یانا باتیفا گه‌فێن خوه‌ڤه‌كێشانێ دكه‌ن
ئه‌ڤرۆ،عه‌لی حاجی:
د داخویانیه‌كێدا سه‌رۆكێ یانا باتیفا یا وه‌رزشی بۆ رۆژناما ئه‌ڤرۆ دیاركر تیما وان یا ته‌پا پێی گه‌هشته قۆناغا دووماهیێ یا خولا پلا دو یا كوردستانێ لێ هه‌تا نوكه قاسا یانێ ڤالایه و هه‌كه چو پشته‌ڤانی نه هێته كرن دێ خوه ژ خولێ ڤه‌كێشن.
زێده‌تر ئه‌یهه‌م جامی گۆت: تیما مه یا ته‌پا پێی شیا ب ئاست و شیان بگه‌هیته قۆناغا دووماهیێ و ده‌ربازبوون بۆ پلا ئێكا كوردستانێ و ئه‌ڤرۆ دێ هه‌ڤڕكیێن ده‌ستڤه‌ئینانا پلێتا ده‌ربازبوونێ هێته كرن و یاریا مه ل گه‌ل زاكۆیا جیهانه، هه‌رچه‌نده دانوستاندن ل گه‌ل دو یاریزانان كرینه پێخه‌مه‌ت بهێزكرنا رێزێن تیمێ بۆ ڤێ قۆناغێ و هه‌موو بزاڤا كه‌ین بۆ یاریا ئه‌ڤرۆ به‌رهه‌ڤبن لێ ئاریشا مه‌زن كو دبیت ڕێگریێ ل هاتنا وان بكه‌ت و بڕیاره‌كا نه چاڤه‌ڕێ بده‌ین ئه‌وژی نه‌بوونا پشته‌ڤانیا دارایی ل یانێ و قاسا یانێ ڤالایه له‌ورا هه‌كه ره‌وش بڤێ ره‌نگی بیت دێ نه‌چار بین بڕیارا خوه‌ڤه‌كێشانێ ژ خولا كوردستانێ راگه‌هینن، لێ دێ هه‌موو بزاڤا كه‌ین نه‌گه‌هیته ڤێ ڕاده‌یی ژبه‌ركو مه زه‌حمه‌ته‌كا مه‌زن بریه و تیما مه ل سه‌ر رێكه‌كا دروست دچیت و پلانێن باش هاتینه دانان بۆ پێشخستن و پشته‌ڤانیا كوڕێن ده‌ڤه‌را باتیفا.
ژلایه‌كێ دووڤه سه‌رۆكێ یانا باتیفا ئه‌وچه‌نده ژی دیاركر ئه‌وان ئارمانج و هیڤیێن مه‌زن هه‌نه و به‌رهه‌ڤیێن باش هاتینه كرن كو ژبلی سه‌ركه‌فتنێ چو ئه‌نجامێن دی د به‌رژوه‌ندیا وان دا نینه ژبه‌ركو شێوازێ خول ژ ده‌ستدانا خالان دێ هیڤیێن ده‌ربازبوونێ لاواز كه‌ت و پلێتا ئێكانه یا گرۆپی دێ ژ ده‌ست ده‌ن له‌ورا مه هه‌موو یاریزانێن خوه ئاگه‌هداركرینه وهۆشدارێ دایێ و پشتبه‌ستن ل سه‌ر جه‌ماوه‌رێ و زاخا یاریزانێن خوه كه‌ین بۆ سه‌ركه‌فتنان.
