ل تاچاكستانێ سێ یاریزانێن دهۆكێ هه‌ڤڕكیا ناسناڤێ ئاسیا دكه‌ن
ئه‌ڤرۆ،
سێ یاریزانێن پارێزگه‌هێ و یانا دهۆك یا وه‌رزشی ب ناڤێ هه‌لبژارتیێ ئۆلۆمپی و لاوێن ئیراقێ پشكداری قاره‌مانیا ئاسیا بۆ یاریا پایسكلان بووینه ئه‌وا هه‌ڤڕكیێن وێ به‌رده‌ومن ل وه‌لاتێ تاچاكستانێ دهێنه كرن
د داخویانیه‌كێدا تارق سه‌عید راهێنه‌رێ تیما یانا دهۆك و یاریزانێن پارێزگه‌هێ بۆ رۆژناما ئه‌ڤرۆ گوت: هه‌ر سێ یاریزانێن مه سه‌ربه‌رست عه‌بدوللا و نه‌وزاد مسته‌فا بۆ هه‌لبژارتیێ ئۆلۆمپی و وه‌هبی سلێمان بۆ هه‌لبژارتیێ لاوێن ئیراقێ ل پایته‌ختێ تاچاكستانێ دۆشنبه پشكداری قاره‌مانیا ئاسیا بووینه ئه‌وا 450 یاریزان ژ 25 وه‌لاتان هه‌ڤڕكیێ بۆ ناسناڤی دكه‌ن كو ل ئه‌ینیا بوری هه‌تا 30ێ ڤێ هه‌یڤێ بۆ سیسته‌مێ به‌ریكانا تیم بۆ گشت یاریزانان و به‌ریكانا كت دژی ده‌مژمێرێ هێنه كرن.
زێده‌تر ناڤهاتی گۆت:مه‌زنترین قاره‌مانی سه‌ر ئاستێ ئاسیا كو سه‌رجه‌مێ هه‌شت یاریزانێن هه‌لبژارتیێ ئیراقێ یێ ئۆلۆمپی، لاوان و كچان پێنچ ژوان ژ هه‌رێما كوردستانێ نه ئه‌وژی سێ یێن پارێزگه‌ها دهۆكێ نه ئه‌ڤچه‌نده ژی به‌لگه‌یه كو یاریزانێن پارێزگه‌هێ خودان شیان و شاره‌زاهیه‌كا باش هه‌یه و گه‌هشتنا وان بۆ سه‌ر ئاستێ ئاسیا، سه‌رباری ئه‌ركێ وان ب سانه‌هی نابیت هه‌مبه‌ری وه‌لاتێن پێشكه‌فتی ل ئاسیا نموونه چاپان، ئیران، ئیمارات، ئۆزپاكستان، تایله‌ند، هندستان، به‌حرێن و ڤێتنام، لێ یا گرنگ پشكداریا یاریزانێن كورده د ناڤ مه‌زنترین ڤیسته‌ڤالا ئێكه‌تیا پایسكلڤانێن ئاسیا یا سالا نوو دا.
هه‌روه‌سان تارق سه‌عید ئه‌وچه‌نده ژی دیاركر كو ئه‌و شیانێن یاریزانێن دهۆكێ هه‌ین سه‌ر ئاستێ ئیراقێ كێم وێنه‌یه لێ ئاریشه نه‌بوونا پشته‌ڤانیێ گه‌له‌ك جاران ئه‌و هیڤی و ئۆمێد ژ ده‌ست داینه و گۆت: مه بنیاته‌كێ رێكخستی و پلان هه‌یه كو د شیان دایه پارێزگه‌ها دهۆكێ ببیته ئێكه‌م ل سه‌ر ئاستێ ئیراقێ بۆ ناسناڤێن قاره‌مانیا و هه‌تا نوكه چه‌ندین یاریزانێن دی سه‌ر ئاستێ تازه‌پێگه‌هشتیان باشترین شێوه هاتێنه پێش له‌ورا هیڤییا مه ئه‌وه ژ جهێن په‌یوه‌ندیدار كو پشته‌ڤانیێ بكه‌ن ژبۆ ناڤێ دهۆكێ و پێشخستنا وه‌رزشا پایسكلان ل پارێزگه‌هێ.
