كۆلینێن ئه‌مریكی – كوردی ئه‌و ژی ئاشكرا كر” ده‌مێ ڤێ هێرشێ په‌یامه‌كه بۆ ئیدارا سه‌رۆكێ ئه‌مریكی جۆ بایدنی ، كو ئیران خوینا قاسم سلێمانی و ئه‌بو مه‌هدی موهه‌ندس ژبیر ناكه‌ت، هه‌روه‌سا تێركرن و رازیكرنا جادا شیعی یا ئیراقێ و ئیرانێ یه، دیسان ئه‌زموونه‌كه بۆ ئیدارا جۆ بایدنی، داكو بزانن هه‌تا چو راده ئه‌مریكا دێ به‌رگریێ ژ هه‌رێما كوردستانێ كه‌ت، ب تایبه‌تی د نوكه دا، كو ئه‌مریكا و جیهان مژوولی شه‌رێ رووسیا و ئۆكرانیا نه، هه‌روه‌سا هێرشا مووشه‌كی یا ئیرانێ بۆ سه‌ر هه‌ولێرا پایته‌خت، فشاره‌كه بۆ سه‌ر ئه‌مریكا داكو ڤه‌گه‌ریته‌ڤه ناڤ رێككه‌فتنا ئه‌تۆمی ” 5+1″، كو ئه‌ڤه چه‌ند رۆژن دانوستاندنێن ڤیه‌نا راوه‌ستاینه، له‌وما ئیرانێ ئه‌ڤ هێرشه ئه‌نجامدایه”.
