كچێن سه‌نحاریب نوونه‌راتیا هه‌لبژارتیێ پارێزگه‌ها دهۆكێ دكه‌ن
ئه‌ڤرۆ،قه‌یس وه‌یس
ب پشكداریا چار هه‌لبژارتیێن پارێزگه‌هان ل ئه‌ینیا بوری قاره‌مانیا ئیراقێ بۆ یاریا باسكێت بۆلێ ل سه‌ر ئاستێ كچان بۆ لاوان ئه‌وا ل باژێرێ سلێمانیێ هاتیه ئه‌نجامدان و یانا سه‌نحاریب نوونه‌راتیا پارێزگه‌ها دهۆكێ كو شیایه سه‌ركه‌فتنا ئێكێ لسه‌ر هه‌لبژارتیێ هه‌ولێرێ بینت ب 75- 41 خالان و ئه‌ڤرۆ دێ هه‌مبه‌ری هه‌لبژارتیێ سلێمانیێ بیت.
لدور ڤێ یه‌كێ داود ره‌به‌ن سه‌رۆكێ یانا سه‌نحاریب بۆ رۆژناما ئه‌ڤرۆ دیاركر چار هه‌لبژارتی پشكداری قاره‌مانیا ئیراقێ یا كچان بووینه و تیما مه ب نوونه‌راتیا دهۆكێ هه‌ڤڕكێی بۆ ناسناڤی دكه‌ت ئه‌وا دێ ئه‌ڤرۆ ب دوماهی هێت پشتی مه یاریێن خوه ب شێوێ خول ئێك قۆناغ ئه‌نجامده‌ن و دێ بزاڤێ كه‌ین باشترین شێوه ئاست و ئه‌نجام نیشان بده‌ین.
ناڤهاتی دیاركر ئارمانجا وان د قاره‌مانیێ دا هه‌ڤڕكیێ بۆ ناسناڤی كه‌ن سه‌رباری هه‌لبژارتیێ سلێمانیێ هه‌ڤڕكا بهێزه و گۆت: ئه‌ركێ مه ب سانه‌هی نینه لێ مه باوه‌ری ب ئاست و شیانێن یاریزانێن خوه هه‌یه بۆ هه‌ڤڕكیا رێزێن پێشیێ و پرانیا یاریزانێن مه ئه‌و سه‌ربورا مه‌زن د ڤان قاره‌مانیان دا نینه و دژیه‌كێ بچووك دایه لێ رژدین و یا دشیان دا بیت دێ بۆ ده‌ستڤه ئینانا سه‌ركه‌فتنان كه‌ین و ب ئه‌نجامه‌كێ دلخۆشكه‌ر ڤه‌گه‌ڕێنه دهۆكێ و یاریا ئه‌ڤرۆ ل گه‌ل سلێمانیێ چاره‌نڤیسه بۆ ناسناڤی.
